Нальчикде «Россейни халкъларыны ассамблеясы» битеуроссей жамауат-къырал биригиуню регион бёлюмюню пресс-конференциясы болгъанды. Аны Россейни Президентинде Миллетле аралы халла жаны бла советге, Россейни Халкъларыны ассамблеясыны советине кирген Хаути  Сохроков бардыргъанды. 
Тюбешиуде бек алгъа «Миллетни ёхтемлиги-2026» деген  битеуроссей премиягъа кёргюзтюуле башланнганларыны юсюнден билдирилгенди. Премия миллет маданиятны айнытыугъа эмда Россейни халкъларыны бирлигин кючлеуге  энчи къыйын салгъанлагъа бериледи.
Пресс-конференцияда Россейде Къырал миллет политиканы  РФ-ни Президентини бегими бла къабыл кёрюлген стратегиясына энчи эс бёлюннгенди. Ол 2036 жылгъа дери жарашдырылгъанын да белгилерчады. Анда баш магъаналы борчланы Хаути Сохроков эсге салгъанды:  Россейни жалынчакъсызлыгъын эмда халкъла аралы келишиулюкню сакълау, миллетлени араларында къаугъала къураргъа кюрешгенлеге къажау турууну, оруслуланы кёрюп болмау бла чыкъгъан проблемаланы кетериу, жамауатны оюмуну магъанасын кётюрюу, регионлада миллет политиканы кючлеу.
Бу тюбешиуню къурагъанла Россейни Халкъларыны ассамблеясы Владимир Васильевни башчылыгъында къыралны келир къадарына сансыз болмагъан адамланы бирикдиргенин белгилегендиле. Бу биригиу, керти окъуна, тюрлю-тюрлю миллетлени келечилерини бирликни кючлендириу эмда жамауатны къолайлыгъын кётюрюуню баш магъаналы борчларын тамамлау жаны бла хайырлы бирге ишлеулерини, байламлыкъларыны аламат майданы болгъанды.
Ассамблеяны баш борчлары уа - къырал власть органланы бла миллет биригиулени араларында байламлыкъланы къурауду эмда законла чыгъарыугъа бла мамырлыкъны тохташдырыу мадарлагъа къатышыуду. Аланы толтурур мурат бла халкъла аралы форумла бардырыладыла. Алада тюрлю-тюрлю регионланы келечилери сынауларын бир бирлерине билдиредиле, байламлыкъла къурайдыла.
Хаути Хазритович бу премия тёрели россейли ниет-адеп-къылыкъ хазналаны сакълау эмда кючлендириу жаны бла къырал политиканы 2024-2026 жыллада жашауда бардырыуну планына киргенин эсгертгенди. 
Белгиленнген борчланы магъаналылыкъларын эсге алып, Къырал саугъаны жумушларын бардырыугъа Россейни Президентинде Миллетле аралы халла жаны бла совети, РФ-ни Къырал Думасыны Миллетлени ишлери жаны бла комитети, Миллетлени ишлери жаны бла федерал агентство, РФ-ни Жамауат палатасы, Москваны правительствосу билеклик этедиле.
- Алагъа къырал миллет политика бла байламлы проектлени жашауда бардыргъан жамауат эм коммерциялы болмагъан  биригиуле, ана тилледен окъутхан устазла, журналистле, блогерле, къолдан устала, этнобизнес бла кюрешгенле, чыгъармачы коллективлени бла чыгъармачы биригиулени келечилери къатышыргъа боллукъдула, - дегенди Хаути Сохроков.
Бу конкурсха проектлени бирге бардыргъан къауумла къатышаллыкъмыдыла деген соруугъа пресс-конференцияны къурагъанла хау деп жууаплагъандыла.
Пресс-конференцияда премияны «Россейни халкъларыны бирлигине къуллукъ этиу», «Россейни халкъларыны миллет тиллери», «Россейни халкъларыны маданиятлары», «Кёп миллетли Россей медиада», «Эм аламат этножумушла», «Къыйматлы ишлеген башчы» деген номинацияларыны юслеринден тынгылы хапар айтылгъанды. Сора, Россейни халкъларыны бирлигини жылына жоралап, «Бирликни кючю» деген энчи номинация да болгъаны чертилгенди.
Тюбешиуню кезиуюнде быллай шартла да эшитилгендиле: былтыр бизни республиканы келечилерини санындан «Кюн шахар» сабий академияны келечиси Жангоразланы Нюржан «Поколение Ум» деген номинацияда Шимал-Кавказ федерал округда биринчи болгъанды, Къабарты-Малкъарны Жамауат палатасыны таматасыны экинчиси Людмила Федченко  СКФО-да «Жамауат бирликни жалчытыугъа эмда миллетле аралы келишиулюкге  къыйын салгъаны ючюн»  номинацияда «Биринчи даражалы лауреат» деген атха тийишли болгъанды.
Пресс-конференциягъа къатышханла Россейни Халкъларыны ассамблеясына, ол санда «Миллетни ёхтемлиги-2026» конкурсха,  салыннган борчланы магъаналы болгъанларын айтып, аны бла бирге ана тиллени бюгюннгю болумлары аланы къайгъы этдиргенлерин билдиргендиле. Ол санда школлада ана тилледен китапла жетмегенлерин да жарсып айтхандыла.    
Хаути Сохроков, ол шарт аны да къайгъы этдиргенин айтып, аллай китапла жетишмеген билим бериу учрежденияладан заявкала берилселе, болушургъа айтханды.
Алай бла пресс-конференцияны къурагъанла бла анга къатышханла инсанланы миллет энчиликлерин сакълауну амалларын сюзгендиле, келир тюбешиуде къараллыкъ баш сорууланы да белгилегендиле.
Эсгертиу: быйыл заявкаланы биринчи сентябрьге дери берирге боллукъду. «Миллетни ёхтемлиги-2026» премияны Шимал-Кавказ федерал округда уруму 8-9 октябрьде Нальчикде бардырыллыкъды. Аны ахыр кесеги эмда лауреатланы саугъалау Москвада ётерикди. Конкурсха къатышыргъа сюйгенле заявкаларын премияны порталына (https://гордость-нации.рф/ жиберирге керекдиле.

Кючмезланы Айза.