«Миллетле кёпдюле - къырал а бирди» деген ат бла Хасанияны 16-чы номерли мектебинде уллу байрам ётгенди. Ол  Россейни халкъларыны бирлигини жылына жораланнганды.

Къууанчха Къабарты-Малкъарда жашагъан кёп миллетлени келечилери чакъырылгъандыла. Сёзсюз, окъуучула, аланы ата-аналары,  устазла да кёп санда келген эдиле.  
Байрам Россейни гимнинден башланнганды. Аны  окъуучула, гитчелери, уллулары да, бирча кёлден билип  айтханлары бек хычыуун кёрюннгенди.
Къууанырча, сейир этерча  башха ишле да болгъандыла: миллет ашарыкъланы,  тарыхны бла адет-тёрелени юслеринден хапарлагъан документлени бла суратланы кёрмючлери… Аланы окъуучула устазлары эмда ата-аналары бла бирге къурагъандыла, тап жарашдырып, ким да кёрюрча  орнатхандыла. Кеслери уа кёргюзтген миллетлерини  кийимлерин кийгендиле, аланы тиллеринде жырлагъандыла, тепсеулерин тепсегендиле.
Къысхасы, Хасанияда жашагъан миллетлени келечилери къарындашла, эгечлеча,  шуёхлукъда жашагъанларын кёргюзтгендиле. Сёз ючюн, 11-чи классны окъуучулары сахнада дагъыстанлыланы маданиятлары бла шагъырей этгендиле. Бу кюнледе ала уллу табийгъат къыйынлыкъгъа тюшгенлерин да эсгертип, алагъа битеу республиканы  адамлары, ол санда хасаниячыла да, болушлукъ этгенлерин айтхандыла.
Чувашлыланы адет-тёрелерин а 3-чю классны окъуучулары  кёргюзтгендиле.  Атталаны Ильнара, орусча, чувашча да жырлап, къараучуланы къууандыргъанды.
Узбеклилени омакълыкъгъа кийген чапанлары, кюнде жарыкъ жылтырай, кёзню къамата эдиле, къабартылыланы, тюрклюлени, ингушлуланы, чеченлилени, башха миллетлени да кийимлери кесиликлери бла бек ариу эдиле. Субай къызла бла жигит жашла, аланы кийип, сахнагъа чыкъгъанлары сайын, къараучула алагъа къарсла бла тюбей эдиле. 
Окъуучула республикаланы байракъларын  кётюрюп  чыкъгъанларында уа, байрамгъа келгенлени кёллери бютюн кётюрюлгенди. 
Кийимлени бир къауумун республиканы Маданият фонду бергенин, башхаланы уа анала бла устазла кеслери  тикгенлерин да белгилерчады. Аш-сууну да ала хазырлап келтиргендиле. Аны айтханым, байрамгъа уллу, гитче да  тынгылы хазырланнган эдиле. 
Ахырында уа  къызчыкъла бла жашчыкъла барысы да  сахнагъа чыкъгъандыла. Мектепни директоруну къуллугъун толтургъан Жарашууланы Эльмира Суфьяновна  аланы,  къонакъланы  да  къызыу алгъышлагъанды. 
- Бюгюн биз Россейни  халкъларыны бирлигини жылын къууанчлы халда башлайбыз. Аны бла байламлы  тюрлю-тюрлю ингирле, сейирлик къадарлары болгъан адамла бла тюбешиуле, спорт эришиуле, дагъыда алагъа ушаш затла  бардырлыкъбыз, - дегенди ол.
Бу байрамны къураугъа класс башчыла  уллу къыйын салгъанларын айтып, Эльмира Суфьяновна алагъа энчи ыспас этгенди. Ызы бла директорну орунбасары Холамханланы Юля  класслагъа  - сертификатла, къонакълагъа уа бюсюреу къагъытла бергенди.
Холаланы Марзият.