Быйыл сентябрьде Басхан районну  Баксаненок бла  Псыхурей эллеринде  биришер агротехнология класс ачыллыкъды, деп билдиргендиле КъМР-ни Эл мюлк министерствосундан.

Былтыр быллай классла  Кишпекде бла Кубада да ишлеп башлагъандыла. Ол себепден районну бу жаны бла сынамы барды. Алада 7-11-чи классланы 87 чакълы окъуучулары физикадан, химиядан, биологиядан, математикадан терен билим аллыкъдыла, школчуланы табийгъатны, жерни, юй эм кийик жаныуарланы юслеринден хапарлары боллукъду. Билгенлерин бегейтир ючюн а, фермалада иш къалай къуралгъаны бла шагъырейленирикдиле.

Бу классла ачылгъанларындан магъана чыгъар ючюн, бек алгъа кючлю устазла керекдиле. Ол себепден алада окъутханлагъа къошакъ халда иги кесек ахча бёлюнюрюкдю. Быллай класс ачылыр ючюн, орта билим бериу учреждение талай излемлеге келиширге керекди: элде неда адам саны 50 мингден аз болмагъан шахарда орналыргъа; анга тынгылы ремонт этилгенли беш жылдан аз болмазгъа; мектеп иш бла жалчытхандан отуз километрден узакъ орналмазгъа.

Эсге сала айтсакъ, проект «Агропромышленный комплексде кадрла» федерал проектни «Аш-азыкъ къоркъуусузлукъну технологияла жаны бла жалчытыу» программагъа кёре бардырылады. Къыралыбызны эл мюлкге жараулу жерлери эркиндиле: будай сабанла, терек бахчала, кёгет тахтала, биченликле эм башхала. Алай бу байлыкъны хайырлана билирге керекди. Агрокласслада окъугъанланы бир къаууму эл мюлк бла байламлы усталыкъланы сайларла деген умут барды. Билимли адамла бусагъатда бу бёлюмге бек керекдиле.

Саулай алып айтханда, озгъан жылда тёрт агротехнология класс ачылгъанды, быйыл аланы саны оннга жетдирилликди.

Магометланы Сулейман.