Кулиев Къайсын и цIэр зезыхьэ Балъкъэр къэрал драмэ театрым мэлыжьыхьым и 17-м пшыхь гуапэ щекIуэкIащ, КъБР-м ЩэнхабзэмкIэ и министерствэмрэ Тха­кIуэ­хэм я зэгухьэныгъэмрэ къызэрагъэпэщауэ. Ар теухуат КъБР-ми КъШР-ми я цIыхубэ усакIуэ, Къэбэрдей-Балъкъэрым­рэ Ингу­шымрэ щэнхабзэмкIэ щIыхь зиIэ я лэ­жьа­кIуэ, республикэм литературэмрэ гъуаз­джэмкIэ и Къэрал саугъэтым и лауреат ­Созаев Ахъмэт и ныбжьыр илъэс 85-рэ зэрыри­къуам. 

Пшыхьым зыкърагъэхьэлIащ усакIуэм и ныбжьэгъухэм, лэжьэгъухэм, и усэхэр фIыуэ зылъагъухэм, и благъэхэмрэ Iыхьлыхэмрэ. Театрым и пэIущIэ пэшым щагъэува дапхъэхэм телът усакIуэм и тхылъхэмрэ ныб­жьэгъухэм, лэжьэгъухэм, унагъуэм и гъусэу зытригъэха сурэтхэмрэ. 
- Хэку лъагъуныгъэр зэбэкIщ Ахъмэт и усэхэр. Узыншагъэ быдэ, ехъулIэныгъэ уиIэну дынохъуэхъу. УкъызыхэкIам ухуэфащэщ! - жаIащ пшыхьыр езыгъэкIуэкIхэм. 
- Республикэм исхэм пщIэ зыхуэтщIхэм ящыщщ Созаев Ахъмэт. Зи махуэр зыгъэ­лъапIэ нэхъыжьыфIым дохъуэхъу узыншагъэ быдэ иIэну, илъэс куэдкIэ и унагъуэм ящхьэ­щытыну, и лэжьыгъэхэр фIыуэ зылъагъухэр дигъэгуфIэну, - жиIащ КъБР-м и Правитель­ст­вэм и УнафэщIым и къуэдзэ Хъубий Марат. АдэкIэ ар къеджащ КъБР-м и Iэтащхьэ КIуэкIуэ Казбек и хъуэхъу тхыгъэм. Абы итщ: «Къэбэрдей-Балъкъэрым ис нэхъыжьыфI, журналист, литературэдж, цIыхубэ усакIуэ, жылагъуэ лэжьакIуэ Созаев Ахъмэт къыщалъхуа махуэр ди щIыналъэм зэрыщагъэлъапIэр, республикэм и мызакъуэу, къэралым и дежкIи мыхьэнэ зиIэ Iуэхущ. Балъкъэр, урыс литературэхэм хуэпщIа хэлъхьэныгъэхэр къэлъытэгъуейщ. Уи IэдакъэщIэкIхэр щыхьэт тохъуэ ущалъхуа щIыпIэм гу къабзэрэ псэ хьэлэлкIэ узэрыхуэлажьэм. Уи тхыгъэхэм гу къылъатащ Кулиев Къайсын, КIыщокъуэ Алим, Отаров Керим, Евтушенкэ Евгений сымэ, нэгъуэщIхэми. Ар усыгъэм зэфIэкI узэрыщиIэм и щапхъэщ. Уи усэхэм я фIагъыр тхылъеджэхэми къалъытащ. 1968 гъэм къы­дэкIа «Вижу солнце» уи япэ усэ тхылъым щIэупщIэ ин иIащ. Республикэм и усакIуэ нэхъыфIхэм уазэрыщыщым укъызыхэкIа лъэпкъыр ирогушхуэ. Мечиев Кязим, Кулиев Къайсын, Отаров Керим сымэ я лэжьыгъэхэм зэрыпыпщэр уасэншэщ. Узыншагъэ­рэ дэрэжэгъуэрэ уиIэу, литературэм адэ­кIи хэлъхьэныгъэ хуэпщIыну, гъащIэ кIыхь ухъуну дынохъуэхъу!
КъБР-м и Парламентым ЩэнхабзэмкIэ, граждан жылагъуэм зегъэужьынымрэ    хъыбарегъащIэ IуэхухэмкIэ и комитетым и унафэщI, КъБР-м и цIыхубэ артист Текуев Амур­бий игу къигъэкIыжащ и щIалэгъуэм Созаев Ахъмэт гуапэу къыIущIэу, чэнджэщ щхьэпэхэр къриту зэрыщытар. И ныбжьым емылъытауэ ар иджыри зэрыжыджэ­-рымкIэ зэрыщапхъэр, и IэдакъэщIэкIхэм зэры­ригушхуэр жиIа нэужь, усакIуэм и псалъэр цIыхубэм «хущхъуэгъуэ» яхуэхъуну, яхуэ­фIыну ехъуэхъури, КъБР-м и Парламентым и ЩIыхь тхылъыр иритащ. 
