Арт заманда миллет тиллени окъутургъа аслам эс бурулады. Аны алайлыгъы мектепледе бегирек эсленеди. Дерслени тынгылы бардырырча тап жарашдырылгъан окъуу китапла, интерактив къангала бардыла. Сынаулары болгъан устазла, бар амалланы хайырлана, ёсюп келген тёлю терен билим алырча, къолларындан келгенни аямайдыла. 
Биттирланы Рахима бла, Таукенланы Зоя  Акъ-Сууну школунда орус тилден бла адабиятдан дерсле бередиле. Сынамлы устазла малкъар эм орус жазыучуланы, аланы чыгъармаларын иги билирча, дерслеге, андан тышында ишге да кёп къыйын саладыла.
Созайланы Асият а малкъар тилден бла адабиятдан дерсле береди. Сурат алыннган кюн ол поэтле Бегийланы Абдуллахны бла Ахматланы Любаны чыгъармаларыны юсюнден дерсни бардыра тура эди. Мектепде 36 жыл ишлеген устаз таулу сабийле ёз тиллеринде уста сёлешалмагъанларына жарсыйды. Окъуучула малкъар тилни иги билир ючюн, ол да къолдан келгенни аямайды, дерслеринде «Заман» газетни, «Минги -Тау», «Нюр» журналланы да хайырланады.

Суратланы Мамайланы Алий алгъанды.