Мэлбахъуэ Тимборэ и цIэр зезыхьэ Лъэпкъ къэрал библиотекэр жыджэру хэтащ мэлыжьыхьым и 18-м екIуэкIа «Библиотекэхэм я жэщ-2026» урысей­псо Iуэхум. Ар теухуауэ щытащ 2026 гъэр Урысейм и лъэпкъхэм я зэкъуэ­тыныгъэм и илъэсу зэрагъэувам. Библиотекэм щагъэлъэгъуащ иджыблагъэ къыдэкIа тхылъхэр.

Фигу къэдгъэкIыжынщи, мэлыжьы­хьым и 18-м шэджагъуэм щыщIэдзауэ пщыхьэщхьэр хэкIуэтэху Лъэпкъ биб­лиотекэм и бжэхэр зэIухауэ щытащ. Къэралым и Литературэ музейхэмрэ Щэнхабзэ центрхэмри мы жэщым ще­кIуэкIащ мастер-класс гъэщIэгъуэнхэр, тхакIуэхэм я зэIущIэхэр, тхылъ гъэлъэ­гъуэныгъэхэр, нэгъуэщIхэри. Къапщ­тэ­мэ, библиотекэм екIуалIэ тхылъеджэ- хэр махуэ  къэс зыщIамыгъэхьэ пэш- хэм зыщ­рагъэплъыхьащ. Урысейм ис лъэпкъ­хэм я лъапIэныгъэхэр къызыхэщ, цIыхубэ щэнхабзэм теухуа, XVII-XVIII  лIэщIыгъуэхэм къыдагъэкIа, иужькIэ трамыдзэжа тхылъ лъапIэхэм зыщагъэгъуэзэну Iэмал яIащ абыхэм. А тхылъхэр ящыщщ республикэм, къэралым я тхы­дэ, щэнхабзэ лъапIэныгъэу къалъы­тэ­хэм. 
Библиотекэм и къудамэхэм зэхыхьэ щхьэхуэхэр щекIуэкIащ. Къапщтэмэ, техникэ литературэмкIэ къудамэм къызэ­ригъэпэщащ «Народов много - страна одна: туристические достопримеча­тель­ности Северного Кавказа» зэхыхьэр. Абы щытепсэлъыхьащ Урысейм и щIыналъэхэм ящыщу тхыдэ-щэнхабзэ щIэин къулей зиIэ, зи щэнхабзэмрэ хабзэхэмрэ зыхъумэж лъэпкъ зэмылIэужьыгъуэ  куэд щыпсэу Кавказ Ищхъэрэм щIыпIэ дахэхэр, зыгъэпсэхупIэ телъыджэхэр зэ­рыщыIэм. Апхуэдэщ Домбей зыгъэп­сэ­хупIэр, илъэс минитху ипэ яухуа Дербент (Дагъыстэным и къуажэжьыр), къат ­куэду зэтет унэхэр щаухуа иджырей Грознэ къалэр, Дагъыстэным и Гам-сутль пасэрей къуажэмрэ Нарын-Къалэ бы­дапIэмрэ я щэхухэр, Сулак псыхъуэр, Кезеной гуэлыр, Шэджэм псыкъелъэ­хэр, пасэрей чэщанэхэр, Гуэл щхъуантIэхэр, Iуащхьэмахуэ и бгы уардэхэр, ­нэгъуэщIхэри. Щхьэхуэу къытеувыIащ лъэпкъ шхыныгъуэхэр зыхуэдэм. Зэхуэсахэр ирагъэплъащ «Туристический край России - Кавказ» гъэлъэгъуэныгъэм, «Шэджэм псыкъелъэхэр», «Да­гъыс­тэным и Гамсутль пасэрей къуа­жэр», «Кезеной гуэлыр», «Кавказым ­ибг­хэр. Iуащхьэмахуэ» нэтынхэм. 
ЗэIущIэм ирагъэблэгъат КъБКъУ-м хъыбарегъащIэ технологиехэмрэ эко­номикэмкIэ и колледжым и студентхэмрэ егъэджакIуэхэмрэ. Лъэпкъ зэмы­лIэужьыгъуэхэм ящыщу зэIущIэм хэта- хэр къытеувыIащ я хабзэхэмрэ щэнхабзэмрэ, Урысейм щыпсэу лъэпкъхэм зы тхыдэ гъуэгуанэ зэраIэм зэрызэкъуигъэувэр къыхагъэщу. 
