Кэнжэ къуажэм дэт «Пять колец» спорт академием иджыблагъэ щыхьэщIащ 1980 гъэм и Олимп чемпион, УФ-м щIыхь зиIэ и тренер Гамбэ Эцио икIи ди къэралым и тренерхэм папщIэ дзюдомкIэ егъэджэныгъэ зэхуэс абы щригъэкIуэкIащ. 
Тренер цIэрыIуэм и лэ­жьыгъэм нэхъыбэу зытригъэщIар дзюдом и техникэм хуегъэджэнымкIэ щыIэ Iэмалхэр спортсмен ныбжьы­щIэхэм я тренировкэхэм къыщыгъэсэбэпынырщ. Апхуэдэуи, зэхуэсым щы­зэпкъ­рахащ гъэсэнхэм ­фэбжь ямыгъуэту ахэр зэ­хьэзэхуэхэм IэкIуэлъакIуэу зэрыхуагъэхьэзыр щIыкIэ­хэм. 
Фигу къэдгъэкIыжынщи, итальян бэнакIуэ Гамбэ Эцио УФ-м дзюдомкIэ и командэ къыхэхам и тренер нэхъыщхьэу илъэс 16-кIэ лэжьащ (2008 - 2024 гъэхэм). Абы и унафэм щIэту ди къэралым и командэ къыхэхам, ди тхыдэм щыяпэу, дыщэ медалу 3 Лондон къалэм щекIуэкIа Олимп джэгу­хэм къыщахьауэ щытащ. 2024 гъэм ар и къулыкъум текIащ, ауэ абы щхьэкIэ къэмынэу нобэр къыздэсым ди спортсменхэмрэ тренерхэмрэ къадолажьэ, УФ-м и щIыналъэхэм дзюдомкIэ я федерацэхэм чэнджэщхэр ярет.
«Нобэрей зэIущIэм и къалэн нэхъыщхьэу щытыр илъэс 15 - 17 зи ныбжь спорт­сменхэм зыгъэсэныгъэхэм фэбжь щамыгъуэту уадэлэ­жьэнымкIэ щыIэ Iэмалхэм тренерхэр хуегъэджэнырщ. Си командэм - Тау Хьэсэнбий, Мудрэн Беслъэн сымэ, Къэбэрдей-Балъкъэрым и нэгъуэщI щIалэхэм сыкърагъэблэгъауэ, дызэгъусэу долажьэ», - жеIэ Гамбэ Эцио. 
ЗэIущIэм кърихьэлIа, ­КъБР-м и Парламентым и УнафэщIым и къуэдзэ, Олимп джэгухэм я чемпион Къардэн Мурат къыхигъэщащ, Кавказ Ищхъэрэм имы­закъуэу, нобэрей егъэ­джэныгъэ зэхуэсым Урысей псом дежкIэ мыхьэнэшхуэ зэриIэр икIи Гамбэ Эцио удэлэжьэныр олимпиадэм хуагъэхьэзыр чемпионхэм я дежкIэ зэрынасыпышхуэр.
УФ-м ДзюдомкIэ и федерацэм и спорт директор Денисов Кирилл жеIэ: «Ди хъуреягъкIэ псори хъарзынэу къызэгъпэщащ, тренировкэ щедгъэкIуэкI щIыпIэри дагъуэншэщ. Сэ куэдрэ сы­щыIащ Къэбэрдей-Балъкъэрым, ауэ чемпион нэсым и гъусэу зыбгъасэу мыбы ущыIэныр - ар нэгъуэщIщ. Гамбэ Эцио дигъащIэ, дигъэлъагъу Iэмалу хъуар лэ­жьыгъэм къыщыбгъэсэ­бэпын защIэщ икIи щхьэ­пэщ».
МахуитIым къриубыдэу Гамбэ Эцио тренерхэм ядэгуэшащ дзюдомкIэ щыIэ техникэхэм я щэхухэмкIэ, гу лъаригъэтащ зэлэжьыпхъэхэмрэ нэхъыбэу тренировкэхэм зытрагъэщIэну Iэмалхэмрэ, абыхэм ягъасэ спортсменхэр фэбжьхэм щыхъума хъун хуэдэу. Апхуэдэу къыщIэхъум, тренерхэм яIэщIэкI щыуагъэхэми щигъэгъуэзащ.
УФ-м и командэ къыхэхам и тренер нэхъыжь, Олимп джэгухэм ещанэ щыхъуа Тау Хьэсэнбий хьэщIэм теухуауэ жеIэ: «Гамбэ Эцио IэщIагъэлI нэсщ. Абы и гъусэу улэжьэныр сыт щыгъуи гъэщIэгъуэнщ икIи щIэщыгъуэщ. ЩIэмычэу уи щIэныгъэм хэбгъэхъуэн хуейщ: псори пщIэуэ, псоми ущы­гъуазэу къыпщыхъу щы­хъуам деж, адэкIэ зыу­жьы­ныгъэ уимыIэну аращ».
Апхуэдэуи абы къыхигъэщащ Къэбэрдей-Балъкъэ­рым дзюдомкIэ и школыр къэралым щынэхъ лъэщ­хэм зэрахыхьэр: мы егъэджэныгъэ зэхуэсым ипэ­кIэ УФ-м и командэ къыхэхам европей чемпионатым зыхуигъэ­хьэ­зыру ди деж щыIащ, УФ-м пашэныгъэр къыщыхьынымкIэ зэ­хьэ­зэхуэ Налшык щекIуэкIа къудейщ, ди бэнакIуэхэм абыхэм екIуу зыкъыщагъэлъагъуэ.

КЪУЭЖЕЙ  Iэдэм.