Музыкэ къэрал театрым мэ­лы­жьыхьым и 12-м ще­кIуэ­кIащ  Къэбэрдей-Балъкъэрым и цIыхубэ артист, ком­пози­тор, музыкант, шансон макъамэм хуэ­Iэзэу щыта Амирамов Ефрем къы­зэралъ­хурэ илъэс 70 зэрырикъуам теухуа фэеплъ пшыхь. Ар къызэригъэпэщащ КъБР-м Щэн­хабзэмкIэ и министерствэм.

Пшыхьыр щыщIидзэм къызэхуэсахэр Ами­рамов Ефрем зы дакъикъэкIэ хуэщы­гъуащ. ЭкранымкIэ къатащ артистым ­игъэзащIэу щыта уэрэдхэмрэ усэхэмрэ щыщ. 
- Мы пшыхьыр иджыри Ефрем псэууэ дгъэхьэзырат, и иужьрей концертыр фIыуэ илъагъу Налшык къалэм щригъэкIуэкIыну и хъуэпсапIэти. Щхьэусыгъуэ гуэрхэмкIэ ар мызэ-мытIэу игъэIэпхъуащ. Хэт ищIэрэ, мып­хуэдэу хъуну иухагъэнт. Ныщхьэбэ дызэхуэсащ Ефрем и уэрэдхэр, усэхэр, и ­гъащIэмрэ и гуащIэмрэ дигу къэдгъэкIыжыну, ар ди гъащIэм зэрыхэтам папщIэ фIыщIэ хуэтщIыну, – жиIащ КъБР-м щэнхабзэмкIэ и министр Къумахуэ Мухьэдин. – Ефрем и лэ­жьыгъэхэм гъащIэ кIыхь яIэну, куэдрэ ­уты­кухэм щагъэзэщIэну дыщогугъ. Пшы­хьым къытхуеблэгъащ Москва, Израилым, нэ­гъуэщI щIыпIэхэм къикIа хьэщIэхэр. 
Ефрем и ныбжьэгъу, УФ-м щIыхь зиIэ и артист Мирзабеков Михаил жиIащ и адэ-анэр дунейм щехыжам, Ефрем нэхъыжьыфI зэрыхуэхъуар, илъэс 40-м нэблагъэкIэ зэ­ныбжьэгъуу зэрыщытар. Абы КъБР-м ЩэнхабзэмкIэ и министерствэм фIыщIэ хуищIащ мы фэеплъ пшыхьыр къызэрызэригъэпэщам папщIэ. 
Амирамов Ефрем ипхъу Леерэ и пхъу­рылъ­ху Меделинрэ фIыщIэ хуащIащ пшы­хьым къекIуэлIахэм. Лее тепсэлъыхьащ и адэр цIыху телъыджэу, лэжьыгъэр япэ иригъэщу зэрыщытар, и усэхэмрэ уэрэдхэмрэ ящыщ и ныбжьэгъухэм тыгъэ зэрахуищIар, абыхэм зыхуагъэзэху, щIэупщIэ яIэху зэращымы­гъупщэнур, утыкум щигъэзэщIэну хунэ­мыса­хэри къызэрыщIэнар. АдэкIэ щIигъужащ гъащIэ купщIафIэ езыхьэкIэ Ефрем Кавказымрэ Израилымрэ пыщIэныгъэ быдэ ­хуиIэу зэрыщытар.
- Ди хэкуэгъу, ныбжьэгъу Амирамов ­Еф­рем и уэрэдхэр Урысейми дуней псоми щы­цIэрыIуэщ. Абы къытхуигъэнащ цIыхубэм фIыуэ ялъэгъуа макъамэхэмрэ уэрэдхэмрэ. Лъэпкъ зэныбжьэгъугъэр, зэгурыIуэр, ­щалъхуа щIыналъэр зыгъэлъапIэу, цIыхухэр фIыуэ зылъагъуу щыта артистыр ­тщы­гъупщэнукъым. Къытхуигъэна лэжьыгъэхэм фIы­, гуапагъэ, дахагъэ, зыужьыныгъэ къы­пэ­кIуэну дыщогугъ, – жиIащ ­КъБР-м и ­Парламентым щэнхабзэмкIэ, граждан жыла­гъуэм зегъэужьынымрэ хъыбаре­гъа­щIэ Iуэху­хэмкIэ и комитетым и унафэщI ­Текуев Амурбий.
