Къабарты-Малкъар къырал аграр университет Басхан шахарны 9-чу номерли орта школуну окъуучуларына кесини эшиклерин ачханды. Сабий къауум вузда студент жашау нечик къайнагъаны, анда кимге эмда къалай окъутханлары бла шагъырейленнгенди. Быллай жумушла университетни онгларын эмда жетишимлерин туура этедиле, деп билдиргендиле КъМКъАУ-дан.

Жаш къонакълагъа вузну устазлары аграр бёлюмню лекция отоуунда тюбеп, бийик билим бериу учрежденияны тарыхыны, жетишимлерини, къаллай усталыкълагъа кадрла хазырлагъанларыны эмда аны бошагъанла ишге къайда тохташыргъа боллукъларыны юсюнден кёп хапар айтхандыла.

Студентле не тюрлю жумушлагъа къатышыучуларына, аланы арасында юйретиу иш къалай бардырылгъанына да энчи эс бурулгъанды. Жаш тёлю политика эмда юйретиу иш жаны бла управленияны башчысы Гайыланы Жамиля школчулагъа студент биригиуле не бла кюрешгенлерин билдиргенди. Сора университетде болгъан кезиуде усталыкъ жаны бла къалай ёсерге боллугъуну, грант программалагъа, конкурслагъа, стажировкалагъа къатышыр амалланы юсюнден да айтханды. Шагъатха студентлени башламчылыкъларын эмда проектлерин да кёргюзтгенди.

Ызы бла къонакъла эки къауумгъа бёлюнюп, ветеринария эмда агрономия факультетледе болум бла шагъырейленнгендиле. Биринчисинде устазла Якушенко Ольга эмда Хосаланы Фатима алагъа анатомия эм микробиология лабораторияланы кёргюзтгендиле. Сабийле микроскоп бла стафилококк эм башха микроблагъа къарап, аланы ветеринария медицинада магъанасына тюшюннгендиле. Агрономия бёлюмде уа къонакълагъа нитратланы заранлыгъыны юсюнден хапарлап, кёгетледе эмда ашха жараулу ханслада ол затланы лабораторияда къалай излегенлерин билдиргендиле. Бу иш эл мюлк продукцияны таплыгъын эмда саулукъгъа къоркъуусузлугъун жалчытыуда бек магъаналы болгъаны баямды.

Ахырында школчулагъа вузну  бёлюмлерини юсюнден басма материалла юлешип, сыйлагъан да этип, алай ашыргъандыла.

Омарланы Мурат.