Тюнене «Нальчик» аэропортдан хаж къылыргъа атланнган муслийманланы биринчи къаууму учханды. Алгъаракълада КъМР-ни Муслийманларыны дин управлениясында болгъан брифингде бизге билдиргенлерича, Россейни, Сауд Аравияны жууаплы органлары бла  келишимле этилип, тийишли  тинтиуле бардырылып,  «Нальчик» аэропортдан Мединагъа тюзюнлей учаргъа эркин этилгенди. 
Ол тюбешиуге «Хадж Эльбрус» фирманы таматасы Къазакъланы Алхас Мединагъа тюзюнлей учууну   къыралда жаланда беш аэропорт къураргъа эркин болгъанларын айтхан эди: Москвада «Домодедово», «Махачкъала», «Къазан», «Сочи» эм «Нальчик». Аны бла байламлы бир-бир регионлада сыйлы жолгъа чыкъгъанлагъа чырмаула болгъандыла. Аны себепли Къырымны эмда Россейни ара кесегини муслийманларыны дин идаралары жолоучулагъа  болушургъа,  «Нальчикден» учаргъа себеплик этерлерин тилеген эдиле. 
Къабарты-Малкъарны оноучулары, жууаплы министерствола, Муслийманланы дин управлениясы дин къарындашларына болушур ючюн къолдан келгенни этгендиле. Алай бла сыйлы жолоучулукъгъа чыкъгъанлагъа къошакъ халда  беш рейс къуралгъанды. Тюнене уа аладан биринчи къауум Меккагъа атланнганды. 
 Аладан бирине  Къарачай-Черкесни Муслийманларыны дин управлениясыны хаж бла байламлы бёлюмюню башчысыны орунбасары Кубайланы Махмут  башчылыкъ этеди. Ол айтханыча, бу жол  49 адам тебирегенди, аланы арасында 80 жыл бола келген  таматала, жаш адамла да бардыла. 
– Жюрегим учунупду,  бир-эки сагъатдан Мединада къонарыкъбыз. Биз Аллахны борчун толтурургъа, бу сыйлы жерлеге барыргъа онг болурун ашыгъып сакълагъанбыз. Битеу къурау жумушла алгъадан толтурулгъандыла. Бюгюн Мединагъа учханыбыз ючюн а къарындаш Къабарты-Малкъарны оноучуларына, республиканы муфтийи Хазраталий Дзасежевге эмда «Хадж Эльбрусну» башчысы Къазакъланы Алхасха бла фирманы келечилерине муслийманланы атларындан ыразылыгъымы билдирирге сюеме. Ала къурау жумушланы бийик даражада толтургъанларына  тюшюннгенбиз, – дегенди ол.
Меккада уа бу кюнледе дунияны битеу жерлеринден муслийманла жыйыладыла. Ала кеслери, жууукълары бла бирге туугъан журтлары ючюн да тилекле этерикдиле.   
– Дин къарындашларыбыз ючюн тилек этмесек, бизни жолоучулугъубуз къабыл болмай къаллыкъды. Кавказ бизни барыбызны да юйюбюздю, Россей – туугъан журтубуз. Битеу муслийманлагъа Аллахуталадан тынчлыкъ, ырахматлыкъ, мамырлыкъ тилерикме,– дегенди ол.
Къабарты-Малкъаргъа   быйыл 400 квота берилгенди, ала барысы да толтурулгъандыла. «Джазира» халкъла аралы авиакомпания бла республикадан хаж къылыугъа чыкъгъан къауумланы самолёт бла элтиуню юсюнден келишим былтыр октябрьде этилгенди. Жолоучулагъа шёндюгю самолётла бёлюннгендиле. Биринчилери жолгъа  19 майда чыгъарыкъдыла, ызы бла 21 майда эки самолёт учарыкъды. Артха 4,5,6 июньда къайтырыкъдыла.

Тикаланы Фатима.