Кавказ инвестиция форумну экинчи кюнюнде КъМР-ни Башчысы Казбек Коков «Бусагъатдагъы жигитле  – тамблагъы кадрла» деген секцияны ишине къатышханды.

Экспертле эмда къырал къуллукъчула СВО-гъа къатышханланы иш бла жалчытыуну эмда аланы мамыр жашаугъа къайтарыуну онгларын сюзгендиле. Аллай инсанланы жангыдан окъутууну, бу ишде тюбеген чырмауланы эмда кемчиликлени кетериу амалланы юслеринден да сёлешгендиле.
Ишчи программаны магъаналы кесеги тыш байламлыкъланы кючлеуге эмда Къабарты-Малкъаргъа инвестицияла кёп санда келирча этиуге жораланнган келишимлеге къол салыугъа жораланнганды. Биринчиден, Минскни (Беларусь) Партизан району эмда Абхазияны Сухум шахары бла шуёхлукъ байламлыкъла къурауну юсюнден келишимлеге къол салыннганды. 
Ызы бла уа ишчи келишимлени асламысы регионну туризм бёлюмюн айнытыугъа жораланнганды. Алай бла, Нальчикде «Озон» отель «Нальчик» ООО бла 5-жулдузлу эмда «Графен» ООО бла къонакъ юйле ишлеуню юсюнден келишимле къабыл  этилгендиле. Дагъыда «София» ООО бла Нальчикде сау жыл узуну ишлерик санатор-саулукъландырыу комплекс къурауну юсюнден келишимге къол салыннганды. Инвестиция пакетни чеклеринде «ЭКО КУРОРТ» АО бла мультикластер  курорт къурау эмда «А-Сервис» ООО бла Нальчикни курорт тийресинде дарман суула эмда балчыкъ бла багъыу жерни аягъы юсюне салыу жаны бла келишимле этилгендиле. Бу башламчылыкъла барысы да инфраструктураны тынгылы жангыртыугъа эмда регионну туризм бёлюмюн айнытыугъа жораланнгандыла.
Форумну ингирги программасы «Губернатор бла ушакъ: Битеу эс Кавказгъа» деген тюбешиу бла бардырылгъанды. Анда Казбек Коков  жыйылгъанлагъа Къабарты-Малкъарны инвестиция онглары бла шагъырейлендиргенди, федерал эксперт къауум, бизнесменле да аны сюзюуге тири къатышхандыла. Сессия башланырдан алгъа, КъМР-ни Башчысы регионну кёрмючю бла тынгылы шагъырейленнгенди, анда бизнесни кесине тартырыкъ уллу проектлеге да къарагъанды. Республикалы эмда федерал  журналистле бла ушакъ этген кезиуде Казбек Коков форумда къол салыннган проектлени битеу багъасы Къабарты-Малкъаргъа ары дери болмагъанча аллай уллу – 466 миллиард сом – болгъанын чертгенди. Бу презентацияны баш магъанасы «Нальчик» курорт болгъанын да айтханды. Юч эмда бешжулдузлу къонакъ юйлени эмда санатор-курорт объектлени ишлеу 12 минг жангы ишчи жер берликди. Туристлени саны кёп болуру да сакъланады: озгъан жыл республикада 156 минг адам саулукъларына къаратхандыла. Бу кёрюмдюню 250 мингнге жетдирирге умут барды.
КъМР-ни Башчысы Кавказ инвестиция форум бизни республикагъа бек хайырлы болгъанын чертгенди. «Аны болушлугъу бла быйылгъа дери эл мюлкде, кёгет эмда жемиш продукцияны логистикасында, дагъыда жемиш сакълаучу жерле ишлеуде бир миллиард сомдан асламгъа проектле толтурулгъан эселе, бусагъатдагъы 466 миллиард сомгъа жетген умутла ахыр 8 жылны ичинде регионнга болмагъанча аллай уллу кёрюмдюдю. Форумну даражасыны ёсе баргъаны бизнес Кавказгъа тири айнып келген жергеча къарагъанын туура этеди, дегенди ол.

Улбашланы Мурат.