Санкт-Петербург и Губернаторым и Кубокыр дзюдомкIэ къэ­хьыным хуэунэтIауэ ныбжьыщIэхэм я дунейпсо зэхьэзэхуэу а къа­лэм иджыблагъэ щекIуэкIам къикIыу хъыбар гуапэ къы­тIэрыхьащ. 

УФ-м дзюдомкIэ и командэ къыхэхам хэт, ди къэралым и чемпион, европэ чемпионатым етIуанэ, дуней псом ещанэ щыхъуа, Тажышхуэр мызэ-мытIэу къэзыхьа, дзюдоист цIэрыIуэ Блий Iэюб «УФ-м спортымкIэ щIыхь зиIэ и мастер» цIэ лъапIэм и дамыгъэр ­къритыжащ Санкт-Петербург къалэм физ­куль­турэмрэ спортымкIэ и комитетым и тхьэмадэ Шантырь Антон.
Гъатхэпэм и 25-м, Санкт-Петербург къалэм и губернатор Беглов Александр Смольнэм щригъэблэгъащ къэ­рал дамыгъэхэр, УФ-м и Президентым и фIы­щIэр зыхуагъэфэща, 2025 гъэм ехъулIэныгъэфIхэр зиIа, щэнхабзэм, гъуазджэм я лэ­жьакIуэхэр, спортсмен цIэрыIуэхэр. Абыхэм яхэтащ Блий Iэюби. Бег­лов Александр ди щIалэм къритыжащ «Къэ­ра­лым и пащхьэм щиIэ фIыщIэхэм папщIэ» орденым и етIуанэ нагъыщэм и медалыр. 
Фигу къэдгъэкIыжынщи, ди спортсменхэр я ныпым щIэту бэнэну хуитыныгъэ нэгъабэ къратыжа нэужь, псом япэу текIуэныгъэ ди къэралым къыхуэзыхьар Блий Iэюбщ. Абы и цIэкIэ УФ-м и гимныр кърагъэуащ, ныпри щыгум щаIэтащ. 
Дохъуэхъу Iэюб УФ-ми КъБР-ми я щIыхьыр спорт утыкушхуэхэм лъагэу илъэс куэдкIэ щи­Iэ­тыну. 
ХЬЭЩЫКЪУЕЙ Олег.
Сурэтым: Беглов Александр медалыр Iэюб къритащ