Албанием и къалащхьэ Тиранэ къикIыу хъыбар гуапэ иджыблагъэ къытIэрыхьащ. Европэм бэнэкIэ хуитымкIэ и чемпионату абы щекIуэ­кIам УФ-м и командэ къыхэхам хэту щыбэна БищIо Тимур килограмм 74-рэ зи хьэлъагъхэм я деж ещанэ увыпIэр къыщихьащ.

ЯпэщIыкIэ ди щIалэр зэхьэзэхуэм щыхуэзащ Бельгием и ныпым щIэту зыкъэзыгъэлъагъуэ Велиев Ибрэхьим икIи зэIущIэм и бжыгъэр 11:0-у ар хигъэщIащ. АдэкIэ финалым и Iыхьэ плIанэм БищIом къыщыпэплъащ Словакием и спортсмен лъэщ, Европэм плIэ­нейрэ и чемпиону а да­къи­къэм щыта (Албанием ­етхуа-­нэр къыщихьащ), осетин щIалэ Салказанов Таймураз. Абы­хэм я зэIущIэр гуащIэу екIуэ­кIащ, ауэ Тимур и хьэрхуэрэ­гъум къыхиха Iэмалым ар тригъэкIуащ: зэхьэзэхуэр и кIэм нэсыным зы дакъикъэ хуэдиз фIэкIа къэмынэжауэ Салказановым хузэфIэкIащ ди щIалэр утыкум къригъэ­кIын икIи апхуэдэ щIыкIэкIэ зэIущIэм и бжыгъэр 2:1-уэ ар текIуащ.
БищIом адэкIэ къыхуэнэ­жыр домбеякъ медалым щIэ­бэнынырт, ауэ апхуэдэу ар къэхъун щхьэкIэ, абы къефIэ­кIа осетин щIалэр финалым икIын хуейт. Ди гуапэ зэрыхъу­щи, Салказановыр финалым кIуащ, БищIоми, зэрыжаIэу, Iэмал игъуэтащ илъ ищIэжыну.
Къыхэдгъэщынщи, мы щIалитIыр 2021 гъэм Норвегием и къалащхьэ Ослэ щекIуэкIа дунейпсо чемпионатым щызэ­хуэзауэ щытащ. Абы щыгъуи, ахэр щызэIущIат финалым и Iыхьэ плIанэм. Нобэ хуэдэуи, Салказановыр текIуэри, иужь­кIэ етIуанэ абы щыхъуат, БищIом домбеякъ медаль ­къихьат. 
Иджырей чемпионатымкIэ къэдгъэзэжынщи, домбеякъ медалым щхьэкIэ ди щIалэм къыпэщIэтащ Венгрием и бэнакIуэ Курамагомедов Мурад икIи зэпеэум и бжыгъэр 2:1-уэ абы ар къыфIихьащ. Апхуэдэ щIыкIэкIи, европей чемпионатым ещанэ щыхъуащ.
Фигу къэдгъэкIыжынщи, БищIо Тимур дунейпсо (2021 гъэм), Европэ (2019 гъэм) чемпионатхэм я домбеякъ ме­далхэр къихьащ, дуней псом и Кубокым щытекIуащ (2019 гъэм), Ярыгиным и Кубокыр 2026 гъэм къихьащ, Нарткъалэ щыщщ, и ныбжьыр илъэс 30 мэхъу. Ар и гъэ­сэнщ ЗэкIуий Арсен.
КЪУЭЖЕЙ  Iэмин.