КъБР-м и Лъэпкъ музейм що­-кIуэкI «Уэшхым и цIыху» урысей­- псо фестивалым хыхьэу къызэ-рагъэпэща гъэлъэгъуэныгъэр. Ар ирагъэхьэлIащ аутизм узыфэм и Iуэ­ху зэIумыбзым и хъыбарыр хэIущIыIу щIынымкIэ дунейпсо ма-хуэм.

Псапэ щIэным теухуа «Уэшхым и цIыху» фестивалыр Налшык илъэс еханэ хъуауэ щрагъэкIуэкI. Мы гъэм япэу абы урысейпсо мыхьэнэ ира-тащ. Иджырейм хагъэхьащ Санкт-Петербург, Донецк, Пятигорск щыщ су­рэ­тыщI ныбжьыщIэхэм я лэжьыгъэхэр. 
2026 гъэм дуней псом щытопсэ­лъыхь «Аутизм и человечество - каждая жизнь имеет ценность» Iуэхум. Нэхъапэхэми хуэдэу, ар къыщIы­халъхьар аутизм узыфэ зиIэ сабийхэм я Iуэху зэIумыбзхэм гу лъра-гъэ­тэнырщ, абыхэм я гъащIэмрэ ­яху­зэфIэкIымрэ цIыхухэр щагъэ­гъуэ­зэнырщ, нэхъ къахэщхэм ядэ­­Iэпы­къунырщ. НыбжьыщIэхэм ящIа сурэтхэм къыпэкIуа ахъшэр гъэлъэгъуэныгъэм хэтхэу бынуна­гъуэшхуэм къы- хэ­кIахэм иратынущ, дерсхэм пщIэ щIа­тын папщIэ. 
Фестивалыр и жэрдэмщ Къэбэрдей-Балъкъэрым  щыпсэу  Иуаз   Амир. Аращ зи фIыгъэр сурэт щIы­ным дихьэх ныбжьыщIэхэм я лэ­жьыгъэхэр ягъэлъагъуэ зэрыхъуар. Амир япэу ищIа «Уэшхым и цIыху» и сурэтым и цIэр фIащащ фестива­-лым. 
- Мы гъэлъэгъуэныгъэхэм зэпымычу сыкъокIуэри, сымыгъэщIэгъуэн слъэ­кIыркъым къызэрыгуэкI лэ­жьыгъэхэм къабзагъэрэ гуапагъэу къы­зэщIаубыдэр, - жиIащ КъБР-м щэнхабзэмкIэ и министр Къумахуэ Мухьэдин. - Сурэт къэс уагъэгупсы- ­сэ, сабийхэм я дунейм ухашэ. Ныб­жьы­щIэхэм, ди гъащIэм цIыкIухэм я нэкIэ деплъыну Iэмал къыдэзыт- хэм, Амиррэ и анэмрэ я лэжьыгъэ­хэмрэ гуапагъэмрэ папщIэ фIыщIэ яхуэфащэщ. Къэбэрдей-Балъкъэрым щыпсэухэм я мызакъуэу, нэгъуэщI щIыпIэхэми мы сурэтхэр щагъэ­лъэгъуэну сыщогугъ. 
КъБР-м и Iэтащхьэм и чэнджэщэгъу Тюбеев Альберт къызэхуэсахэм ягу къигъэкIыжащ фестивалыр зэры­рагъэжьауэ щытар, КъБКъУ-м ДизайнымкIэ и колледжым иджы щеджэ Иуаз Амир абы щыгъуэ ныбжьыщIэу зэ­рыщытар. Тюбеевым щIигъужащ фес­тивалым гъэ къэс зэрызиу-жьыр, лэжьыгъэ нэхъыбэ абы къы­зэ­рырагъэхьыр гуапэ зэрыщыхъур. ­­  Абы фIыщIэ яхуищIащ Амиррэ и анэ Сэхъу Ренатэрэ, Iуэхум хэт псапащIэхэм. 
Гъэлъэгъуэныгъэм къыщыпсэ-лъащ КъБР-м и Парламентым щэнхаб­зэмкIэ, граждан жылагъуэм зе­гъэу­жьы­нымрэ хъыбарегъащIэ Iуэху­хэмкIэ и комитетым и унафэщI Текуев Амурбий, КъБР-м и Парламентым и де­путат, КъБР-м и Профсоюзхэм я ­федерацэм и унафэщI Амщокъуэ ФатIимэт, КъБР-м бжыгъэр зи лъабжьэ зыужьыныгъэм- кIэ, связымрэ цIыхубэ зэпыщIэныгъэ-хэмкIэ и министрым и къуэдзэ Гилиев Мурат, ­КъБР-м Лэжьыгъэм- рэ социальнэ ­дэ­Iэпы­къуныгъэмкIэ и министерствэм и лIы­кIуэхэр, психоневрологие диспансерым и дохутыр нэхъыщхьэ Удаловэ Ольгэ, республикэм и художник цIэ­рыIуэхэу Жылэ Анатолэ, Бгъэжьно­къуэ Заурбэч, Темыркъан Геннадий, Дзэгъэл Iэуес, нэгъуэщI­хэри. Дэтхэнэми къыхигъэщащ ныбжьыщIэхэм я лэжьыгъэ- хэр зэрыгъэ­щIэгъуэныр, узэ­рат­хьэкъур, сабийхэм сыткIи ядэ­Iэпы­къуну зэры­хьэ­зырыр.
- Гъэлъэгъуэныгъэм зыкърезыгъэ­хьэ­лIа, ар едгъэкIуэкIынымкIэ къыддэIэпыкъуа псоми фIыщIэ фхузощI! - жиIащ фестивалыр къызэзыгъэпэ-ща Сэхъу Ренатэ. - Зэхыхьэм цIыху ­60-м щIигъу хэтщ. Фи гукъыдэжыр къэ­тIэтыфамэ ди гуапэщ.
Зэхыхьэм фIыщIэ щыхуащIащ ­фес­тивалыр къызэрагъэпэщыным-кIэ дэIэ­пыкъуэгъу хъуахэу «Индиго», «Сол­нечный мир», «Эльбрус»-К, ­«Нальчик-сладость» IуэхущIапIэхэм я унафэщIхэм. 
Мыбы хэтахэр ирагъэплъащ «Гуапагъэм и макъамэ» псапащIэ фондым игъэхьэзыра концертым. Зэхыхьэр щиухым абы хэтахэм шар къащхъуэ­хэр, аутизмым и дамыгъэу дуней  псом къыщыз­эдащтар, уэгум ирау­тIыпщхьащ. Гъэлъэгъуэныгъэм хэта ныбжьыщIэхэм щIыхь тхылъхэмрэ ­саугъэтхэмрэ иратащ. 
Лэжьыгъэхэр мэлыжьыхьым и кIэ пщIондэ ягъэлъэгъуэнущи, сурэтхэм феплъыну, фигу ирихьхэр къэфщэ­хуну, а щIыкIэм тету псапэ фщIэ- ну иджыри Iэмал щыIэщ.

Тхыгъэри сурэтхэри
ТЕКIУЖЬ  Заретэ  ейщ.