Филологие щIэныгъэхэм я доктор, профессор, КъБР-м щIэныгъэмкIэ щIыхь зиIэ и лэжьакIуэ, Гуманитар къэхутэныгъэхэмкIэ институтым адыгэ IуэрыIуатэмкIэ и секторым и щIэныгъэлI нэхъыщхьэ Гъут Iэдэм жиIащ Созаев Ахъмэтрэ абырэ илъэс куэд щIауэ зэрызэныбжьэгъур. Гъутым жиIащ сабийхэм я анэдэлъхубзэр, я Хэкур фIыуэ ялъагъунымкIэ Ахъмэт и усэхэр зэрыщхьэпэр, и псалъэхэр зыщIэлъ уэрэдхэр зэрыцIэрыIуэр.
Созаев Ахъмэт и махуэмкIэ ехъуэхъуащ КъБР-м лъэпкъ Iуэхухэмрэ жылагъуэ проектхэмкIэ и министрым и къалэнхэр зыгъэзащIэ Гергоков Жамболэт, щэнхабзэ хъугъуэфIыгъуэхэр хъумэнымкIэ къэрал управленэм и унафэщIым и къуэдзэ Хьэвжокъуэ Тимур, Щэнхабзэм и лэжьакIуэхэм я профсоюзым и рескомым и унафэщI Дау Марианнэ, КъБР-м и ТхакIуэхэм я зэгухьэныгъэм и правленэм и унафэщI Бейтуганов Исмэхьил, КъБР-м щIалэгъуалэм я IуэхухэмкIэ и министрым и къуэ­дзэ Ахметов Артур, КъБР-м лэжьыгъэмкIэ, цIыхухэр IэнатIэкIэ къызэгъэпэщынымрэ социальнэ дэIэпыкъуныгъэмкIэ и министрым и къуэдзэ Даловэ Дианэ, КъБР-м узыншагъэр хъумэнымкIэ и министрым и къуэдзэ Итий Ларисэ, республикэм и къалэ, къуажэ администрацэхэм я лIыкIуэхэр. 
Къэпсэлъахэр зи лIыкIуэ IуэхущIапIэхэм я унафэщIхэм я тхыгъэхэм къеджащ икIи къыхагъэщащ Созаев Ахъмэт и IэдакъэщIэкIхэм щIэупщIэ зэраIэр, «Эльбрус» тхылъ тедзапIэм, КъБР-м и ТхакIуэхэм я зэгухьэныгъэм я унафэщIу, КъБР-м и къэрал радиокомитетым редактор нэхъыщхьэу щыщытам къызэгъэпэщакIуэ Iэзэу зэрызыкъигъэлъэгъуар, абы и фIыгъэкIэ тхылъ щэ бжыгъэхэр къы­зэрыдэкIар, и гъащIэмрэ гуащIэмрэ, и тхыгъэхэр щIэблэм зэращапхъэр.
Пшыхьым зыкърагъэхьэлIащ Созаевыр къы­щалъхуа Белая Речкэ къуажэм и лIы­кIуэхэм. Созаевхэ я лъэпкъым къыбгъэдэкIыу зэхыхьэр езыгъэкIуэкI Ильяс Ахъмэт ехъуэ­хъуащ, пшыхьыр къызэзыгъэпэщахэмрэ абы къекIуэлIахэмрэ фIыщIэ яхуищIащ. 
Созаев Ахъмэт и усэхэм къеджащ пшыхьыр езыгъэкIуэкIахэу Мизиев Аубэчыр, Созаев Ильяс, Джаппуев Марат, ЩоджэнцIыкIу Алий и цIэр зезыхьэ Къэбэрдей къэрал драмэ театрым и артист Хьэмырзэ Ахьмэд, Кулиев Къайсын и цIэр зезыхьэ Балъкъэр къэрал драмэ театрым и артист Гогуев Арафат, Налшык и курыт еджапIэ №6-м и еджакIуэхэу ­Гъубжокъуэ Амалиерэ Долженкэ Юрэрэ, Глашев Алихъан сымэ. Республикэм и артистхэм ягъэзэщIащ усакIуэм и псалъэхэр зы­щIэлъ уэрэдхэр. Пшыхьыр ягъэдэхащ уэрэд­жыIакIуэхэу Мусукаев Руслан, Занкешиев Марат, Саенкэ Евгение, Хъусин Анзоррэ Жабоевэ Замирэрэ, Атмурзаевэ Танзиля, Теппев Алим, Хуламханов Къайсын, «Кабардинка» къэрал академическэ къэфакIуэ ансамблым, «Балкария» IуэрыIуатэ-этнографие ансамблым, «Терские казаки», «Арабеск» ансамблхэм, къафэмкIэ щапхъэу къалъыта «Амир» сабий ансамблым, нэгъуэщIхэми. 

БЖЬЫХЬЭ  Розэ.