Хэку зауэшхуэм ТекIуэныгъэ Иныр къызэрыщытхьар зэрыдгъэлъапIэм и щIыхькIэ, тхыдэдж, тхакIуэ, жылагъуэ лэжьакIуэ УФ-м и тхакIуэхэм и Журналистхэм я зэгухьэныгъэхэм хэт, КъБР-м щэнхабзэмкIэ щIыхь зиIэ и лэжьакIуэ Опрышкэ Олег ирагъэблэ­гъащ Кулиевым и уэрамым тет япэ модельнэ библиоте­кэм. Ар яIущIащ Про­мыш­ленность псынщIэмкIэ кол­леджым и студентхэм. 

Опрышкэ Олег и гукъэ­кIыжхэм дихьэхауэ едэIуащ ныб­жьыщIэхэр. Нэхъыжьыр тепсэлъыхьащ и сабиигъуэм щыщу Нартан къуажэм щигъэкIуа зэманым, Тырныауз дэт курыт еджапIэм щыщIэса илъэс­хэм, Москва тхыдэ-архив институ­тым зэрыщыщеджам. Псом хуэмыдэжу щIалэгъуа­лэм щIэ­щыгъуэ ящыхъуащ тхыдэджым Къэбэрдей-Балъкъэрым и бгы­лъэ щIыпIэхэм археологие лэ­жьыгъэхэр зэрыщ­ригъэ­кIуэ­кIам и хъыбарыр. 
КъБР-м и жылагъуэ палатэм, УФ-м и ТхакIуэхэм я зэгухьэныгъэм хэт Котляровхэ Мариерэ Викторрэ я тхылъ тедзапIэм и унафэщI Котляровэ Марие ныбжьыщIэхэм яжриIащ тхылъ еджэным нэхъ къалэн нэхъыщхьэ абыхэм я студенты­гъуэм зэрыхэмытыр, Опрышкэ Олег и лэжьыгъэ купщIафIэхэм я мыхьэнэр нэсу къагурыIуэн папщIэ щIэныгъэм лъагъуэ ­хухашын зэрыхуейр. 
«ДыгъафIэ къалэ» акаде­мием и «Альтернатива» сабий творческэ гупым и унафэщI Жамбэч Маритэрэ абы и гъэсэн Темыркъан Аланэрэ Опрышкэ Олег тыгъэ хуащIащ езыхэм ящIа хьэпшыпыр. Аланэ зэ­IущIэм къыщеджащ хэку ­за­­уэш­хуэм теухуа усэ. 
- Ди лъахэм теухуа гупсысэ нэхухэм я лъагъуэм сыте­хьэ­нымкIэ къысхуэщхьэпащ Опрышкэ Олег и тхылъхэр. Къыхэгъэщыпхъэщ Хэку зауэшхуэм теухуа лэжьыгъэшхуэхэм тхы­дэджым и къэхутэныгъэхэм увы­пIэ щхьэхуэ зэрыщаубыдыр. ЛIыхъужьхэм я цIэ­хэр, тхыдэ дэфтэрхэр, зэ­хэуэхэм ятеу­хуа гупсысэхэр - Iуэхугъуэ куэдым ущагъэ­гъуазэ абыхэм, - жиIащ ­ОНФ-м и щIыналъэ штабым хэт Тхьэмокъуэ Анзор. 
НыбжьыщIэхэм гукъинэж ящыхъуащ зэIущIэр. ХьэщIэм и гъащIэм, и лэжьыгъэхэм, ар­хеологие къэхутэныгъэхэм, щIэ­ныгъэм и гъуэгум узэры­техьэнум - куэдым щIэупщIащ щIалэгъуалэр. Опрышкэ Олег абыхэм яжриIэжа хъыбархэр, ярита чэнджэщхэр, къахуихьа щапхъэхэр игъащIэкIэ я гум илъынущ, шэч хэмылъу. 

НАФIЭДЗ Людэ.