Бу кюнледе Элбрус элни Маданият юйюнде КъМР-ни маданиятыны сыйлы къуллукъчусу, белгили этнограф Къудайланы Мухтарны туугъан кюнюне аталгъан эсгериу ингир ётгенди.
Къудайланы Чокканы жашы Мухтарны аты къарачай-малкъар миллетде, аны бла бирге битеу тюрк дунияда эмда Шимал Кавказда белгилиди. Аны аты, бардыргъан иши не уллу сый-махтаугъа да тийишлиди. Андан сора да, Мухтарны аты «Балкария» фольклор-этнография къырал тепсеу ансамблибизни тарыхына алтын харфла бла жазылгъанды. 
Элбрус районну тепсеу хазнасында да Къудай улуну къыйыны болмагъанча уллуду. Элбрус элде кеси тепсеу къауум къурап, ала бла тыш къыраллы фестивальлагъа да къатышып тургъанды ол. Бюгюнлюкде Элбрус элни кесини ансамбли да аны атын жюрютеди. 
Ингирни къурагъанла эм алгъа аны тепсеу искусствогъа салгъан къыйынын энтта бир эсгере, республиканы этнография хазнасын сакълаугъа эм миллет тепсеу искусствону байыкъдырыуда аны магъаналылыгъын чертип айтхандыла.
 Концерт программагъа районну хар элини тепсеу ансамбльлери къатышхандыла. Элбрус элни Къудайланы Мухтар атлы «Эльбрус» халкъ тепсеулени ансамбли, Тырныаууздан «Салам» юлгюлю ансамбль, Быллымдан «Баллы» халкъ тепсеулени ансамбли, Кёнделенден «Сияние гор» юлгюлю ансамбль, Нальчикден «Элия» миллет тепсеулени школу бу жаны бла фахмуларын кёргюзтюп, къараучуланы керти да жюреклерине жеталгъандыла. Не десек да, тёлюден тёлюге ёте келген къыйматлы ызны юзюлмегенлей барыууну юлгюсю адамларыбызны ёхтемлендирмегенлей амалы жокъду. «Кавказны жаны» деген кийим коллекциясы бла «Ладасвит» брендни сахнада болууу да ингирге кесича къууат бергенди.
Къудайланы Мухтарны илму эм чыгъармачылыкъ ишлери миллет адетлени бла тёрелени сакълаугъа болмагъанча уллу къошумчулукъ этгендиле. Ала бюгюн да республиканы тепсеу къауумларына ышаннгылы мурдор болгъанлай барадыла.

Темуккуланы Асият