Алгъаракълада Россей Федерацияны  Президенти Владимир Путинни буюрууу бла Сюд приставланы федерал службасыны  КъМР-де Управлениясыны Черек районда бёлюмюню тамата сюд приставы, ич службаны капитаны Башийланы Мустафаны жашы Юсюпге «Россей Федерацияны сыйлы  приставы» деген ат аталгъанды. Анга ол республикада биринчи  болуп тийишли болгъанды. 
Юсюпню бу саугъасы бла алгъышлай, анга тюбеп, ишини, жашаууну юсюнден да ушакъ этгенбиз.

Кесим а аны эрттеден бери таныйма, келиними эгечини жашыды. Не заманда да артыкъ сёлешмеген, этерин, айтырын да билген, ауур акъыллы жаш, школдан солуугъа чыкъгъанында, анасыны эгечин жокълай, бизге терк-терк келиучю эди. Гитчелигинде окъуна сюйгенди аскер форманы киерге. 
Узун бойлу, кенг жауурунлу не къыйын ишден да къачмагъанды, спорт бла къаты кюрешгенди. Юйде атасына болушханды, гитче къарындашларына не жаны бла да юлгю болгъанды. Битеу ол затла анга бюгюнлюкде ишинде, жашауунда да жарайдыла.
– Юсюп, сени, сёзсюз, районда, андан тышында да кёпле таныйдыла. Анга да къарамай, кесинги юсюнгден толуракъ хапар айтсанг эди.
– Юйюрюбюз Бабугентде жашайды. Анда мектепни бошагъанма, ызы бла КъМКъУ-ну тарых факультетине киргенме. Анамы бир эгечини къызы да аны бошап, бюгюнлюкде мекетепде тарыхдан сабийлеге дерсле береди, энди уа ол факультетни мени экиге айланнган эгечими къызы да жетишимли бошап чыкъгъанды, бусагъатда кандидат диссертациясын жаза турады. Эгечлерим, мени ёхтемлигимдиле. 
Университетни бошагъанымдан сора, бир жылны элден узакъ болмай интернат-школда тарыхдан дерсле бергенме. Бир жылдан а Черек районда сюд приставланы бёлюмю ачылады, анда ишлерге чакъыргъанларында, сагъыш эте турмай. баргъанма. 2007 жылда уа сюд приставланы бёлюмюню таматасыны орунбасарына салгъандыла. 2014 жылдан бери уа Черек районда сюд приставланы бёлюмюне башчылыкъ этеме.
– Атанг бла ананг а не айтхан эдиле бу ишге тохтагъанынгда? 
– Алгъа ыразы болгъан эдиле, алай артдан-артха мени ишде арыгъанымы кёрюп, жарсыучудула. Айхай да, сюд приставлада къуллукъ этиуде сынау артыкъ уллу болмагъаны да къыйнай эди. Болсада, ишлей барсанг, кюнден-кюннге сынау да жыйышдыраса. Аны ючюн а бютюн къадалып ишлерге,  тюрлю-тюрлю журналланы окъургъа да тюшгенди. Бюгюнлюкде да коллегаларым бла тюбешеме, сёлешеме, билмеген затымы сорама. 
– Район артыкъ уллу тюйюлдю, бир бирни танымагъан, жууукъ жетмеген кёп адам жокъду. Битеу ол затланы эсге алып айтсакъ, ишинг къыйын тюйюлмюдю?
– Хау, тынч тюйюлдю. Аны бла бирге уа иги жаны да кёпдю. Бир онг табып, адамлагъа эс тапдырыр амал излейме. Анам, атам да бизге эсгертгенлей турадыла: «Кимге да болушлукъ этерден артха турмагъыз», – деп. Мен аланы ол сёзлерин бир заманда да унутмайма.
– Сен бу ишге тохтагъанлы не зат тюрленнгенди бёлюмде?
– Махтаннган этгенча болмасын, ол жаланда мени ахшылыгъымдан тюйюлдю, коллективде ишлерин сюйген, билген адамла ишлейдиле. Аланы хайыры бла бёлюм кёрюмдюлерин игилендире барады. «Эм иги бёлюм» деген атха кёп кере тийишли болгъанды. 
