КъБР-м узыншагъэр хъумэнымкIэ и министр Къалэбатэ Рустам Налшык дэт къалэ поликлиникэ №1-м щахуэзащ «Къэбэрдей-Балъкъэр Республикэм и ЛIы­хъужьхэр» программэм хэтхэм. Программэм ипкъ иткIэ унэтIыныгъэ щхьэхуэхэм хуэунэтIауэ егъэджэныгъэ дерсхэр къызэрагъэпэщ. «ЛIыхъужьхэм я зэман» къэрал программэм къы­пызыщэ щIыналъэ жэрдэмыр хуэунэтIащ дзэ Iуэху хэхам хэтхэмрэ абы и ветеранхэмрэ защIэгъэкъуэным.

Къалэбатэ Рустам тепсэлъыхьащ щIыналъэм узыншагъэр хъумэнымкIэ и IэнатIэм социальнэ политикэр зэрыщагъэзащIэм, а унэтIыныгъэм щрагъэкIуэкI Iуэху­хэм. Апхуэдэу программэм хэтхэр щагъэгъуэзащ поликлиникэм и лэжьыгъэр зэрызэтеублам, IуэхущIапIэр сыт и лъэныкъуэкIи IэщIагъэлIхэми абы къекIуалIэхэми я тыншыпIэм хуэщIауэ къызэрызэгъэпэщар ирагъэлъэ­гъуащ.
Программэм и ещанэ Iыхьэм хэтхэм яджынущ щIыналъэм и хабзэхэр, инвестицэ политикэр, хьэрычэтыщIэ Iуэхур зэрызэрагъэкIуэкI щIыкIэхэр, экономикэ зыужьыныгъэм и Iэмал зэмылIэужьыгъуэхэр. Ахэр гъэзэщIэнымкIэ щыIэ къэрал Iуэху зехьэкIэхэм щагъэгъуэзэнущ.
Гулъытэ хэха хуащIынущ хьэрычэтыщIэ Iуэху мащIэмрэ курытымрэ дэIыгъыным, щIыналъэм и экономикэ зэ­фIэкIым хэгъэхъуэным, лэжьыгъэ IэнатIэщIэхэр къызэгъэпэщыным.
Зи чэзу зэхыхьэм Iуэхугъуэ нэхъыщхьэу къыщаIэтынур республикэм и социальнэ политикэрщ, егъэджэныгъэм­рэ, узыншагъэр хъумэнымкIэ программэхэр нэхъ щыпэрыту. ЗэIущIэм хэтхэр тепсэлъыхьынущ цIыхухэм я псэукIэр егъэ­фIэкIуэнымкIэ, щIалэгъуалэ политикэмкIэ а программэхэм ягъэзащIэ мыхьэнэм. 
Апхуэдэу и гугъу ящIынущ коррупцэм пэщIэтынымкIэ щыIэ Iэмалхэм, къулыкъущIэхэмрэ жылагъуэмрэ зэ­рызэдэлажьэм, абыхэм яку дэлъ дзыхьым, щIыпIэ бюд­жетыр зэраубзыхум, нэгъуэщI Iуэхухэми. 
Программэм хэтхэм ядэлэжьэнущ РАНХиГС-м, республикэм и къулыкъущIапIэ IэнатIэхэм я лIыкIуэхэр. 
ЩхьэщэмыщI  Изэ.