ГъуазджэхэмкIэ Кавказ Ищ­хъэ­рэ къэрал институтым накъыгъэм и 14-м щыпащащ ­«Кинокавказ-2026» V кинофестивалым. ИлъэситIым зэ ­екI­уэкI а Iуэхугъуэр  2018 гъэм къызэ­ригъэпэщащ ГъуазджэхэмкIэ Кавказ Ищхъэрэ къэрал инс­титутым, УФ-м ЩэнхабзэмкIэ и министерствэр и дэIэпыкъуэ­гъуу. Абы къэрал 16-м, Урысейм щыщу щIыналъэ 65-м я лIы­кIуэхэр хэтщ.

УзэIэбэкIыжрэ фестивалым и тхыдэм уриплъэжмэ, ар щрагъэжьа 2018 гъэм лэжьыгъэ 35-рэ къаIэрыхьауэ щытамэ, мы гъэм абы и бжыгъэр 600-м нэсащ. КъэпщытакIуэхэр хэплъа нэужь, фильм нэхъыфIу 70 къыхахащ кинофестивалым щагъэлъэгъуэну. 
Утыкум ирагъэблэгъащ къэп­щытакIуэ гупым хэтхэу УФ-м и ­Кинематографистхэм я зэгу­хьэ­ныгъэм и ЩIалэгъуалэ центрым фестиваль унэтIыныгъэмкIэ и унафэщI, актёр, продюсер, оператор, кинорежиссёр Симухин Антон (Москва), анимацэ про­ектхэм я арт-унафэщI, художник Метельский Станислав (Москва), киновед, редактор, режиссёр Черджиевэ Индирэ, кинорежиссёр, сценарист Эфендиев ­Гаджимурад (Дагъыстэн), тха­кIуэ, сценарист, литературнэ редактор Чекмаев Сергей (Москва), тхыдэ щIэныгъэхэмкIэ кандидат, документальнэ кинохэм я про­дюсер Кочеляевэ Нинэ (Москва), режиссёр, актёр, сценарист, продюсер Мармонтов Андрей (Москва), УФ-м щIыхь зиIэ и артист Соколов Андрей (Москва), УФ-м щIыхь зиIэ и артист, ЩоджэнцIыкIу Алий и цIэр зезыхьэ Къэ­бэрдей къэрал драмэ театрым и режиссёр нэхъыщхьэ, КъБР-м и Кинематографистхэм я зэгухьэ­ныгъэм и унафэщI Шыбзыхъуэ Басир (КъБР), ГъуазджэхэмкIэ Кавказ Ищхъэрэ къэрал институтым режиссурэмкIэ и къудамэм и унафэщI, Къэбэр­дей-Балъкъэр, Ингуш республикэ-хэм гъуазджэхэмкIэ щIыхь зиIэ я лэжьакIуэ Шэрджэс Мухьэмэд (КъБР), УФ-м и Журналистхэм, КъБР-м и Кинематографистхэм я зэгухьэныгъэхэм хэт, «One Light Studio» студиер зыгъэлажьэ режиссёр Iэзэ, этнограф Ерокъуэ Бишер (КъБР), режиссёр, сце­нарист, урыс, хамэ къэрал саугъэтхэм я лауреат, къэпщыта­-кIуэ гупым я унафэщI Калинин Виталий (Москва), нэгъуэщIхэ-ри. 
Фестивалыр пресс-конференцкIэ ирагъэжьащ. Абы къэп­щы­такIуэ гупым хэтхэр къыщытеувыIащ иджырей кином и зыу­жьы­ныгъэм теухуа я Iуэху еп­лъы­кIэ­хэм. Къэпсэлъахэр щхьэхуэу тепсэлъыхьащ иужьрей илъэси 10-м кином гулъытэ нэхъ щы­хуащI Тэтэрстаным, Башкирием, Кавказ Ищхъэрэм, Красноярск, КъуэкIыпIэ Жыжьэ, Калининград щIыналъэхэм яIэ хъуа зэ­фIэкIыр иджы зэрынэрылъа­гъум, абыхэм лъэпкъхэм я щэнхабзэ къулейр, щыIэкIэ-псэукIэр зэрызэщхьэщыкIыр къызэрагъэлъагъуэр. Калинин Виталий киношколхэм я гугъу щищIым къы­хигъэщащ абыхэм я фIыгъэкIэ щIыналъэхэм зэфIэкI ­щызиIэ IэщIагъэлIхэм гу зэры­лъатэнур, ауэ зэрырагъаджэ ­программэхэр егупсысауэ зэхэгъэувэн, щIалэгъуалэм щIэ­ныгъэ зыбгъэдэлъ егъэджакIуэ яIэн ­зэ­рыхуейр.
