Бийик технологияланы битеуроссей ыйыгъыны кезиуюнде «РусГидро» компанияны Къабарты-Малкъарда бёлюмюню келечилери Нальчикде «Кюн шахар» сабий академияда болгъандыла. Энергетикле анда «Хунерли сабийлени школуну» окъуучулары бла тюбешгендиле. Бу жол алагъа эригиулю лекция окъуй турмай, «Суу ырхыгъа оноу эт» деген аламат оюннга къатышыргъа чакъыргъандыла.

Алай бла школчула кеслерин ГЭС-ни ишчилерича жюрютюрге керек эдиле. Борчлары да тынч болмагъанды: суу барыуну электрокюч чыгъарыргъа, чабакъчылыкъ мюлкге, кемеле жюрюуюне да жетерча алай тийишдирирге. Сабийле оюннга кёл салып къатышхандыла, къауум-къауум болуп, бирде даулаша, келишиулюк таба, проектлерин къорууларгъа кюрешгендиле.

Юйретиу быллай халда бардырылгъаны къыйматлы болгъанды. Окъуучула биринчиден суу ресурсла къалай хайырланылгъанын билгендиле, сора бирлешип амал табаргъа, тюз оноула этерге да юйреннгендиле.

Компанияны регионда бёлюмюнде белгилегенлерича, ала бу академия бла эрттеден бери байламлыкъ жюрютедиле: энергетикле сабийлени экскурсиялагъа чакъырадыла, алагъа деп инженер усталыкъланы юсюнден дерсле бардырадыла. Келир заманланы специалистлерин шёндю, мектеп партадан окъуна хазырлап башларгъа кереклисин «РусГидро» компанияда толу ангылайдыла. Анда айтханларыча, быллай тюбешиуле да сабийлеге урунуу жолларын сакъларгъа, энергетикле не бла кюрешгенлерине тюшюнюрге да болушадыла.

Академияны оноучулары да ыразы болгъанларын жашырмагъандыла. Аны таматасы Джаппуланы Тамара школчула компанияны башламчылыкъларына хар заманда да бек сюйюп къатышханларын чертгенди. Алай бу жолгъу тюбешиуню уа ала, кеслерин керти инженерлеча кёрюп, бютюнда жаратхандыла, дегенди. Ала энергетика – жаланда къыйын формула жазыула угъай, техникалы чыгъармачылыкъ болгъанын кёргендиле.

Кеси жанындан компания да окъууну бла производствону арасында байламлыкъланы кючлендирирге, хунерли жаш тёлюге себеплик этерге, аланы инженер усталыкъла берген онгла бла шагъырейлендирип турургъа таукелди.

Улбашланы Мурат.