Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и бжэхэр махуитIкIэ яхузэIуихащ школыр мы гъэм къэзыух ныбжьыщIэхэм.
Класс нэхъыжьхэм щIэсхэр еджапIэ нэхъыщхьэм и институт псоми щыIащ, Медицинэ академием кIуащ, егъэджакIуэхэр зрагъэцIыхуащ, университетым и программэхэм теухуауэ куэд зрагъэщIащ.
Абы къыкIэлъыкIуэу университетым зыщаплъыхьащ курыт IэщIагъэ щрагъэгъуэт программэхэмкIэ абы и колледжхэм щеджэну зи мурад ебгъуанэ классым щIэсхэм.
Профориентацэ лэжьыгъэмкIэ къудамэм и унафэщI Тхьэзэплъ ФатIимэ къызэрыхигъэщамкIэ, мыгувэу абитуриент хъунухэм университетым и студентхэр зэрыпсэур, я щIэныгъэми, Iэзагъми, къэухьми зэрызиужьыр я нэкIэ ялъагъун папщIэ къызэрагъэпэщащ Iуэхур. Гукъыдэж зыщIахэр апхуэдизкIэ куэдти, ныбжьыщIэхэм папщIэ иджыри зы махуэ дыщIагъуащ.
«Бжэ зэIухахэм я махуэхэм» кърихьэлIа школакIуэхэм я бжыгъэр мы гъэм зэрынэхъыбэр къыхагъэщащ къызэгъэпэщакIуэхэм. МахуитIым къриубыдэу университетым щыIащ 9-нэ, 11-нэ классхэм щеджэ цIыху 1600-м нэблагъэ.
- КъБКъУ-м абитуриент хъунухэм яхуигъэлъэгъуэн иIэщ. Университетыр IэщIагъэ нэхъыщхьэмрэ курытымрэ ныбжьыщIэхэм ябгъэдилъхьэн папщIэ зыхуеинухэмкIэ къызэгъэпэщащ. Хэхауэ къыхэгъэщыпхъэщ университетым щIэныгъэ центр лъэщ зэриIэр, студентхэм къэхутэныгъэ Iуэхухэр ирагъэкIуэкIыну, технологиещIэхэм елэжьыну Iэмал гъуэзэджэ зэрыратыр.
ЕджапIэ нэхъыщхьэм щызэтраухуащ студентхэм сыт и лъэныкъуэкIи заужьын пап-щIэ Iэмалхэр - академическэ егъэджэныгъэм къыщыщIэдзауэ жылагъуэм щыжыджэру гъэсэным нэс. ЩIэныгъэ гупжьейхэр, спорт секцэхэр, творческэ зэгухьэныгъэхэр хэтщ абы. Нэхъыщхьэращи, КъБКъУ-р къэзыухахэм лэжьыгъэ и лъэныкъуэкIэ щIэупщIэ яIэщ икIи я зэфIэкIыр IэнатIэ зэмылIэужьыгъуэхэм ехъулIэныгъэхэр яIэу къыщагъэлъагъуэ», - къыхигъэщащ Тхьэзэплъ ФатIимэ.
Абы зэрыжиIэмкIэ, класс нэхъыжьхэм щIэсхэм псом хуэмыдэу ягу ирохь медицинэм, стоматологием, юриспруденцэм еп-ха унэтIыныгъэхэр. Апхуэдэу педагогикэ, инженер-техникэ IэщIагъэхэм, ухуэныгъэм, архитектурэм, IT-м, туризмэм хуащI гулъытэм хохъуэ.
ШколакIуэхэр хуабжьу яфIэгъэщIэгъуэну кIэлъыплъащ университетым щекIуэкI гъащIэм, егъэджакIуэхэмрэ студентхэмрэ упщIэхэр иратащ, еджэным и мызакъуэу, дэзыхьэх Iуэхугъуэхэри зэрыщагъуэтынум зэрыщыгуфIыкIыр нэрылъагъуу.
