Жыл сайын Малкъар халкъны политика репрессиялагъа тюшгенлерин эсгериу мемориалда тюрлю-тюрлю номинациялада «Пока нам хватит силы быть людьми, мы на земле останемся народом» – Мечиланы Кязимге, «Мы горской песни два крыла: Алим – Къайсын» деп, Къулийланы Къайсыннга бла Алим Кешоковха аталгъан эришиуле барадыла. Бу кюнледе Долинск тийресинде Курорт залда былтыр ол эришиулеге къатышханланы араларында хорлагъан сабийлени саугъалау баргъанды. Назму окъугъандан сора да, сабийле шайырланы чыгъармаларында айтылгъан сюжет ызлагъа сурат этгендиле, агъач, таш, салам, жюн, башха не тюрлю затны да хайырланып, къоллары бла тюрлю-тюрлю затла ишлегендиле. Аладан бек сейири уа Шыкъыда Кязим жашагъан юйню тюз да болгъаныча этилген юлгюсюдю.
Жыл сайын болуучусуча, ол байрам Россейни эм Къабарты-Малкъарны байракъларын кётюрюу бла эмда къырал гимн бла башланнганды. Анга ары жыйылгъанла сюелип тынгылагъандыла.
Къууанчлы жыйылыуну бу проектни автору, мемориалны директору Теммоланы Фаризат ачханды. Ол, ары келгенлени – сабийлени, аланы ата-аналарын, устазланы, сыйлы къонакъланы да – бу байрам бла алгъышлап, барысына да мамыр кёкню тюбюнде ариу жашау тежегенди.
Ызы бла Фаризат Ибрагимовна бара тургъан жылны къыралыбызны Президенти Владимир Путин Россейде халкъланы бирликлерине атагъанын, былтыр а ол Уллу Хорламны 80-жыллыгъына эмда Ата журтну къоруулаучуну жылына аталгъанын эсгертгенди.
– Бизни ата-бабаларыбыз фашизмни тюрлюлери бла кюрешде жан-къан аямай келтирген хорламла аланы болдургъанланы атларын ёмюрлюк этгендиле. Аланы эсгере, жангы тёлюле Ата журтларын сюерге юйренедиле, аны къорууларгъа керек сагъатда ал тизгинлеге турадыла. Бюгюн энчи аскер операцияны барыуунда бизни кёп миллетли къыралыбызны азатлыгъын, мамыр жашауубузну, бирлигибизни эм келишиулюгюбюзню, ана тилибизни бла маданиятыбызны сакълау тынч келмегенин кёрюп турабыз. Ол сыйлы затла ючюн бюгюн да жан бередиле игилерибиз. Жигитлени эсгерейик, – дегенди ол.
Ол сёзледен сора залда болгъанла, ёрге къобуп, Ата журт урушда фашизмни хорлагъан жигит ата-бабаларыбызгъа эмда бюгюнледе СВО-да къыралыбызны сейирлерин къоруулай, жангы фашизм бла уруш эте, къан тёкгенлеге сый бергендиле.
Келгенле аламат концерт программагъа къарагъандыла. «Рирара» деген жыр студия быллай тюбешиуледе дайым да жетишимлерин кёргюзтгенлей турады. Ол кюн да ары жюрюген Аслан бла Ирина Лиева юйретген жашла бла къызла Ата журтубуз Россейге, Ата журт урушда, СВО-да да жигитлерибизге аталгъан иги кесек жыр айтып къууандыргъандыла къараучуланы.
Тепсеулери бла байрамгъа къууанч къошханланы араларында Сотталаны Къаншау атлы «Эльбрус» сабий тепсеу юлгюлю ансамбль болгъанды.
Концерт программадан сора тепсеучю къызла бла жашла да сахнада тура, сёз назмучу, жазыучу, журналист Мусукаланы Сакинатха берилгенди. Ол, тепсегенлеге ыразылыгъын билдирип, ансамбль къаллай аламат адамны атын жюрютгенин эсгертип, Сотталаны Хаждауутну жашы Къаншауну жашау жолундан сабийле юлгю алырча хапар айтханды. «Къаншауну бир таныгъан адамгъа аны кёлден кетерир онг жокъду, аллай бир таза ниетли, халал адам эди ол. Аны ким да сюе эди. Тепсеу санатха кёп сынауладан сора келип, ол «КъМАССР-ни халкъ артисти» деген сыйлы даражагъа тийишли болгъанды. Сиз да, аны сыйлы атына тийишли болуп, аныча къанатлы, уста тепсеп, къараучуланы къууандыргъан, жетишимли адамла болуп ёсюгюз», – деп, алгъыш этгенди ол.
Ызы бла ол «Эльбрус» ансамбльде тепсеген жашлагъа бла къызлагъа, Герменчикден, Шалушкадан, Чегем шахардан келген, эришиуледе хорламлы болгъан сабийлеге махтау къагъытла бергенди.
Дагъыда сахнада школланы, гимназияланы, прогимназияланы, лицейлени, окъуу араланы окъуучуларын саугъалагъандыла. Аланы ёсдюргенлеге, юйретгенлеге ыразылыкъларын айтхандыла, жангы хорламла тежегендиле.
Кертиланы Сакинат
