Къэбэрдей-Балъкъэрым лэжьыгъэ IуэхукIэ къэкIуа­уэ щыIэщ Осетие Ищхъэрэ-Алание Республикэм и Парламентым и лIыкIуэхэр. Абы­хэм яхэтщ РСО-Аланием и Хабзэубзыху IуэхущIапIэм и УнафэщIым и къуэдзэхэу Гутнов Аслъэнбэчрэ Доевэ Светланэрэ, псэупIэ-коммунальнэ хозяйствэмрэ ухуэ­ныгъэ политикэмкIэ комитетым и унафэщI Остаев Георгий, ЗаконодательствэмкIэ, хабзэмрэ щIыпIэ унафэр зехьэнымкIэ комитетым и унафэщI Черчесов Аслъэн сымэ.

КъБР-м и Парламентым и УнафэщI Егоровэ Татьянэ къыщыпсалъэм къыхигъэщащ хабзэубзыху IуэхущIапIэхэр зэрызэдэлажьэ зэгу­рыIуэныгъэм къыщыгъэ­лъэ­гъуахэр зэрагъэзащIэр. Псом хуэмыдэу щхьэпэщ хабзэ жэрдэмхэмкIэ яIэ зэ­фIэкI­хэмкIэ щIыналъэхэр зэрызэхъуажэр, зэгъусэу зэхыхьэ­хэмрэ къэпщытэныгъэ лэ­жьы­гъэхэмрэ зэрыра­гъэ­кIуэ-
кIыр.
КъБР-м и Парламентым Ухуэ­ныгъэмкIэ, псэупIэ-коммунальнэ IэнатIэмрэ гъэ­сы­ныпхъэ-энергетикэ IуэхущIапIэхэмкIэ и комитетымрэ РСО-Аланием и Парламентым ЖКХ-мрэ ухуэныгъэ политикэмкIэ и комитетымрэ хэтхэр Дзэлыкъуэ районым щыIащ. ЩIыналъэм ахэр ­щеплъащ икIи щытепсэлъы­хьащ социальнэ IуэхущIапIэхэр ухуэным, къуажэхэм зегъэу­жьыным ехьэлIауэ районыр зыхунэсам.
ЗэIущIэр ирагъэкIуэкIын ипэ къихуэу, республикитIым я депутатхэмрэ районым и лIыкIуэхэмрэ Дзэлыкъуэ­къуажэ Хэкум и хъумакIуэхэм я утым ит Фэеплъ блыным деж удз гъэгъахэр щагъэ­тIылъащ, хэкум папщIэ зи псэр зыта лIыхъужьхэм зы дакъикъэкIэ хуэщыгъуащ.
АдэкIэ Iуэхум щыпащащ районым и щIыпIэ администрацэм и унэм. Зэхыхьэм хэтащ КъБР-м и Парламентым и УнафэщIым и къуэдзэ Жанатаев Сэлим, Лъэпкъ зэхущытыкIэхэмкIэ комитетым и унафэщIхэм яз, Законодательствэмрэ щIыпIэ унафэр зехьэным епха IуэхухэмкIэ комитетым и унафэщIым и ­къуэдзэ Джатэ Руслан, Лъэпкъ зэхущытыкIэхэмкIэ комитетым и унафэщI, Про­мышленностымкIэ, транс­пор­тымкIэ, связымрэ гъуэгу IэнатIэмкIэ комитетым и уна­фэщIым и къуэдзэ Байдаев Сэлихь, УхуэныгъэмкIэ, псэу­пIэ-коммунальнэ IэнатIэмрэ гъэсыныпхъэ-энергетикэ Iуэху­щIапIэхэмкIэ комитетым и унафэщI Къумал Заурбэч, Жылагъуэ шынагъуэншагъэмрэ Iулъхьэм пэщIэтынымкIэ комитетым и унафэщI Кривко Михаил, ЩэнхабзэмкIэ, граждан жылагъуэм зегъэужьынымрэ хъыбарегъащIэ политикэмкIэ комитетым и унафэщI Текуев Амырбий, Мэкъумэш IуэхухэмкIэ, щIы­уэ­псыр къэгъэсэбэпынымкIэ, экологиемрэ дыкъэзыухъуреихь дунейр хъумэнымкIэ комитетым и унафэщI ТекIушэ Артур, ЩэнхабзэмкIэ, граждан жылагъуэм зегъэу­жьы­нымрэ хъыбарегъащIэ политикэмкIэ комитетым и унафэ­щIым и къуэдзэ Бжьахъуэ Ранетэ.
Къызэхуэсахэм зыхуагъэзащ КъБР-м и Парламентым и УнафэщIым и къуэдзэ Жанатаев Сэлимрэ РСО-Ала­нием и Парламентым и Уна­фэщIым и къуэдзэ Гутнов Аслъэнбэчрэ. Къэпсэлъахэм къыхагъэщащ псоми я зэхуэ­дэ гугъуехьхэм я хэкIыпIэхэр къагъуэтынымкIэ зэгъусэу ирагъэкIуэкI зэIущIэхэм мыхьэнэшхуэ зэраIэр.
