КъБКъУ-м и библиотекэм япэу утыку къыщрахьащ ­УФ-м и ТхакIуэхэм я зэгу­хьэ­ныгъэм хэт, УФ-м егъэджэныгъэмкIэ щIыхь зиIэ и лэжьа­кIуэ, егъэджакIуэ Мэржэхъу ФатIимэ къыдигъэкIа «Сказания о Сосруко» тхылъыр. ЗэIущIэм зыкърагъэхьэлIащ егъэджакIуэхэм, студентхэм, щэнхабзэм, литературэм я лэжьакIуэхэм. 

Зэхыхьэм къыщыпсэлъахэм къыхагъэщащ Кавказ Ищхъэрэм и лъэпкъхэм я щэнхабзэ хъугъуэфIыгъуэхэр хъумэнымкIэ литературэм мыхьэнэшхуэ зэриIэр. 
Библиотекэм и унафэщI ­Гериевэ Аймани зэIущIэр къы­щызэIуихым жиIащ нарт Iуэ­рыIуатэр Кавказ Ищхъэрэм щыпсэу - адыгэхэм, балъкъэр­хэм, къэрэшейхэм, осетинхэм, шэшэнхэм, ингушхэм, дагъыстэнхэм, нэгъуэщI лъэпкъ­хэм я зэдайуэ, лIэщIыгъуэкIэрэ къакIуа тхыдэ, щэнхабзэ гъуэгуанэр къыхэщыжу зэрыщытыр икIи щIэблэр лIыхъужьыгъэм, Iущыгъэм, гущIэгъум, хабзэр хъумэным зэрыщIапIыкIыр. 
- «Сказания о Сосруко» тхы­лъым хуэдэхэм къагъэлъа­гъуэ ди лъэпкъыр нэгъуэщI­хэм къазэрыщхьэщыкIыр, дыкъызыхэкIам гъунэгъу ды­хуещI икIи дигу къагъэкIыж Кавказым щыпсэу лъэпкъхэр я щэнхабзэрэ гъэсэныгъэ­кIэpэ зыхуэдар. Мэржэхъу ­ФатIимэ фIыщIэ ин хузощI и тхылъ гъэлъэгъуэныгъэр ди библиотекэм зэрыщригъэ­кIуэ­кIым папщIэ. Мыбдеж щызэхуэсащ егъэджакIуэ Iэ­щIагъэр къыхэзыхахэр. Псом хуэмыдэу абыхэм я дежкIэ ­лъапIэщ блэкIам зыщагъэ­гъуэзэныр, лъэпкъ Iущыгъэр щIэблэм я деж нахьэсыныр, - жиIащ Гериевэ Аймани. 
Мэржэхъу ФатIимэ Бахъсэн къалэм къыщалъхуащ. ­КъБКъУ-м и филологие фа­культетым хамэ къэралыбзэхэр джынымкIэ и къудамэр къиухауэ, Бахъсэн къалэм и курыт еджапIэ №3-м инджы­лызыбзэмкIэ щрегъаджэ.­ ­УФ-м и ТхакIуэхэм я зэгу­хьэ­ныгъэм, Кавказым и тхакIуэ­хэм я клубым хэтщ. И тхы­лъиплI дунейм къытехьащ (абы щыщу тIур нэгъуэщI тха­кIуэм дитхащ). И Iэдакъэ­щIэкIхэр республикэм къы­щы­дэкI литературэ журналхэм къытохуэ, инджылызыбзэрэ куржыбзэкIэ зэрадзэ-­
кIащ, «Антология поэзии» къыдэкIыгъуэм хагъэхьащ. Мэржэхъу ФатIимэ Дунейпсо Арткомитетым къыхуигъэфэщащ «Къэ­бэрдейр Урысейм зэрыгухьэрэ илъэс 460-рэ зэрырикъум и щIыхькIэ», «Що­джэнцIыкIу Алий къызэралъхурэ илъэси 120-рэ зэ­рырикъум и щIыхькIэ» дыщэ медалхэр. КъинэмыщIауэ, дуней псом щыпсэу лъэпкъхэм я Евразие ассамблеем, Къэ­захъстаным и ТхакIуэхэм я зэгухьэныгъэм я щIыхь тхылъ­хэр, Кавказым и усакIуэхэм я фестивалым и лауреат зэрыхъуам щыхьэт техъуэ щIыхь тхылъыр къратащ.