- КъэпщытакIуэ гупым хэтхэр къевгъэхьа фильмхэм тфIэгъэщIэгъуэну деплъащ. Лэжьыгъэхэм я фIагъыр къэплъытэну гугъут, кинематографие щIэныгъэр зэхуэдэкъыми. Ауэ лэжьыгъэхэр щIэщыгъуэ зыщIыр ахэр зэрызэмыщхьырщ, - жиIащ Калинин Виталий.
ГъуазджэхэмкIэ Кавказ Ищхъэрэ къэрал институтым и ректор Рахаев Анатолэ къытеувы­-Iащ зэфIэкI зиIэхэр къэгъэ­нэIуэнымкIэ, абы къекIуэлIахэр зэчэнджэщынымкIэ фестивалым мыхьэнэшхуэ зэриIэм, куэ­дым ар IэщIагъэм и лъагапIэм хуэзышэ Iэмал зэрахуэхъунум. 
КъБР-м и Парламентым и УнафэщIым и къуэдзэ Жанатаев Сэлим зэхыхьэм и хьэщIэхэм фIэхъус гуапэ яриха нэужь, къыхигъэщащ къэралым кинематографие къулей зэриIэр, псом хуэмыдэу щIалэгъуалэм я щIыналъэхэм теухуа лэжьыгъэ щIэ­щыгъуэхэр утыку къызэрырахьэр. Кинофестивалым хэтхэм ар ехъуэхъуащ зэIущIэ гукъинэж-хэр, щхьэпэхэр къехъулIэну, зэ­фIэкIрэ ехъулIэныгъэрэ яIэну. 
- ЩIыналъэ кином и зыужьы­ныгъэмрэ кинематографист ­щIалэгъуалэм ядэIэпыкъу-нымрэ Къэбэрдей-Балъкъэрым ­хэлъ­хьэныгъэ зэрыхуищIыфынум дрогушхуэ. Кинофестивалым хэт куэдым ар зэрахуэщ­хьэпэнум, я зэфIэкIхэр къы­зэ­рыщызэкъуахынум шэч къытесхьэркъым. Зэхыхьэр ди щIы­­налъэми зэрыщекIуэкIыр дэрэ­жэгъуэ къыдэзытщ, гуфIэ­гъуэщ, - жиIащ КъБР-м щэнхабзэмкIэ и министр Къумахуэ Мухьэдин. 
Зэхыхьэм ягу къыщагъэкIыжащ кинофестивалыр зэфIэувэным, абы зиужьыным зи зэфIэкI хэзылъхьахэм ящыщу ­дунейм ехыжахэр. Я цIэр къра­Iуащ КъБР-м ЩэнхабзэмкIэ и ­фондым, КъБР-м и Кинематографистхэм я зэгухьэныгъэм я унафэщIу щыта, КъБР-м и Журналистхэм я зэгухьэныгъэм  хэта, УФ-ми КъБР-ми щэнхабзэмкIэ щIыхь зиIэ я лэжьакIуэ, «НОТР» телеканалыр зея, «Кинокавказ» кинофестивалым и къэпщытакIуэ гупым хэта Вэ­рокъуэ Владимир, Къэбэрдей-Балъкъэр, Къэрэшей-Шэрджэс республикэхэм гъуазджэхэмкIэ щIыхь зиIэ я лэжьакIуэ, музыкант, профессор, лъэпкъыбэ зэпеуэхэм я лауреат Мыд Мадинэ, нэгъуэщIхэми. 
Кинофестивалыр къызэIуаха нэужь, япэу ягъэлъэгъуар Ко­лиев Анатолэ и «Семь чёрных ­бумаг» драмэ фильмырщ. Хэку зауэшхуэм теухуа, цIыхубэм я лIыхъужьыгъэр, шыIэныгъэр, хьэлэлагъыр къыщыгъэлъэгъуэжа лэжьыгъэр къазэрыщыхъуам тепсэлъыхьыжащ икIи абдеж фильмым хэта артистхэм щаIущIащ. 
ГъуазджэхэмкIэ Кавказ Ищхъэрэ къэрал институтым и студентхэм, республикэм и къэфакIуэ, уэрэджыIакIуэ, оркестр, ансамбль нэхъыфIхэм кино­фестивалым хэтхэмрэ абы къекIуэ­лIахэмрэ я нэгу зрагъэ­ужьащ. Балъкъэр Ипщэ къуа­жэм нобэ щагъэлъэпIэнущ абы хэтахэмрэ абы къыхэжа­ны­кIахэмрэ. 

ТЕКIУЖЬ Заретэ. 

Сурэтхэр
Къарей  Элинэ трихащ.