Кёп болмай Къабарты-Малкъар къырал аграр университетде «Фермерни школу» битеуроссей билим бериу проектни онючюнчю кесегине къатышханла бла тюбешиу болгъанды. Анга чакъырылгъан сыйлы къонакъланы араларында Россельхозбанкны республикада бёлюмюню таматасы Алим Сокуров, Монополиягъа къажау федерал службаны КъМР-де управлениясыны башчысы Анна Кумахова, эл мюлк эм экономиканы айнытыу министрлерини орунбасарлары Чеченланы Ислам бла Ольга Белецкая, «Ата журтну къоруулаучулары» фондну регион бёлюмюню таматасы Муаед Дадов да болгъандыла. 
Жыйылыуну ача, Къабарты-Малкъар къырал аграр университетни ректору Заурби Шхагапсоев бюгюнлюкде битеуроссей билим бериу проектни регионлагъа магъанасы бек уллу болгъанын белгилегенди. 
- Бусагъатда жерчилик бла байламлы бёлюмге оноу этиу, шёндюгю амалланы хайырланыу эм маркетинг жаны бла да терен билимлери болгъан специалистле керекдиле. Быллай проект а регионну эл мюлкюню айныууна ахшы къошумчулукъ этеди,- дегенди Заурби Лёлевич. 
Бу жол курсланы кезиуюнде 32 адам терек бахчачылыкъ, сютлю эмда этли малчылыкъ жаны бла усталыкълагъа юйренирикдиле. Аладан 16 инсан а энчи аскер операцияны ветеранларыдыла. Ала мюлк бла байламлы кёп тюрлю ишледен билимлерин кючлерикдиле, ол санда агробизнесден, агротехнологияладан, фермер мюлкле бла байламлы праводан, стратегиялы маркетингден, финансладан да. 
Алим Сокуров, КъМКъАУ-да ишлеген «Фермерни школу» проектни къыйматлылыгъын белгилей, озгъан жылны эсеплерине кёре, Къабарты-Малкъар Россейде эм жетишимлиледен бирине саналгъанын эм юч алчы регионну тизмесине киргенин да билдиргенди. 
Эсге сала айтсакъ, бу проектни университет Россельхозбанк бла бирге бардыргъанлы тёрт жыл болады. Бюгюнлюкде бизни республика бла бирге бу проектге 38 регион къатышадыла. Барында да окъугъанланы саны жюзле бла саналады. Алагъа 150 сагъатны ичинде билим берилликди, энтта да жюз сагъат сынам ишлеге бёлюнюрюкдю. Курсну болжалы эки бла жарым ай болады.

Магометланы 
Сулейман.