Къэбэрдей-Балъкъэрым лэжьыгъэ IуэхукIэ къэкIуащ Осетие Ищхъэрэ - Алание Республикэм и Парламентым и лIыкIуэ гуп. Абы хэтщ Осетие Ищхъэрэ – Аланием и Парламентым и УнафэщIым и къуэдзэхэу Гутнов Аслъэнбэчрэ Доевэ Светланэрэ, ПсэупIэ-коммунальнэ хозяйствэмрэ ухуэныгъэ политикэ IуэхухэмкIэ комитетым и унафэщI Остаев Георгий, Хабзэ убзыхуныгъэмкIэ, хабзэм тетынымрэ щIыпIэ самоуправленэмкIэ комитетым и унафэщI Черчесов Аслъэн сымэ.

Республикэм и Парламентым и УнафэщI Егоровэ Татьянэ хьэщIэхэр къыщригъэблагъэм къыхигъэщащ, щIыналъитIым тхыдэ зэпы­щIэ­ныгъэ быдэхэр яку зэрыдэлъыр икIи зэIущIэр ­хэгъэгухэм я хабзэубзыху IэнатIэхэм я парламент зэдэлэжьэныгъэм теухуа зэгурыIуэныгъэм ипкъ иткIэ зэрекIуэкIыр.
- Хабзэубзыху Советым къызэрытхуигъэувым тетуи, нэгъуэщI зэпыщIэныгъэхэмкIи жыджэру дызэрызэдэлажьэм къищынэмыщIауэ, зэгу­рыIуэныгъэ зэтщIылIам ди зэпыщIэныгъэхэр ­нэхъ куу ещI икIи лъагапIэщIэхэми дыхуешэ. Лэжьыгъэм и пIалъэкIэ дызэрызэхъуажэм къы­дэкIуэу, иджы Iэмал нэхъыбэ диIэ хъуащ зэ­хыхьэхэр зэгъусэу едгъэкIуэкIыну. Осетие Ищхъэрэ - Алание Республикэм и Парламентым и гъусэу Уэзрэдж къуажэм щедгъэкIуэкIауэ щытащ къэпщытэныгъэ-аналитикэ зэхыхьэ, жылэм и социально-экономикэ зыужьыныгъэм теу­хуауэ. Мызыгъуэгум хьэщIэхэм едгъэлъагъунущ республикэм и гъунапкъэм щыIэ, социальнэ ­IэнатIэхэр ухуэнымрэ сыт и лъэныкъуэкIи зы­-хуей хуэзэу зэгъэпэщыжынымкIэ лэжьыгъэш­-хуэ щрагъэкIуэкI Дзэлыкъуэ щIыналъэр, - жиIащ Егоровэм. 
Осетие Ищхъэрэ - Аланием и Парламентым и УнафэщIым и къуэдзэ Гутнов Аслъэнбэч гуапэу зэрырагъэблэгъам папщIэ фIыщIэ ищIри, къыхигъэщащ щIыпIэм къыщызэрагъэпэщ апхуэдэ зэпсэлъэныгъэхэр лэжьыгъэ и пIалъэкIэ зэ­хъуэжэнымкIэ IэмалыфIу зэрыщытым нэмы-щIи, республикитIми я цIыхухэм я щхьэпагъ къы­зыдэкIуэн парламент зэдэлэжьэныгъэм ­лъабжьэ быдэ зэрыхуэхъур, хэгъэгуитIыр унэтIы­ныгъэ куэдкIэ зэрызэпыщIар, зым адрейм щапхъэ къызытрихын Iуэхугъуэхэр мымащIэу лъэ­ныкъуитIымкIи зэрыщыIэр.
ЩIыналъэхэм я парламент зэхыхьэм къыщаIэта Iуэхугъуэ нэхъыщхьэм - социальнэ мы­хьэнэ зиIэ объектхэм ятеухуауэ ирагъэкIуэкI лэ­жьыгъэхэм ехьэлIа псалъэмакъым адэкIэ къы­щыпащэнущ Дзэлыкъуэ щIыналъэм. Осетие Ищхъэрэ - Аланием къикIа хьэщIэхэм абдеж ­Iэмал щаIэнущ Къэбэрдей-Балъкъэрым щрагъэкIуэкI ухуэныгъэ лэжьыгъэхэм я инагъымрэ фIагъымрэ ягъэунэхуну, апхуэдэуи а унэтIыныгъэмкIэ щIыналъэхэр зэрызэдэлэжьэну Iуэху ­нэхъыщхьэхэм тепсэлъыхьыну.

КъБР-м и Парламентым и пресс-IуэхущIапIэ.