«Правительствэм хухах сыхьэтым» хыхьэу, респуб­ликэм и хабзэубзыху IуэхущIапIэм и Президиумым и зэIущIэм щытепсэлъыхьащ «Къэралым и технологие зыужьыныгъэмрэ бжыгъэ­хэр зи лъабжьэ экономикэрэ» лъэпкъ Iуэхур Къэбэрдей-Балъкъэрым зэрыщагъэзащIэм.

ЗэIущIэр къыщызэIуихым, КъБР-м и Парламентым и УнафэщI Егоровэ Татьянэ къыхигъэщащ къаIэта Iуэхур УФ-м и Президентым «2030 гъэ пщIондэ УФ-м зегъэу­жьынымкIэ мурадхэмрэ 2036 гъэ хъуху къапэщылъымрэ теухуауэ» къыдигъэкIа унафэм къыщыгъэлъэгъуахэр зэгъэхъулIэным зэрыхуэунэтIар.
- Проектыр «Бжыгъэ экономикэ» лъэпкъ Iуэхум къыпы­зыщэщ. Ари сэбэп хуэхъуат ди экономикэм, цIыхухэм я псэукIэм зезыгъэужь IэнатIэ нэхъыщхьэхэм бжыгъэхэр я лъабжьэ щIыным, къэралымрэ хьэрычэт Iуэхумрэ зэрызэдэлажьэр егъэфIэ­кIуэным, ИнтернеткIэ къызэгъэпэщыным, къэрал Iуэхутхьэбзэ куэд электроннэу цIыхухэм яIэрыгъэхьэным теу­хуауэ, - жиIащ Егоровэм.
Абы къызэхуэсахэм ягу къигъэкIыжащ КъБР-м и Iэтащхьэ КIуэкIуэ Казбек КъБР-м и Парламентым илъэс къэс Зэрызыхуигъазэм къызэры­щыхигъэщар щIыналъэхэм бжыгъэм тещIыхьа экономикэм зэрызыщрагъэужьыр къыщапщытам республикэр увыпIэ 20-кIэ къызэрыдэкIуэтеяр. 
- Ди мурадыр зыIэрыдгъэхьа лъагапIэр тIыгъын къудейракъым, атIэ къэухь Iэ­рыщIымрэ бжыгъэ технологиехэмрэ ятеухуауэ зыужьыныгъэшхуэ зыIэрыдгъэхьэнырщ, - пищащ къэпсэлъам. - Парламентым гулъытэ хэха хуещI республикэм и бжыгъэ зыужьыныгъэм. Абы и лъэныкъуэкIэ къэпщытэныгъэхэр идо­гъэкIуэкI, хабзэр идогъэ­фIакIуэ. «Бжыгъэхэр зи лъабжьэ экономикэ» лэжьыгъэр гъэкIуэтэнымкIэ къалэныш­хуэ ягъэзащIэ цIыхухэм къэ­рал Iуэхутхьэбзэхэр щыхуащIэ центрхэм. Абыхэм къэрал Iуэхутхьэбзэхэр электроннэу къыпIэрыхьэныр къызэрагъэ­пэщ, ИИ-р дэIэпыкъуэгъу ящI, дэфтэрхэм зэрелэжь псын­щIагъымрэ шынагъуэншагъэмрэ хагъахъуэ.
Iуэхум теухуауэ зэIущIэм къыщыпсэлъащ КъБР-м Бжы­гъэхэр зи лъабжьэ зыу­жьыныгъэмкIэ, зэпыщIэ­ны­гъэхэмрэ хъыбарегъащIэ IэмалхэмкIэ и министр Бозий Аскэр. 
«Къэралым и технологие зыужьыныгъэмрэ бжыгъэхэр зи лъабжьэ экономикэрэ» лъэпкъ Iуэхум ипкъ иткIэ, Къэбэрдей-Балъкъэрым щIыналъэ проектищ щагъэзащIэ: «Социальнэ IэнатIэхэм я бжыгъэ платформэхэр», «Бжыгъэ къэрал управленэ», «Ди къэралым и унафэхэр». 
