Бу кюнледе Яникойну китапханасында кезиулю Кязим окъуула ётгендиле. Бу жол анга элни Байсолтанланы Алимни атын жюрютген школуну башланнган класслары эмда сабий садыны  тамата къаууму къатышхандыла - битеу да 52 сабий. 
Мечиланы Кязимни назмуларын  ариу окъугъанлары, ана тилибизде шатык сёлешгенлери жюрини бек къууандыргъанды. Аны бла бирге уа аланы араларында биринчи жерлеге тийишлилени сайларгъа да  къыйыныракъ болгъанды. 
Болсада жюри (орус тилден устаз Жолабланы Мадина, Гуманитар тинтиулени Къабарты-Малкъар  институтуну къарачай-малкъар фольклорну бёлюмюню илму къуллукъчусу Локияланы Жаухар, Яникойну китапханасыны башчысы Аппайланы Алима), эришиуге къатышханла назмуну окъугъан заманда аны магъанасына тюшюннгенлерине бла къалгъанларына,  жангылмай, жунчумай айтханларына,  кеслерин жюрюте билгенлерине да эс буруп,  алай сайлау этгенди.
Алайды да, 1-чи жерге  Таймаскъулланы Кязим чыкъгъанды. Сарбашланы Амида бла Баразланы Малика  экинчи болгъандыла.  Байзуллаланы Шамиль, Бёзюланы Медина бла Байкъазыланы Айша  ючюнчю жерге тийишли болгъандыла.
Конкурсну лауреатларына уа Таймаскъулланы Алия, Жабелланы Наиля, Роза Жемухова, Байзуллаланы Айдана бла Къойчуланы Азалия саналгъандыла.
Биринчи жерлеге тийишли болгъанлагъа грамотала, майдалла, ахча саугъала да берилгендиле. 
Яникойда быллай конкурс элни иймамы Элеккуланы Хасан хажини башламчылыгъы бла биринчи кере бардырылып къалмайды.  Эллиле, окъуучула да аны ючюн анга жюрек ыразылыкъларын билдиредиле. 
Сабийлени эришиуге хазырлагъан устазлагъа  да Яникой элни муслийманларыны биригиую сый бермей къоймайды. Бу жол да грамоталары бла саугъалагъанды. 
Эришиулеге сабийлени хазырлаугъа аслам къыйын салгъанладан бири  Хархаланы Зояны  энчи белгилерчады. Ол школда «Сёз устасы» деген адабият кружокну бардыргъан фахмулу устазды.  «Заман» газетни журналисти Таппасханланы Аминат да бу ишге юлюшюн къошханын айтырчады. Ол хазырлагъан къабартылы къызчыкъ Роза Жемухова да назмуну ариу окъугъаны, магъанасын тамам ангылагъаны, аны сахна оюн халда кёргюзте билгени ючюн конкурсну лауреаты болгъанды. 
Кючмезланы Айза.