Баш кюн Нальчикде Гуманитар-техника колледжде «Абилимпикс 2026» регион чемпионат къууанчлы халда ачылгъанды. Анга къатышханланы, хар замандача, РФ-ни жарыкъландырыу министри Сергей Кравцов алгъышлагъанды. 
- Алгъан билимигиз, усталыгъыгъыз да мындан ары да сизге хайырлы боллугъуна ийнанама. Анга уа «Абилимпикс» къымылдаугъа къатышханланы 93 проценти ишсиз къалмагъанлары да шагъатлыкъ этеди», - деп, ол юйретиучюлеге бла устазлагъа жюрек ыразылыгъын билдиргенди.
Чемпионат «Россей - онгланы къыралы» президент платформаны эмда Россейни Жарыкъландырыу министерствосуну себепликлери бла къуралады.
- Быйыл ол экинчи онжыллыкъгъа жол ачады. Россейде бу къымылдау бек уллуладан бири болгъанын да белгилерге тийишлиди. Саулукълары бла байламлы чекленнген онглары болгъанла, профессионал усталыкъла алып, жашауда кеслерине жер табадыла.  «Абилимпикс» алагъа себеплик этеди. Ол, бош эришиуле болуп къалмай,  адамлагъа социал жаны бла таянчакълыкъ этеди. Хунерли, итиниулю да жашла бла къызла  чемпионатны хар тапкасындан жетишимли ётгенлерине биз ёхтемлик  бла къарайбыз. Ала уллу устала болуп ёсгенлерин дайым да кёребиз. Аланы кёллендирген а бу чемпионатды,- дегенди «Россей - онгланы къыралы» президент платформаны генеральный директору, «Сенеж»  Управленияны мастерскоюну ректору Андрей Бетин да.
- Быйыл чемпионат «Хар хорлам да муратдан башланады» деген ниет бла бардырылады. Аны  компетенцияларыны саны  аслам бола барадыла. Ол а  чемпионат кёплеге хайырлы болгъанын кёргюзтеди, - дегенди «Абилимпикс» миллет араны башчысы Дина Макеева. Ол, эришиулеге къатышханлагъа жетишимле тежей: «Эсигизде болсун: эм башы хорламлы болуу угъай, чемпионатха къатышыуду», - деп къошханды.
КъМР-ни жарыкъландырыу эм илму министри, «Абилимпикс» регион комитетни таматасы Анзор Езаов Къабарты-Малкъарны быллай магъаналы эмда керекли ишге къатышханы ёхтемленирча шарт болгъанын чертгенди. «Регионда чемпионатны бардырыу саулукълары бла байламлы чекленнген онглары болгъан  адамлагъа артыкъда магъаналыды. Алагъа тюнгюлмезге, хунерликлерине кёре усталыкъ сайларгъа, аны башхалагъа кёргюзтюрге да себеплик этген майданды», - дегенди. 
Эришиуле юч кюнню  барлыкъдыла. Аланы баш майданы КъМР-ни гуманитар-техника  колледжиди. Алагъа 130 адам жыйырма алты компетенцияда къатышадыла: «Пиццаны хазырлау жаны бла уста», «Сетевой эмда системалы администрирование», «Тигиучю», «Жыр уста», «Медицина эмда социал жумушла», «Администрирование», «Школгъа дери юйретиу», «Искусство» эмда башхала.
Бу жол алагъа жангылары да къошулгъандыла. Аланы араларында «Пилотсуз аппаратланы учуруу» да барды. Анга уа асламында энчи аскер операцияны ветеранлары къатышадыла.
Чемпионатха къатышханлагъа 12 насийхатчы болушурукъду, усталыкъларына уа жюз эксперт багъа берликди. 
Эришиулеге къатышханлагъа  ишчи, маданият, спорт, усталыкъ сайлай билиу жаны бла да программала  къуралгъандыла. Алада  мастер-классла, семинарла, тренингле, предпринимательлик хунерлени къозгъау, энчи иели ишни ачыу дегенча мадарла къураллыкъдыла. Сёзсюз, иш сайлау жаны бла ярмарка, тюрлю-тюрлю кёрмючле да боллукъдула. 
Регион эришиуледе хорлагъанла «Абилимпиксни» быйыл октябрьде Москвада бардырыллыкъ миллет чемпионатына къатышырыкъдыла. Анда хорлагъанлагъа сертификатла берилликдиле. Ала бла уа билимни андан ары ёсдюрюрге неда саулукъну кючлерге керекли техниканы сатып алыргъа боллукъду.
Чемпионатны КъМР-ни Жарыкъландырыу эмда илму министерствосу, «Абилимпикс» къымылдауну регион арасы, Къабарты-Малкъарны гуманитар-техника колледжи, «Россей-амалланы къыралы» Президент платформа къурап бардырадыла. 

Холаланы Марзият