Былтыр Къабарты-Малкъарда тюрлю-тюрлю аурууладан къыйналгъан сегиз мингден артыкъ саусуз борчлу халда медицина страхование полисни (ОМС) хайыры бла саулукъларын игилендирирге онг тапхандыла, деп билдиргендиле КъМР-ни Саулукъ сакълау министерствосунда.
Бюгюнлюкде къыралны болушлугъу бла реабилитацияны онтёрт медицина учрежденияда ётерге жарайды. Сёз ючюн, Нальчикде аллай бёлюмле Республиканы клиника больницасында, Бийик медицина технологияла, Хирургия, Сабий реабилитация аралада, Физкультура диспансерде, Сабий больницада эм шахарны юч поликлиникасында да бардыла.
Сагъынылгъан медицина учрежденияла бийик технологиялы оборудование бла жалчытылыннгандыла. О санда робот халда ишлеген "Lokomat" комплекс, велоэргометр, мультитренажёр эм физиотерапия аппарат да бардыла. Ала "Къысха заманда саулукъну кючлерча медицина реабилитация» деген регионал программагъа кёре алыннгандыла.
Сагъынылгъан алчы технологияланы хайырланыргъа онг табылгъаны, чархларында бир тюрлю бузукълукълары болгъанлагъа реабилитацияны тийишли халда бардырыргъа, аны бла сакъатлыкъдан сакъларгъа эм саулукълу жашаугъа къайтыргъа да ахшы себеплик этеди.
Магометланы Сулейман.
