КъМР-ни Башчысы Казбек Коков «Радуга» сабий реабилитация арада бардырыла тургъан уллу жангыртыу ишле бла шагъырейленнгенди, деп билдириледи республиканы оноучусуну MAX-да энчи каналында.
Эсигизге салайым, сабийлеге деп ишленнген быллай аламат ара Шимал Кавказда бир жерде да жокъду. Бюгюнлюкде да бу арагъа сурам уллуду, жыл сайын мында кёп заманны багъаргъа керекли эм тюрлю-тюрлю ауруулары болгъан юч мингден аслам сабий медицина болушлукъ табадыла эм социал жаны бла реабилитацияны да ётедиле. Мында бийик квалификациялары болгъан специалистле урунадыла. Хар сабийге ала энчи къарайдыла, ол санда, атха минип жюрюу, тренажёрла бла багъыу, терк эм акъырын жюрюу амалланы да хайырланадыла. Андан сора да, Тамбукан кёлден келтирилген балчыкъны ток бла къыздырып, процедурала этедиле. Озгъан жылда мында аквапарк ачылгъанды, анда сабийлени азот-жылы дарман суула бла багъадыла.
Бу ара ачылгъанлы 30 жыл атлагъанды, сёзсюз, андан бери аны толусунлай жангыртыу керек болуп тура эди. Ремонт ишле «Инсанлагъа онгла къурау» къырал программагъа кёре бардырыладыла. Къурулуш ишлеге деп федерал бюджетден 186 миллион сом, республикалы бюджетден 9,7 миллион сом бёлюннгенди. Белгиленнгеннге кёре, сабийле жатхан мекямгъа алтынчы къат къошарыкъдыла, аны хайырындан 50 жатхан жер аслам боллукъду. Бюгюнлюкде ара бир ызгъа 230 сабийни алыргъа боллукъду. Жангыртыу бошалса, онгла мында бютюнда игиленирикдиле.
«Радуга» реабилитация араны толусунлай жангыртыу юйлеринде ауругъан сабийлери болгъанланы тийишлисича багъаргъа алгъа бир магъаналы атламды, деп айтылады билдириуде.