Библиотекэм гъуазджэхэмкIэ и къу­дамэм и унафэщI КIуж Заремэрэ ­Гег­раевэ Зейнабрэ етIуанэ къатым и ­пэIущIэ пэшым къыщызэрагъэпэщащ «Единство - через диалог культур» зэ­хы­хьэр. Абы теухуауэ ягъэуват «В судьбе России - моя судьба», «Вечно живая классика» тхылъ дапхъэхэр. Къэпсэлъахэм ныбжьыщIэхэр хагъэгъуэзащ уса­кIуэхэу КIыщокъуэ Алимрэ Кулиев ­Къай­сынрэ, художник Шемякин Михаил, дирижёр цIэрыIуэ Темыркъан Юрэ сымэ я гъащIэмрэ гуащIэмрэ, лъэпкъ, дунейпсо щэнхабзэм, макъамэм хэлъ­хьэныгъэ инхэр зэрыхуащIам, лъахэхутэ, тхылъ тедзапIэм и унафэщIхэу Котля­ровхэ Викторрэ Мариерэ я лэжьыгъэ-хэм. НыбжьыщIэхэр экранымкIэ ирагъэплъащ зи гугъу ящI цIыху цIэрыIуэ-хэм ятеухуа нэтынхэм. Зэхыхьэм уса­кIуэхэм я IэдакъэщIэкIхэм къыщеджащ, я псалъэхэр зыщIэлъ уэрэдхэм щрагъэ­дэIуащ. ЗэIущIэм хэтащ Налшык и ку- рыт еджапIэ №16-мрэ №24-мрэ я еджа­кIуэхэр. 
Библиотекэм щеджэ и пэшымрэ ха-мэ къэрал литературэхэмкIэ и къудамэмрэ а махуэм ирагъэкIуэкIащ «Слу­жение Отечеству. Живые истории ге­роев» зэIущIэр. Абы щызэхуэса щIалэ­гъуалэр IущIащ УФ-м экстремизмэм, Iулъхьэм, терроризмэм я пэщIэтынымкIэ  и федеральнэ комитетым и щIыналъэ къудамэм и унафэщIым и къуэдзэ, дзэ Iуэху хэхам и ветеран, жылагъуэ лэ­жьакIуэ жыджэр, «Хэкум и хъумакIуэ-хэр» фондым и щIыналъэ къудамэм и лэжьакIуэ ПщыхьэщIэ Ахьмэд. Ар щIа­лэгъуалэм яхутепсэлъыхьащ дзэ Iуэху­ ­хэхам къулыкъу зэрыщищIам, щIэблэр Хэку лъагъуныгъэм щIэпIыкIын зэры­хуейм, нэгъуэщIхэми. ЛIыхъужьым зэ­хыхьэм хэтхэм я упщIэхэми жэуап иритащ. ЗэIущIэм хэтащ «Гъунэгъум дэIэ­пыкъу» IуэхущIапIэм и волонтёрхэр, сабийхэмрэ щIалэгъуалэмрэ зыхэт «Пэ­рытхэм я зэщIэхъееныгъэ» жыл­а­гъуэ зэгухьэныгъэм я лIыкIуэхэр, ­КъБКъУ-м хъыбарегъащIэ техноло­ги­е­хэм­рэ экономикэмкIэ и колледжым, «Строитель» колледжым щеджэ сту­дентхэр. Зэхыхьэм хэтхэм я нэгу зрагъэу­жьащ ГъуазджэхэмкIэ сабий школым и гъэсэнхэм. ЗэIущIэр къызэзыгъэпэщахэмрэ щIалэгъуалэмрэ фIыщIэ хуа-щIащ къахуеблэгъа хьэщIэхэм. 
«Библионочь-2026» Iуэхум хыхьэу ирагъэкIуэкIахэм тхылъыр фIыуэ зылъагъу сабийхэри балигъхэри я гуапэу хэтащ икIи щIэщыгъуэ ящыхъуащ. Абы гугъэ уегъэщI цIыхубэм тхылъ еджэным хуаIэ лъагъуныгъэмрэ щIэупщIэмрэ хигъэ­хъуэну, библиотекэхэмрэ музейхэмрэ ­нэхъри зрагъэужьыну. 
Тхыгъэри сурэтри
ТЕКIУЖЬ Заретэ ейщ.