Япэр хуэунэтIащ Iуэхутхьэбзэхэр электроннэу зэры­хуащIэм и фIагъыр егъэфIэ­кIуэным елэжьыным, цIыху­хэм зэрадэлажьэ бжыгъэ Iэмалхэм зегъэужьыным, лъэ­пощхьэпохэр гъэкIуэ­дыным.
«Бжыгъэ къэрал управленэ» Iуэхум ипкъ иткIэ, цIыху­хэм я дежкIэ мыхьэнэшхуэ зиIэ къэрал, муниципальнэ Iуэхутхьэбзэхэр зэраIэрагъэ­хьэ щIыкIэр ирагъэфIакIуэ.
«Ди къэралым и унафэхэр» хуэгъэпсащ къэралым технологие лъагэхэр, зыми емы­лъы­тауэ, зригъэхъулIэным.
ЗэIущIэм хэтахэр едэIуащ министерствэм иригъэкIуэкI Iуэхухэм, цIыхухэм зыкъы­щыхуагъазэ платформэм и лэжьыгъэм, хъыбарегъащIэ шынагъуэншагъэм, нэгъуэщI­хэми.
ЗэIущIэм къыщыпсэлъащ КъБР-м къэрал, муниципальнэ Iуэхутхьэбзэхэр яхуэ­щIэнымкIэ Къалэн куэд щагъэзащIэ центрым и унафэщI АфIэунэ Аслъэн. Ар тепсэ­лъыхьащ IэнатIэм зэрызиужьым, я Iуэхутхьэбзэхэр цIыхухэм зэрыIэрагъэхьэм.
Къыхэгъэщыпхъэщ 2025 гъэм центрым Iуэхутхьэбзэ мин 884-м нэблагъэ цIыхухэм зэрахуищIар. Къэрал къалэныр блэкIа илъэсым проценти 114-м щIигъукIэ игъэ­зэщIащ центрым.
Къыхагъэщащ КъБР-м и МФЦ-мрэ цIыхухэмрэ технологие лъагэ Iэмэпсымэхэм­-кIэ зэпащIэну зэрамурадыр. Къалэн нэхъыщхьэхэм ящыщу къагъэлъэгъуащ цIыхум и дэфтэрхэр электроннэу ща­хъумэ бжыгъэ ID-сервисыр зэтраухуэныр. Абы и фIыгъэкIэ, цIыхум етIуанэу IуэхущIапIэм щытригъазэкIэ, тхы­лъымпIэкIэ дэфтэрхэр имыхьми хъунущ. Къищы­нэмы­щIа­уэ, МФЦ-м зэрызы­хуа­гъазэ лъэIухэр МАХ мессенджерымкIэ ирагъэхь хъууэ къызэгъэпэщыным йолэжь.
Егоровэ Татьянэ жиIащ иджыблагъэ КъБР-м и Iэтащхьэм и деж Къэухь IэрыщI технологиехэм зегъэужьы­ным, гъащIэм хэпщэным теухуауэ Комиссэ къызэрыщы­зэ­рагъэпэщар. Ар щIэупщIащ сыт хуэдэ унэтIыныгъэхэр япэ игъэщыпхъэу къилъытэми.
Бозий Аскэр апхуэдэу плIы къигъэлъэгъуащ: медицинэр, егъэджэныгъэр, шынагъуэншагъэр, къэрал IуэхущIапIэ­хэм я лэжьыгъэр. Абы къыхигъэщащ бжыгъэ Iэмэ­псы­мэ­щIэхэр къэгъэсэбэпыным рес­публикэр зэрыхуэхьэ­зы­рыр.
КъБР-м и Парламентым Лъэпкъ зэхущытыкIэхэмкIэ и комитетым и унафэщIхэм яз, ЛэжьыгъэмкIэ, социальнэ ­политикэмкIэ, узыншагъэр хъумэнымрэ ветеранхэм я IуэхухэмкIэ комитетым и унафэщIым и къуэдзэ Без­годькэ Владимир къигъэлъэгъуащ кибершынагъуэншагъэм елэжьыным мыхьэнэ­ш­хуэ зэриIэр. Абы зэIущIэм хэтхэм ягу къигъэкIыжащ гъэп­цIагъэм пэщIэтынымкIэ хабзэубзыху Iуэху зыбжанэ къызэращтар, арщхьэкIэ цIыхухэр, псом хуэмыдэу нэхъыжьхэр, абы щыхъумэным иджыри къару ирахьэлIэн зэрыхуейр.
