Кёп болмай «Россети Северный Кавказ» – «Каббалкэнерго» биригиуню таматасы   Резуан Загаштоковну  башчылыгъы бла  ишчи    комиссиясыны кенгеши болгъанды.  Аны кезиуюнде  былтыргъы жылны эсеплегендиле эм быйыл  биринчи кварталда биригиу къаллай бир файда тюшюргенин сюзгендиле.

Сагъынылгъан кезиуде  энергетиклени тириликлерини хайырындан  сетьледе токну  тас болууун  18,97 процентге азайтыргъа онг табылгъанды. Ол планда белгиленнгенден  1,16 процентге азыракъ, 23 миллион киловатт-сагъатха азырыкъ  окъунады. Болсада былтыр бу заман бла тенглешдиргенде уа,   0,86 процентге кемди. Эсге сала айтсакъ, келтирилген  электрокюч Нальчикча шахарны, неда  245 минг адамны эки ыйыкъны ичинде   жалчытыргъа боллукъ эди. 

Аны бла бирге озгъан эки айда абонентлени 286,9 киловатт-сагъат бла жалчытыргъа онг табылгъанды. Ол да буруннгу жылдан 11,8 миллион сагъатха кёпдю. 

Андан сора да, ахшы жетишимле болдурургъа, арт заманлада   токну эсеплеген «акъыллы» система сингдирилгени эм токну эркинликсиз хайырланнганланы  (эсеплеген приборлары болмагъанланы неда ызлагъа кеслери алларына къошулгъанланы) тинтирча терк-терк рейдле бардырылгъанлары  да себеплик этеди.

Кенгешде  «Каббалкэнерго» биригиуню экинчи кварталгъа борчлары да  белгиленнгендиле. Ол санда  кёп фатарлы юйледе токну эсеплеген приборланы жангы тюрлюлерин салырча мадар  эм электрокюч бла байламлы тийишли ишле болжалдан кеч къалмай тамамланыры  сюзюлгенди.

 - Токну тас болурдан сакълау бизни баш борчубуздан бири болгъанлай къалады. Аны себепли анга къажау турурча система халда мадар этиледи. Эсге сала айтсакъ, хайырланылгъан ток ючюн заманында этилген тёлеулени себеплиги  бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи, – деп билдиргенди "Каббалкэнерго" биригиуню таматасы Резуан Загаштоков.

Магометланы Сулейман.