Элбрус районну Кёнделен элини мектеплерини тамата классларыны окъуучулары «Ломоносовский обоз. Сила в смысле» деген жарыкъландырыу проектни программасына къатышхандыла.

Халкъла аралы лекторла тынгылаучулагъа юйюр къыйматланы сакъларгъа, халкъла аралы байламлыкъланы кючлеуню жолунда барыргъа, магъаналы ушакъла къурауну кереклисин айтхандыла.

Алайсыз да къыйын заманда жашайбыз. Халкъланы араларына сууукълукъ кийирирге хазырла кёпдюле. Аны себепли жаш тёлюге экстремизмге къажау болургъа тийишлисин, законнга келишмеген затладан узакъ турууну магъанасын да ангылатхандыла.

- Бизни ышаныуубуз, тамблагъы кюнде оноугъа турлукъла да сизсиз. Аны ючюн къыралда бола тургъан ишледен хапарлагъан СМИ-лени келечилерини айтыуларына тюз багъа бичерге юйрениу бек магъаналыды. Тёгерекде бола тургъан ишлеге кёз къарамыгъыз да тюз къуралыргъа керекди. Патриот сезим кючленир ючюн а, анга жораланып бардырылгъан ишлеге тири къатышыуну дурус кёребиз. Ата журтугъузну, туугъан жеригизни, элигизни да, биринчиден, кесигиз сюерге керексиз, - деп  юйретгендиле школчуланы лекцияны кезиуюнде.

Темуккуланы Асият.