КъБР-м и Парламентым Мэкъумэш IуэхухэмкIэ, щIы­уэпсыр къэгъэсэбэпынымкIэ, экологиемрэ дыкъэзыухъу­реихь дунейр хъумэнымкIэ и комитетым и унафэщIым и ­къуэдзэ Щхьэгъэпсо Сэфарбий бжыгъэ платформэхэр ягъэлэжьэн хуейуэ зэры­хуагъэувым и гугъу щищIым, абы егъэджакIуэхэм я лэжьыгъэр нэхъ хьэлъэ зэрищIыр къигъэлъэгъуащ. Депутатым къыхигъэщащ нобэ егъэджакIуэхэм тхылъымпIэ зэгъэзэхуэным зэманышхуэ зэрытрагъэкIуадэр: электрон дневникхэм елэжьыным къыщыщIэдзауэ ирагъэкIуэкI дерсхэр зыхуэдэнур ятхын зэрыхуейм щыщIэкIыжу. Ар лъэIуащ егъэджакIуэхэм я ­къалэнхэр нэхъ тынш зэрыщащIыфыну Iэмалхэр ягъэбелджылыну.
Бозийм жиIащ дызэрыт илъэсым Къэбэрдей-Балъкъэрыр «Си еджапIэ» федеральнэ платформэр щылэ­жьэну щIыналъэхэм зэрыхагъэхьар. Абы бжьыхьэм елэ­жьын щIрагъэдзэнущ, икIи егъэджакIуэхэм я Iуэхур нэхъ тынш зэращищIынур етIанэгъэ нэрылъагъу къищIыну тращIыхь.
ЗэIущIэм хэтахэр тепсэ­лъыхьащ Налшык къалэн куэд щагъэзащIэ и центрхэм чэзухэр зэрыщагъэмащIэ Iэмалхэм, IэщIагъэлIхэм я бжыгъэм зэрыхэщIым и щхьэусыгъуэхэм, нэгъуэщIхэми.
КъБР-м и Парламентым ПромышленностымкIэ, тран­спортымкIэ, связымрэ гъуэгу IэнатIэмкIэ и комитетым и унафэщI Къалмыкъ Марат къыхигъэщащ Iуэхур зи нэIэм щIэт министерствэмрэ МФЦ-мрэ я лэжьыгъэм республикэм и экономикэмрэ социальнэ IэнатIэмрэ бжыгъэ и лъэныкъуэкIэ зегъэужьыным къалэнышхуэ зэрагъэзащIэр, ИИ-мрэ технологие лъагэ­хэм­рэ ехьэлIауэ «Къэралым и технологие зыужьыныгъэм­рэ бжыгъэхэр зи лъабжьэ экономикэ» лъэпкъ Iуэхур гъэ­зэщIа хъуным къагъэлъэгъуа Iуэху­хэмрэ щхьэпэну къызэрилъытэр.
ЗэIущIэм щыжаIам теухуауэ КъБР-м и Парламентым и Пезидиумым унафэ къищтащ.

* * *
Президиумым и зэIущIэм депутатхэр щыхэплъащ ­мэ­къу-
мэш IэнатIэм зегъэу­жьыным, бдзэжьей ещэным, псы хъу­гъуэфIыгъуэхэр хъу­мэным, УФ-м административнэ хабзэхэр къызэпызыуд­хэмкIэ и Кодексым, УФ-м и ЩIы кодексым, нэгъуэщIхэми ехьэ­лIа федеральнэ законхэм я проектхэмрэ къэралым и щIыналъэхэм я хабзэубзыху IуэхущIапIэхэм я жэрдэмхэм­рэ.
Жылагъуэ шынагъуэншагъэмрэ Iулъхьэм пэщIэтынымкIэ комитетым и унафэщI Кривко Михаил и лэжьэгъухэр щигъэгъуэзащ «КъБР-м и зэзыгъэкIуж хеящIэхэм ятеухуауэ» республикэ законым теухуауэ Къэбэрдей-Балъкъэрым и Парламентым и Президиумым и чэнджэщхэр зэрагъэзащIэм.
КъБР-м и Парламентым 
и пресс-IуэхущIапIэ.