КъМР-ни Миллет музейинде «Человек дождя» жандауурлукъ фестивальны кезиулю кёрмючю ачылгъанды. Ол аутизм аурууну юсюнден хапарны кенг жайыуну халкъла аралы кюнюне жораланнганды. 2008 жылдан бери 2 апрельде белгиленнген бу кюн тюрлю-тюрлю чакъырылыула бла ётеди. Быйыл а «Аутизм эм адам улу – хар жашау да багъалыды» деген ниет бла бардырылады.
«Человек дождя» фестиваль алтынчы кере къуралады. Аны башламчысы уа фахмулу жаш Амир Ивазовду. Фестивальгъа ол ишлеген суратны аты берилгенди. Ол кеси да аутистди. Болсада аны чыгъармалары белгили суратчыланы да сейир этдиредиле. Бюгюнлюкде Амир дизайн колледжни студентиди.
Фестивальны ачылыууна жаш суратчыла эм аланы ата-аналары бла бирге сыйлы къонакъла да келгендиле: маданият министр Мухадин Кумахов, КъМР-ни Башчысыны кенгешчиси Тюбейланы Альберт, КъМР-ни Парламентини депутатлары Текуланы Амырбий бла Фатимат Амшокова эм башхала.
Ала магъанасыны, ол кенгергенини, жаш фахмулагъа не болушлукъ этилгенини юслеринден айтхандыла. Аутизмлери болгъанланы жашаугъа кёз къарамларыны энчиликлерин белгилеп, ала суратларында тазалыкъны, ахшылыкъланы кёргюзтгенлерин чертгендиле.
- Суратны аллында кёп сюелип, сабийни кёз къарамына сейир этеме, ала тюрлю-тюрлю сагъышла туудурадыла, - дегенди Мухадин Кумахов.
Тюбейланы Альберт а фестиваль къалай башланнганын эсгерип, бюгюнлюкде уа анга сейир ёсгенин чертгенди эмда Амир Ивазовха бла аны анасы Рената Соховагъа, кёрмючню къурагъанлагъа да ыразылыгъын айтханды.
Фестивальгъа къатышханланы саны ёсгенин айтырчады – быйыл Нальчикге кеслерини чыгъармаларын Санкт-Петербургдан, Донецкден, Пятигорскдан жаш фахмула ийгендиле. Ол аутизмлери болгъан сабийлени жашауларын, чыгъармаларын жамауатха ачыкълар, аланы ангылар, фахмуларына тутхучлукъ этер эмда быллай энчи сабийлени жамауат жашаугъа сингдирир мурат бла бардырылады.
Кёрмючде уа суратла эки залда салыннгандыла. Биринчисинде асламы Амир Ивазовну чыгъармаларыдыла. Кертисин айтханда, аланы профессионал билими, уллу жашау сынауу болгъан суратчы ишлеген сунарыкъса – бояулары, сюжетлери алай сейир этдиредиле. Бюгюнлюкде, аутизм кенг жайылгъан кезиуде, быллай энчи сабийлени ангыларгъа сюйген адам, сёзсюз, бу кёрмючде болургъа керекди.
Суратланы сатып алыргъа онг болгъанын айтырчады. Ахча къолайсыз, къыйын жашау болумгъа тюшген сабийлеге искусствону школларында окъурча онгла къураргъа берилликдиле. Кёрмюч апрель айны ахырына дери ишлерикди.
Кёрмючню ачылыуундан сора сабийле жыйылып, кёк шарланы кёкге учургъандыла – ол аутизмлери болгъанлагъа бла аланы ата-аналарына тутхучлукъну халкъла аралы белгисиди.
Тикаланы Фатима.
Суратла авторнудула