Нарткъалэ дэт лицей №1-м и 9-нэ классыр мы гъэм къэзыух КIэш Нурсанэ зэкIэ игу дыхьэр дизайнер IэщIагъэрщ, ауэ филолог хъуну мураду зыхуигъэувыжащ.
«Ебгъуанэ классым сыкъыщIэкIыну щытамэ, КъБКъУ-м ДизайнымкIэ и колледжым сыщIэтIысхьэнут, шэч хэмылъу, ауэ 11-нэр къэзухыу Социальнэ-гуманитар институтым сыщеджэну мурад сщIащ. Апхуэдэ гупсысэхэр сиIэти, ДизайнымкIэ колледжри зэзгъэлъэгъуащ, студентхэр зыхурагъасэхэмрэ зыхурагъаджэхэмрэ гурыIуэгъуафIэ дыдэу къыджаIащ, дагъэлъэгъуащ. СГИ-ми сыщыIащ. Университетыр егъэлеяуэ ин гуэ-ру къысщыхъурти, ди школыщIэм езгъэщхьащ. Абы и институтхэмрэ колледжхэмрэ унэ щхьэхуэ-щхьэхуэу Налшык зэрыдэтыр иджы къэсщIауэ аращ.
Къапщтэмэ, студент гъащIэм уехъуэпсэн хуэдэу, егъэджэныгъэр зэрыщекIуэкIым удихьэхын хуэдэу ухуащ КъБКъУ-р, школым фIыуэ ущеджэмэ, ужыджэрмэ, университетым Iэмалу къуимыт щыIэкъым, лъэныкъуэ куэдкIэ зыщыбужьыфынущ. Лицейр къэзухмэ, Къэбэрдей-Балъкъэр къэрал университетращ сыщеджэнур, абы тезухуащ», - къыджиIащ Нурсанэ.
А лицейм и еджакIуэ Балъкъэр Динарэ жиIащ стоматолог хъуну зэрыщIэхъуэпсыр. «Экзаменхэм щIэгъэхуэбжьауэ зыхузогъэхьэзыр, химиемрэ биологиер нэхъ хэкъузауэ содж. ФIыщIэ яхузощI КъБКъУ-м дыкъакIуэу, псори ди нэкIэ зэдгъэлъагъуну Iэмал къытхузэзыгъэпэщахэм. Мыр хуабжьу сэбэп къытхуэхъунущ дызыхуэпабгъэ лъагъуэм дытеувэнымкIэ», - къыддэгуэшащ Динарэ.
Налшык дэт школ №9-м къикIа Куляш Дарье психолог хъуну и мурадщ. ЕГЭ-р ехъулIэныгъэкIэ итын папщIэ дерс гуэдзэхэм макIуэ, балл лъагэхэр къихьынри и хъуэпсапIэщ. «Курыт школым щIэныгъэ хъарзынэ щызэзгъэгъуэтащи, КъБКъУ-м сыщIэтIысхьэфыну сыщогугъ», - жиIащ Дарье.
Абы и ныбжьэгъу Урысмамбэт ФатIимэ и гъащIэр медицинэм ирипхыну и мурадщ, абыи экзаменхэм жыджэру зыхуегъэхьэ-зыр.
«ХирургыфI сыхъуну сыхуейщ, ар зэзгъэхъулIэн папщIэ схузэфIэкI къэзгъэнэнукъым», - жеIэ ФатIимэ.
«Бжэ зэIухахэм я махуэхэр» школакIуэхэм сэбэп яхуохъу КъБКъУ-м къызэригъэпэщ Iэмалхэр зыхуэдэр абитуриентхэм нэхъыфIу къащIэнымкIэ, ныбжьыщIэхэм егъэджакIуэхэр зрагъэцIыхунымкIэ, университетым и иджырей лэжьэкIэр ялъагъунымкIэ, студент гъащIэм и зэхэлъыкIэр зыхащIэнымкIэ.
Тхыгъэри сурэтри ШэрIужь Даянэ ейщ.
