КъБКъУ-м Дунейпсо егъэджэныгъэмкIэ и школ нэхъыщхьэм щекIуэкIащ Тыркуменистаным и щэнхабзэм и махуэ. Абы къыщызэхуэсахэр щагъэгъуэзащ а къэралыгъуэжьым и тхыдэм, а хэкум и дуней телъыджэм хашащ, абы и хабзэхэр, макъамэр, къафэр, лъэпкъ шхыныгъуэхэр ирагъэцIыхуащ.
ХьэщIэхэм псалъэ гуапэкIэ захуигъэзащ Дуней-псо егъэджэныгъэмкIэ школ нэхъыщхьэм и унафэщI Журт Iэсият икIи жиIащ къэрал зэмылIэужьыгъуэхэм къикIа студентхэм яку дэлъ зэныбжьэгъугъэмрэ зэгурыIуэныгъэмрэ гъэбыдэнымкIэ мыпхуэдэ зэIущIэхэм мыхьэнэшхуэ зэраIэр.
«НобэкIэ ди университетым щIэныгъэ щызрагъэгъуэт Тыркуменистаным щыщ студент 1249-м. Ар хабзэ куу дыдэхэмрэ щэнхабзэ щхьэхуэхэмрэ зиIэ къэралщ. Ди студентхэм махуэшхуэ екIу ягъэхьэзыращ, я хабзэхэм дыщагъэгъуэ-зэн, я лъэпкъым бгъэдэлъ хъугъуэфIыгъуэхэмкIэ къыддэгуэшэн папщIэ. ЩIалэхэм дедэIуэнщ, абыхэм я дежкIэ ар Iэмал хъарзынэщ щалъхуа хэкум тепсэлъыхьыну», - къыхигъэщащ Журт Iэсият.
А къэралым теухуауэ ягъэхьэзыра видеотеплъэгъуэр дахэ хъуат. Экраным щызэблэкIырт мрамор хужькIэ ухуа Ашхабад, Каракум къумхэм я щIыпIэ гъунэншэхэр. Къызэхуэсахэм а хэкум теухуа Iуэхугъуэ гъэщIэгъуэнхэр къащIащ: абы цIыху мелуани 6,5-м щIигъу щопсэу, Щхьэхуитыныгъэм и махуэр фокIадэм и 27-м щагъэлъапIэ.
Пшыхьыр езы студентхэм я зэфIэкIхэмкIэ ягъэдэхащ. АнэдэлъхубзэкIэ уэрэдхэр жаIащ Дунейпсо егъэджэныгъэмкIэ школ нэхъыщхьэм и студентхэу Хайытов Базаррэ Атанязов Баймыратрэ. ИтIанэ утыкум къихьащ къэфакIуэхэр: Гусейнов Эльдар, Размановэ Набат, Каусовэ Махрибан, Мереловэ Гулзадэ, Худайбердиевэ Энверодже сымэ я «кюш тепти» къафэм Iэгуауэшхуэ хуаIэтащ. ХьэщIэхэр мыдыму едэIуащ усэхэми. Студенткэ Розиевэ Айнур Тыркуменистаным теухуауэ езым итха усэм къеджащ. Ар гъэнщIат и хэкум хуиIэ лъагъуны- гъэкIэ.
Зэхыхьэр щекIуэкIар утыкум и закъуэкъым. ХьэщIэхэм папщIэ щIыпIэ щхьэхуэхэр къызэрагъэпэщат, дэтхэнэми зыкъыщигъэ-лъэгъуэну хуиту. Апхуэдэ щIыкIэкIэ студентхэр ха-шащ «ялык бокди» лъэпкъ джэгукIэм, абы нэхъ хахуэхэр, IэкIуэлъакIуэхэр къихутащ. ИтIанэ бгырыпхкIэ зэпекъуащ. Пщащэхэм папщIэ мастер-классхэр ирагъэкIуэкIащ щхьэц зэраухуэным ирагъасэу, ар а лъэпкъым дежкIэ лIакъуэкIэрэ зэIэпах хабзэ гъуэзэджэщ.
А махуэм къагъэуват лъэпкъ шхыныгъуэхэмкIэ узэда Iэнэхэр. ХьэщIэхэми зыIуагъэхуащ студентхэм я IэкIэ ягъэхьэзыра тыркумэн ерыскъыхэкIхэр.
«Нобэ бёрек дгъэхьэзыращ, ар тыркумэн псыхьэлывэщ. Апхуэдэу Iэнэм тетщ дорамэ лъэпкъ шхыныгъуэр, цIыкIу-цIыкIуу упщIэта лы гъэвам хьэлIамэ хэлъу, лэпс щIэтыжу. Иджыри плов, лы зыдэлъ самса, тыркумэн хьэнтхъупс, нэгъуэщIхэри тпщэфIащ», - жиIащ школ нэхъыщхьэм щеджэ Амангелдиевэ Айнур.
Махуэшхуэр гурыхь, гукъинэж зыщIахэм ящыщщ студентхэм ящыгъа лъэпкъ фащэхэр. Абыхэм ящыщ куэдым иригушхуэу щIэх-щIэхыурэ щатIагъэ хабзэщ лъэпкъ фэилъхьэгъуэр. ГуфIэгъуэ Iуэху хэхахэм я мызакъуэу, лэжьэгъуэ махуэхэми ящыгъщ. ТхыпхъэхэмкIэ гъэщIэрэщIа бостейхэмрэ пыIэ хъурей цIыкIухэмрэ студенткэхэм яIэщ. Сыт хуэдэ махуэми лекцэми ахэр лъэпкъ фащэ ящыгъыу къэкIуэнкIэ хъунущ, КъБКъУ-м лъэпкъ куэдым къыхэкIахэр зэрыщеджэм щыхьэт техъуэу.
Дарий Дахэнур.