Илъэс куэдкIэ районым и Iэтащхьэу щыта Джатэ Рус­лан жиIащ зэгъунэгъуфIым хуэдэу ижь-ижьыж лъандэрэ къызэрызэдекIуэкIым мыхьэнэшхуэ зэриIэр. Ар къытеувыIащ цIыхухэм я гъащIэр нэхъ тынш ящызыщI Iуэхухэм. Абы зэрыжиIэмкIэ, районым щекIуэкI зэхъуэкIыныгъэ псори цIыхухэм я сэбэп зыхэлъхэр къэлъытауэ, абыхэм я Iуэху еплъыкIэхэр къагъэнэIуауэ къызэрызэрагъэпэщыр. 
Дзэлыкъуэ районым и щIы­пIэ администрацэм и Iэтащхьэм и къалэнхэр зыгъэзащIэ Дэхъушокъуэ Исмэхьил щIыналъэм и тхыдэм, и псэу­кIэм, зэрызиужь Iэмалхэм теухуауэ къэпсэлъащ. Абы нэхъыбэу зытригъэщIар лъэпкъ проектхэмрэ къэрал програм­мэхэмрэ зэрагъэзащIэрщ.
- Дзэлыкъуэ районыр Къэбэрдей-Балъкъэрым псын­щIэу зыщызыужь и щIыналъэщ. Нобэ флъагъуну IуэхущIапIэхэр лъэпкъ пэхуэщIэ­хэм япкъ иткIэ едгъэкIуэкIа лэ­жьыгъэшхуэщ, - къыхигъэщащ къэпсэлъам. Абы ды­щIигъуащ зэIущIэм я зэдэ­лэжьэныгъэр зэригъэ­бы­дэ­нум, республикитIыр зэры­ра-­гъэфIэкIуэну IэмалыщIэхэр зэрахуиубзыхунум шэч къы­зэрытримыхьэр.
ЗэIущIэм къыщыпсэлъащ Дзэлыкъуэ районым ЛэжьыгъэмкIэ, цIыхухэр IэнатIэкIэ къызэгъэпэщынымрэ социальнэ дэIэпыкъуныгъэмкIэ и центрым и унафэщI Къущхьэ Масирэтрэ Дзэлыкъуэ районым и щIыпIэ администрацэм и профсоюз IуэхущIапIэм и унафэщI Ваниевэ Джульеттэрэ.
ХьэщIэхэмрэ бысымхэмрэ зэгъусэу зыщаплъыхьащ райо­ным и IуэхущIапIэ зэмы­лIэужьыгъуэхэм: Дзэлыкъуэкъуажэ дэт «Победа» ФОК-м (физическэ щэнхабзэмрэ узы­ншагъэр егъэфIэ­кIуэным­рэ тещIыхьар), Каменномост жылэм щыIэ «Заря» стадионым, Сэрмакъ къуажэм и курыт школ №1-м, Малкэ дэт ЩэнхабзэмкIэ унэм.
Депутатхэм районым и спортсмен ныбжьыщIэ нэхъыфIхэр ягъэлъэпIащ икIи я адэ-анэхэм, щIэблэр гъэсэ­ным хэлъхьэныгъэфI зэры­хуащIыр къалъытэри, фIыщIэ тхылъхэр иратащ. ХьэщIэхэм я нэгу зыщрагъэужьащ къы­зэрагъэпэща пшыхьым, школакIуэхэм ягъэхьэзыра «Осетия в лицах» гъэлъэгъуэныгъэм.
ХьэщIэхэм къыхагъэщащ здэщыIа IуэхущIапIэхэм я фIагъыр, цIыхухэм я Iуэху­тхьэбзэ псори абыхэм зэрыщагъуэтыр. Хабзэубзыхухэм зыщагъэгъуэзащ щIыпIэм егъэ­джэныгъэр къызэ­ры­щы­зэгъэпэщами зэрызыщагъэ­псэхуми, апхуэдэуи егъэджа­кIуэхэмрэ гъэсэнхэмрэ епсэ­лъащ.
Осетие Ищхъэрэм къикIахэр ялъэгъуам арэзы къи­щIащ. Районыр зызыужь щIыпIэхэм зэрыщыщыр, зэхъуэкIыныгъэфIхэр зэрыщалъагъур къыхагъэщащ.
Депутатхэр щызэчэнджэ­щым, хабзэхэр егъэфIэ­кIуэ­нымкIэ, мыхьэнэшхуэ зиIэ жэрдэмхэр пхыгъэкIынымкIэ адэкIэ я мурадхэр ягъэбелджылащ.