КъБР-м и Iэтащхьэ КIуэкIуэ Казбек Аб­хъаз Республикэм щекIуэкI «Абхъаз - къэ­кIуэнум хуащI хэлъхьэныгъэхэр» дунейпсо экономикэ зэхуэ­сыш­хуэм хэтщ. 

Урысейм и лIыкIуэ гупым я пашэщ Урысей Федерацэм и Президентым и Администрацэм и УнафэщIым и япэ къуэдзэ Ки­риенкэ Сергей.
Абхъаз Республикэм и Президент Гунбэ Бадрэ форумым хэт хьэщIэхэм фIэхъускIэ захуигъэза нэужь, щIыналъэм иIэ ехъу­лIэ­ныгъэхэм тепсэлъыхьащ, абы и социально-экономикэ зыужьы­ныгъэмкIэ гулъытэ нэхъ зыхуащI Iуэхухэр къигъэлъэгъуащ.
Кириенкэ  Сергей и гугъу ищIащ Урысеймрэ Абхъазымрэ я зэпы­щIэныгъэм адэкIэ зэрыз­ра­гъэу­жьынум, республикэм и къэралыгъуэмрэ щхьэхуитыныгъэмрэ зэрагъэ­быдэнум, абы и эконо­микэ зэфIэкIым.
АдэкIэ пленарнэ зэхыхьэм ­Урысейм и хэгъэгухэмрэ Абхъа­зымрэ лъэныкъуэхэм я фейдэ зыхэлъ унэтIыныгъэхэмкIэ зэры­зэ­дэ­лэжьэну щIыкIэм щы­тепсэ­лъыхьащ.
Ди къуэш Абхъаз Республикэм Къэбэрдей-Балъкъэрыр сату-эко­номикэ и лъэныкъуэкIэ и Iуэ­хущIэгъу нэхъыщхьэхэм ящыщщ. Ап­хуэдэуи ухуэныгъэ, псэупIэ-коммунальнэ хозяйствэ, курорт-рекреационнэ комплекс, узын­шагъэр хъумэн, щэнхабзэ, щIалэгъуалэ политикэ, мэкъу­мэш хозяйствэ IэнатIэхэм я зэ­пы­щIэныгъэхэми зыщрагъэужьыну IэмалыфIхэр щыIэщ.
КIуэкIуэ Казбек хэтащ Абхъаз Республикэм социальнэ, экономикэ я лъэныкъуэкIэ зыIэ­ригъэхьа ехъулIэныгъэхэр утыку къыщ­рахьэ гъэлъэгъуэныгъэми.
Къэбэрдей-Балъкъэрым и лIыкIуэхэр хэ­тынущ Инвестицэмрэ экономикэр убзы­хунымрэ, мэкъумэш хозяйствэм, гъуэгу транспорт ухуэныгъэм, туриз­мэм, нэгъуэщI унэ­тIыныгъэхэми зегъэужьыным теухуауэ екIуэкIыну «стIол хъурейм».
Апхуэдэуи къапэщытщ щIыналъэхэр адэ­кIэ зэрызэдэлэжьэнум теухуа IуэхухэмкIэ зэгу­ры­Iуэныгъэ  зэращIылIэну.