КъМР-ни прокуратурасында право низамны сакълаучу органланы къуллукъчуларыны аманлыкъчылыкъгъа къажау соруула жаны бла координация кенгешлери болгъанды. Аны надзор органны таматасы Николай Хабаров бардыргъанды. Жыйылыугъа УФСБ-ны, Ич ишле министерствону, РФ-ни СК-сыны следствие управлениясыны, ФСБ-ны Чекчи управлениясыны, УФСИН-ни келечилери, шахарланы бла районланы прокурорлары чакъырылгъандыла. 

Сёз наркотиклени, психотроп затланы, башха ууланы законсуз сатыу-алыу бла байламлы аманлыкъланы тинтиуню игилендириуню юсюнден баргъанды. 
- Наркотиклени законсуз сатыу-алыу жаны бла болум къыйынлай къалады. Медицина учреждениялада эсепде 2234 адам турадыла, ол санда 7-си акъылбалыкъ болмагъанладыла. Былтыр эсепге алыннган аманлыкъланы саны 0,8 процентге ёсгенди – 1435 аманлыкъ. Аланы асламы – 994 кезиу – информация-телекоммуникация технологияланы хайырланып этилгенлери жарсытады. Ол а аманлыкъла дистанциялы амалгъа кёчгенлерин кёргюзтеди. Аны эсге алып, наркотикле бла байламлы аманлыкъчылыкъгъа къажау ишни тюрлендирирге керекди,-дегенди прокурор.
Кенгешде сюзюлген соруула бла байламлы тийишли бегимле чыгъарылгъандыла. Алада дистанциялы халда этилген аманлыкъланы тинтиуню жангыртыргъа, ведомстволаны араларында байламлыкъланы кючлерге, криптовалюта сатылгъан жерлени ачыкълау ишни къатыландырыргъа кереклиси белгиленнгенди. Право низамны  сакълаучу органлагъа башха шарт борчла салыннгандыла.
Тикаланы Фатима 
хазырлагъанды.