Парламентини депутаты Сафарби Шхагапсоев Черек муниципал районну оноучулары эмда районда болгъан битеу билим берген организацияланы башчылары бла тюбешгенди.
- Бизни жерлешибизни билим бериуге, жарыкъландырыугъа, илмугъа эмда законла чыгъырыугъа салгъан къыйыны бек уллуду эм кесини хайырын кёргюзтеди, - деп, районну администрациясыны башчысы Къулбайланы Алан Сафарби Хасанбиевичге магъаналы эмда хайырлы тюбешиу бардыргъаны ючюн жюрек ыразылыгъын билдиргенди.
Туугъан районуна алим да къуру къоллары бла келмегенди: мектепледе китапханала Сафарби Хасанбиевич редакторлукъ этип чыкъгъан илму китапла эмда энциклопедияла бла байыкъланнгандыла.
Тюбешиуню чеклеринде «Черек районну жеринде ёсген битимлени Къызыл китабы» деген проект да къолгъа алыннганды. Тамаша табийгъатыбызны хайырындан талай битим бизде болмаса, башха бир жерде да ёсмегенлерин чертирге тийишлиди.