ФатIимэ зэрыжиIэмкIэ, тхэ­ным тезыгъэгушхуар Пушкин Александр и таурыхъхэрщ, иджырей унагъуэхэм я щIэ­блэм нарт IуэрыIуатэр усэ жыпхъэм иту саугъэт яхуи­щIынырщ. 
- IуэрыIуатэм и лIыхъужьхэм я зэфIэкIыр усэ жыпхъэм тету къэсIуэтэжыну къалэн зы­щыс­щIыжащ, мы тхылъым унагъуэр къеджэнымкIэ щхьэ­пэщи. ЛIэщIыгъуэ минхэр къызэзынэкIа, нэхъыжь­хэм щIэину къытхуагъэна IуэрыIуатэрщ абы и лъабжьэр. УФ-м и Президент Путин Владимир Урысейм и лъэпкъхэм я зэкъуэтыныгъэм и илъэсу 2026 гъэр щигъэувам, унагъуэкIэрэ зэгъусэу тхылъ еджэныр яублэжыну къыщыхуриджам сытригъэгушхуэри, тхыгъэм и Iэрытхыр езгъэхьащ «Сказитель Руси» урысейпсо литературэ саугъэтым и зэпеуэм. УсакIуэ, тхакIуэ цIэрыIуэхэр зыхэт зэхьэзэхуэм сыпхыкIыну ап­хуэдэу сыщымыгугъами, си лэжьыгъэр нэхъыфIу къалъыта тхыгъихым хэхуащ. Ар сэркIэ лъэпкъ саугъэтыфIщ. 
УсакIуэм фIыщIэ хуищIащ и тхылъыр сурэт щхъуэкIэ­плъы­кIэхэмкIэ зыгъэдэха, Бахъсэн къалэм и курыт еджапIэ ­№8-м сурэт щIынымкIэ щезы­гъа­джэ художник КIыпший Розэ. 
Мэржэхъу ФатIимэ студентхэм къахуеджащ и тхылъым щыщ пычыгъуэхэм икIи и къы­дэкIыгъуэм щыщ КъБКъУ-м и библиотекэм тыгъэ хуищIащ. 
Къэпсэлъахэм къыхагъэщащ усакIуэм зэфIэкI зэриIэр, образ телъыджэхэр къызэригъэщIыр, и усэхэр ягу зэры­дыхьэр, и тхыгъэм къыхэщ лIыхъужьхэр щIэблэм зэращапхъэр, хэку лъагъуныгъэм зэрыщIапIыкIыр, и тхылъы­щIэм жьыи щIэи зэрыдахьэ­хынур, ФатIимэ дяпэкIи ехъу­лIэныгъэхэр иIэну зэрагуапэр.
ФатIимэ и усэхэм къеджащ КъБКъУ-м и Социально-гуманитарнэ институтым (СГИ) «Къэбэрдей-шэрджэс филологие», «Къэрэшей-балъкъэр филологие» къудамэхэм ще­джэхэу Балуев Мырзэбэч, Уэзрокъуэ Беллэ, Хъымбэзэр Данэ, Бгъэжьнокъуэ Кристинэ сымэ. 
ЗэIущIэр щиухым, КъБКъУ-м и СГИ-м инджылызыбзэмкIэ и егъэджакIуэ нэхъыжь Борэн Мадинэ фIыщIэ яхуищIащ зэIущIэм зыкърезыгъэхьэлIахэмрэ къыщыпсэлъахэмрэ. Абы иджыри къытригъэзэжу жиIащ тхылъхэм гъэсэныгъэ мыхьэнэ зэраIэр, лъэпкъымрэ щIыналъэмрэ хуаIапхъэ лъагъуныгъэр къы­зэригъэушыр. 

Тхыгъэри  сурэтри ТЕКIУЖЬ  Заретэ  ейщ.