Бахъсэн щIыналъэ администрацэм и ЩIалэгъуалэ центрым щекIуэкIащ хэкупсэ унэтIыныгъэ зиIэ щIалэгъуалэ зэхыхьэ. Ар къызэрагъэпэщащ «Урыс щIэин» зэгухьэныгъэм, «Вера сильнее огня» Къэбэрдей-Балъкъэр щIыналъэ зэгухьэныгъэм, Урысейм и «Полк уахътыншэ» жылагъуэ зэщIэхъееныгъэм и щIыналъэ къудамэу КъБР-м щыIэм, СВО-м и волонтёрхэм я ассоциацэм. Зэхыхьэм кърихьэлIащ Бахъсэн районым и щIалэгъуалэ жыджэрхэмрэ егъэджэныгъэмрэ волонтёрствэмкIэ IэщIагъэлIхэмрэ. Ахэр тепсэлъыхьащ тхыдэ фэеплъыр хъума зэрыхъуну щIыкIэхэм, иджырей гуманитар къалэнхэр гъэзэщIэнымкIэ щIэблэм я пщэ къыдэхуэхэм.
Форумым щызэпкърахащ школакIуэхэм гуманитар къалэну зэфIагъэкIхэр. Къызэхуэсахэм жаIащ еджакIуэхэр волонтёр Iуэхухэм хэшэнымкIэ ирагъэкIуэкI лэжьыгъэхэр зыхуэдэр. Зэхыхьэм и зы Iыхьэр хухахат «Тхыдэ фэеплъ» зи фIэщыгъэ арт-терапием, ахуэдэуи утыку кърахьащ егъэджэныгъэ IуэхущIапIэхэм хэкупсэ клубхэр къыщызэгъэпэщынымкIэ мастер-классхэр, СВО-м и лIыхъужьхэм ятеухуа лекцэхэр.
ЗэIущIэр иуха нэужь, Бахъсэн районым и щIалэгъуалэм СВО-м хэтхэм папщIэ зэхуахьэса гуманитар дэIэпыкъуныгъэр яутIыпщащ. Абы ирагъэшащ къабзагъэр къызэрызэрагъэпэщ, махуэ къэс къагъэсэбэп хьэпшыпхэр, куэдрэ зэIымыхьэ ерыскъыхэмрэ псырэ. Абы къегъэлъагъуэ щIыналъэм ис щIалэгъуалэм я граждан Iуэху еплъыкIэр зыхуэдэмрэ дзэ Iуэху хэхам хэту зи къалэн зыгъэзащIэхэм зыщIагъэкъуэну зэрыхуеймрэ.
КъызэгъэпэщакIуэхэм къыхагъэщащ хэкупсэ гъэсэныгъэмрэ волонтёр дэIэпыкъуныгъэмрэ я IуэхукIэ щIалэгъуалэм купщIафIэу зэрадэлажьэр, апхуэдэуи школ жэрдэмхэмрэ волонтёр проектхэмрэ адэкIи зегъэубгъун зэрыхуейм и щапхъэ хъуащ зэхыхьэр.
Iэрыс Iэсият.