– Муратыма жетгенме, деп айталлыкъмыса?
– Хау, право низамны сакълаучу органлада къуллукъ этерге деген муратым толгъанды. Аны къалай бардыргъаныма уа къыралны Башчысы тийишли кёрген сыйлы ат шагъатлыкъ этеди. Бу саугъа да жангыз кесими ахшылыгъымдан тюйюлдю. Битеу коллективни ишини жетишимине берилген багъады. Насыпха, бир юйюрню адамларыча, бир бирге билеклик этебиз, намыс-сый беребиз. Къууанчыбыз, жарсыуубуз да бирди.
– Сен аппанг Огъурлуну къатында ёсгенсе. Ол да, районда угъай, республикада да аты айтылгъан киши эди, Уллу Ата журт урушха тири къатышханды, кёп сабий ёсдюргенди. Ол сенде къаллай ыз къойгъанды?
– Аппам урушну биринчи жылында окъуна кирген эди къазауатха. 13-чю гвардиялы мараучу дивизияда къуллукъ этгенди, Сталинградны къоруулагъанды, жаралы болуп, госпитальгъа да тюшгенди. Андан чыкъгъандан сора, Ростовну, Киевни, Польшаны бла Чехословакияны немисли фашистледен азатлау сермешлеге къатышханды. 1944 жылны ахырында уа экинчи кере жаралы болгъанды. Андан сора саулугъуна кёре аскерден кетерге тюшгенди. Урушда этген батырлыгъы эмда кишилиги ючюн «За отвагу» деген эмда кёп башха майдалла бла саугъаланнганды. Мен, къарындашларым да аппабыз бла не заманда да ёхтемленнгенбиз, ёхтемленебиз.
Жыл сайын 9 майда биз барыбыз да, аппабыз ишлеген юйюбюзге келип, Хорламны кюнюн белгилейбиз, аппабызны ол кюн майдаллары бла аскер формасын кийиучюсюн, бизни тёгерегине жыйып, хапар айтыучусун эсгеребиз. Бюгюнлюкде да аны майдаллары бла аскер кийими юйде сыйлы хазнача сакъланадыла. 
Атамы къарындашы Башийланы Магомет да намысы-сыйы жюрюген адам болгъанды, кёп жылланы республикада халкъны жашау жумушларын жалчытыу жаны бла министрини къуллугъун бардыргъанды. Битеу ол затланы айта келгеним: юлгю алыр адамларым бардыла. 
– Бу усталыкъны сайлагъанынга сокъураннган кезиулеринг болгъанмыдыла?
– Угъай. Биз къырал жумушну тамамлайбыз, бир адамны да законлу эркинликлерине бузукълукъ салмайбыз, ол чекден чыкъмайбыз. Баш борчубуз сюдню оноуун толтурууду. Сюдле тохташдыргъан низамны жалчытабыз, акъылбалыкъ болмагъан сабийлерин къоюп, алиментлерин тёлемей къачып, бугъуп айланнган аталаны бла аналаны излеп табабыз, башха борчлуланы да ачыкълайбыз.
– Сени юйдегили болгъанынгы да билеме, сабийле ёсдюресиз, аланы уа къаллай юлгюледе юйретесиз?
– Къыз, эки жаш да ёсюп келедиле. Сабийле районда бардырылгъан тюрлю-тюрлю конкурслагъа къатышадыла, кими спорт бла, кими чыгъармачылыкъ иш бла кюрешедиле. Аналары Къашхатауда мектепде ингилиз тилден окъутады. Биз аланы къолубуздан келгенича энчи юлгюбюзде юйретирге кюрешебиз, ала туугъан жерлерин, тукъум тарыхларын билип ёсерге кереклисин дайым да эслерине салабыз. Сёзсюз, ол ишибизде бизни таматаларыбыз да себеплик этедиле. Ала да ахшы юлгю кёргюзтедиле. 

Ушакъны Холаланы Марзият 
бардыргъанды.