Зэхыхьэм къыщыпсэлъащ Ефрем щеджа Налшык и курыт еджапIэ №6-м и пионер гъэ­сакIуэу щыта Молокановэ Жанель, и классэгъуу щыта Кочетов Виктор, школ  уна­фэ­щIым и къуэдзэ Гериевэ Маринэ, нэ­гъуэщI­хэри. 
Къэпсэлъахэм къыхагъэщащ хьэл-щэн, гъэсэныгъэ дахэ зыхэлъа, макъамэр фIыуэ зылъагъу унагъуэм къыхэкIа, зэфIэкI ин зиIа Ефрем ягу къызэринар, абы къыщIэна уэрэдхэм яфIэфIу зэредаIуэр, цIыху цIэрыIуэ хъуа нэужьи, щеджа школыр, и ныб­жьэ­гъу­хэр абы зэрыщымыгъупщар.
Амирамов Ефрем и усэхэм къеджащ пшыхьыр езыгъэкIуэкIа Аттаев Азнор,  Налшык къалэм и курыт еджапIэ №6-м и еджакIуэхэу Гъубжокъуэ Амалиерэ Долженкэ Юрэрэ. Гериевэ Маринэ утыку кърихьащ Ефрем хуитха усэр.
Аттаев Азнор ягу къигъэкIыжащ Амирамов Ефрем и гъащIэмрэ гуащIэмрэ. Артистыр 1956 гъэм мэлыжьыхьым и 11-м Налшык къыщалъхуащ. И адэ-анэм пщIэшхуэ яхуищIырт щIалэм. ХъыджэбзиплIрэ щIа­литIрэ зыпIа и анэ Марие бын гъэсэныгъэр япэ изыгъэща бзылъхугъэщ. Унагъуэр макъа­мэм дихьэх къудейтэкъым, атIэ хьэуа пэ­лъытэу абы ирибауэу яIауэ жыпIэ хъунущ. И адэ Григорий Карачаевск уэрэдымрэ къа­фэмкIэ и ансамблым и япэ унафэщIт икIи и балетмейстерт. Ефрем Музыкэ школым щыщеджэм езыр-езыру гитарэ еуэу зригъэсащ. 7-нэ классым щыщIэсым и ныбжьэгъухэм я гъусэу «Джины» гупыр къызэрагъэпэщауэ, езыхэм ятха уэрэдхэр ягъэзащIэрт. 1991 гъэм Амирамовым и «Молодая» уэрэдыр куэдым зэуэ ягу дыхьауэ, уеблэмэ дзапэ уэрэди яхуэхъуат, телевиденэмкIи зэпы­­мы­у­у­э къатырт. Ефрем Кремлым 1995 гъэм дыгъэгъазэм и 3-м япэу щитащ «Белым по чёрному» и концертыр. Пшыхьыр ягу ирихьат икIи артистым Iэгуауэшхуэ хуаIэтат абы щы­гъуэм. Высоцкий Владимир и гъащIэмрэ гуа­щIэмрэ теухуа «Всенародный Володя» документальнэ фильм 2000 гъэм игъэхьэзыращ Амирамовым. Ари абы и ехъулIэныгъэшхуэу къэплъытэ хъунущ. 
Концертыр ягъэдэхащ Амирамов Ефрем и лэжьыгъэхэм щыщ зыгъэзэщIа и ныбжьэгъу уэрэджыIакIуэхэу Мирзабеков Михаил, «Мазаль» гупым и уэрэджыIакIуэ Мелихов Борис, Хардай Мухъутар, Хъыжьырокъуэ СулътIан, Сокъур Ольгэ, Кесаев Эльбрус, Лий Аслъэн, «Кабардинка» ансамблым, ­КъБКъУ-м и «Каллисто» театрым, КъБР-м и Музыкэ къэрал театрым и балетым и къэфакIуэ Щэбэтыкъуэ Изабеллэ сымэ, нэ­гъуэщI­хэми.
Бжьыхьэ Розэ. 
Сурэтхэр Карей Элинэ трихащ.