Къабарты-Малкъар къырал университетни медицина факультетини стоматология бёлюмюню 4-чю курсуну студенти Къартлыкъланы Лейля, «MEGAMaster» халкъла аралы конкурсда билимин, сынауун кёргюзтюп, ючюнчю жерге чыкъгъанды. Эришиуле быйыл 14-чю кере къуралгъандыла эмда алагъа тюрлю-тюрлю къыралладан 20 студент къатышханды.
«MEGAMaster» халкъла аралы конкурсну башламчылары Узбекистанны Ташкентде эмда Самаркандда къырал медицина университетлеридиле. Быйыл форум 4 майда очно халда Ташкентни къырал университетини стоматология бёлюмюню мурдорунда бардырылгъанды. Ары Москвадан, Санкт-Петербургдан, Хабаровскдан, Саратовдан, Омскдан, Самарканддан, Ташкентден эм башха шахарладан медицина факультетлени 3-5-чи курсларыны студентлери жыйылгъандыла.
Лейля бизге айтханыча, эришиуле эки бёлюмде ётгендиле. Биринчиден, «Тишни кариесден сакълау, тинтиу эм багъыу» темагъа берилген ишни толтурургъа керек эди. Экинчиден, ауругъан тишни багъа билгенлерин кёргюзтюп, ариу, билинмезча жамаргъа тюшгенди.
- Конкурсда дерследе алгъан билимибизни, аны бла бирге уа иш юсюнде сынамыбызны кёргюзтгенбиз. Башха къыралладан бла шахарладан студентле бла танышханыма къууаннганма, быллай тюбешиуле сынам бередиле, араларыбызда чеклени кенг этедиле. Бу эришиуле мындан ары стоматологияны къайсы бёлюмюнде ишлерге сюйгеними ангыларгъа болушхандыла. Тыш къыралгъа барып, анда республиканы атын айтдырыргъа, башха жерледен тенглерим бла танышыргъа онгум болгъаны ючюн стоматология эм бет-жаякъ хирургия жаны бла институтну таматасы Мустафаланы Шабазны жашы Магометге эмда илму таматам Малкъарукъланы Аминат Алексеевнагъа ыразылыгъымы айтыргъа сюеме. Конкурсну къурагъанла бизге къонакъбай болгъандыла, Ташкентни сейир, ариу жерлери бла шагъырей этгендиле, саугъала да бергендиле, сау болсунла, - дегенди Лейля.
Тикаланы Фатима.
