Алгъаракъда Май районда «Непокоренные» спорт-билим бериу майданда энчи аскер операцияда ёлген Жантуудуланы Рустамны хурметине эришиу бардырылгъанды. Аны ДОСААФ-ны жер-жерли бёлюмю, «Юнармиячыланы» регион штабы, районну аскер-патриот юйретиу жаны бла арасы эм «Биринчилени къымылдауу» битеуроссей организацияны Къабарты-Малкъарда бёлюмю къурагъандыла.
Эришиуге къатышханла аскер хазырлыкъларын, кючлерин да кёргюзтюрге керек эдиле. Ала бек алгъа бир минут шош туруу бла жигит жашыбызны эсгерген эдиле.
Эсигизге салайыкъ, Жантууду улу кесини аскер борчларын толтура жан бергенли быйыл эки жыл боллукъду.
...7 июль. Тырныауузчу Жантуудуланы Русланны жашы Рустам ауур жаралы болады. Аскерибизни къарыуун кючлендирген инженер оборудованияны орнатып къайтып келе, ол баргъан автомобильге ВСУ-ну пилотсуз учхан аппараты тюшеди. Башындан ауур жаралы болгъан тенглерин аскерчиле госпитальгъа терк жетдиредиле. Алай, жарсыугъа, врачла аны жанын сакълаялмагъандыла: жюреги кётюралмай, эки сагъатдан дуниясын алышханды. Аскерге контракт бла ол 2024 жылны январь айында кетген эди. Анда таулу жашны тенглерини араларында аты «Устаз» эди...
Жашаууну арт 15 жылын Жантууду улу Майскийде ётдюргенди. Юйюр къурап, сабий ёсдюрюп, шахарны 1-чи номерли гимназиясында тарыхдан бла ОБЖ-дан устаз болуп ишлегенди, тюрлю-тюрлю республикалы конкурслагъа да къатыша тургъанды. Кёп жылланы ичинде ОБЖ-дан школчуланы битеуроссей олимпиадасыны 2019 эм 2023 жыллада комиссиясына киргенди, «Хорлам» битеуроссей аскер-спорт оюнланы да сюзгенди. КъМР-ни Жарыкъландырыу эмда илму министерствосуну Баш аттестация комиссиясыны ишине анализ этерге да чакъырылып тургъанды.
Республикалы министерстволаны бла ведомстволаны сыйлы грамоталары бла да саугъаланнганды. 2023 жылда КъМР-ни Парламентини Сыйлы грамотасына тийишли кёрюлгенди.
Жантуудуланы Рустамны сохталары тюрлю-тюрлю эришиуледе алчы жерлени алгъандыла. Ол аланы Ата журтларын сюерге, анга кертичи болургъа юйретгенди. Аны хайырындан окъуучуларындан кёплери Волгоградда, Краснодарда, Москвада, Санкт-Петербургда аскер окъуу юйлени сайлагъандыла.
- Бизни класс таматабыз эди. Жаш болгъанына да къарамай, окъуучуладан билимни, низамны да къаты сурагъанды. Аны бла тюрлю-тюрлю ушакъла бардырыучу эдик. Жай солуу кюнлерибизде бери, шахаргъа, къайтхан кезиуюбюзде аны бла тюбеширге бек сюйгенбиз. Биз, жаш устазла, андан кёпге юйреннгенбиз. Аны юсюнден келген ачы хапар а бизни барыбызны да болмагъанча жарсытханды. Энди биз анга бир да тюбемезлигибиз, аны жарыкъ ышарыуун кёрмезлигибиз жюреклерибизни мудах этеди, – деп эсгереди кесини устазын Настя Дмитриенко.
Май районну администрациясына Рустам къуллукъ этген аскер частьдан къагъыт келгенди. Анда ала ол ишлеп кетген 1-чи номерли шахар гимназиягъа Ата журтуну сейирлерин къоруулай ёлген жашны атын атарларын тилейдиле. Сёзсюз, ол бек ахшы иш боллукъду.
Жантуудуланы Рустамны юйдегиси эм жашчыгъы къалгъандыла.
Таппасханланы Аминат.
Суратда: КъМР-ни Парламентини таматасы Татьяна Егорова Рустамны саугъалагъан кезиу (2023 ж.)
