Элбрус районда халкъла аралы байламлыкъгъа бла шуёхлукъгъа хар заманда да уллу эс бургъандыла. Тырныауузда кёп миллетле жашайдыла. Ала барысы да кеслерин туугъан жерлериндеча сезедиле. Ол а шуёхлукъну кючюнденди.

Бу кюнледе Тырныауузну Отарланы Керим атлы 1-чи лицейинде болгъан аламат байрам да анга толусунлай шагъатлыкъ этеди. Мектепни таматасы Мухамед Абубакирович Лихов эрттеден таматалыкъ этген школунда кёп миллетли устазланы бла окъуучуланы ариу байламлыкъда жашаргъа юйретгенди. Кеси да малкъар тилни айныууна, аны окъутуугъа да уллу эс бурады. Малкъар халкъны жангырыууну кюнюне хар жылдан да энчи кёзден къарайды. Ол байрам, бир кюн бла чекленип къалмай, бир ненча кюнде, башха-башха урумла бла ётеди.

Бу кюнледе лицейде таматаны башчылыгъында, аны юйретиу жаны бла орунбасары Галина Решетникова къурап, «Жаша, жашна, таулу халкъ!» деген уллу фестиваль къуралгъанды. Байрам хал босагъадан окъуна туура эди. Фойеде миллет ашладан жарашдырылгъан ариу кёрмюч къурагъандыла. Къонакъланы таулу ашланы татыуларын кёрюр онглары болгъанды. Мектепни хар классы энчи тепсиле жарашдыргъандыла.

– Малкъар халкъны миллет байлыгъын сакълаугъа не заманда да итиннгенбиз. Мындан ары да, ариу адетлеге бойсуна, аланы сакълай, тёлюледен тёлюлеге ётдюрюу, миллетле араларында шуёхлукъну эм татлылыкъны сакълау баш борчларыбыздан бири болгъанын бир заманда да унутмагъыз. Маданият энчилигибизге хурмет эте, абаданланы сыйлай, аланы кёллерин ала, ариу тёлю болуп ёсеригизни излейбиз. Къарындашларым бла эгечлерим, сизни арагъызда анча жыл жашагъаныма, бет жарыкълы уруннганыма къууаннганымы, ёхтемленнгеними жашырмай айтама. Малкъар халкъны алгъын тёлюлери сынагъан къыйынлыкъла бир заманда да жокъламасынла. Мамыр тангла атсынла, насыплы юйюрле къуралсынла, саулукълу сабийле туууп, миллет хар замандача, ёхтем атын, намысын бла даражасын бийикде тутсун. Анга себеплик этерикле уа сизсиз, багъалы сабийле. Алайды да, мен сизни, бизни барыбызны да бу огъурлу байрам бла алгъышлайма! - дегенди Мухамед Лихов, сабийлеге эм жыйылгъан къонакълагъа айланып айтхан сёзюнде.

Лицейде окъуучуланы чыгъармачылыкъ жаны бла фахмуларын айнытыугъа уллу эс бурадыла. Атала бла анала, устазла да уллу кёллю болмайдыла. Концерт программаны байлыгъы, кенглиги, шатыклыгъы да аны кёргюзтгенди. Халкъла араларында байламлыкъны бла шуёхлукъну фестивалында малкъар, орус, эм башха тилледе да жырла айтылгъандыла. Миллет тепсеулени уа къайсы бирин айтайыкъ – бири биринден аламат. Назму айтыуда тилни шатыклыгъы, башха миллетли сабийлени малкъар тилде назмула окъугъанлары махтаулу эди.

Къонакъланы кёллерин бютюн къууанчлы этген а лицейни 5-чи номерли сабий садыны балачыкълары бла аланы юйретиучюлерини къатышыулары болгъанды. Керти да, тилге сюймеклик сабийликден сингеди. Ана тиллеринде назмула айтыулары, жырланы макъамларын тюз келишдире билиулери аланы хунерликлерин кёргюзтгендиле. Сахна оюнлада жетишимлери уа саулай республикагъа да белгилидиле. Постановкалары, къарагъанланы кёп тюрлю сезимлерин къозгъай, ыразы этгенди. Андан сора да, юйретиучюлени энчи ишлери эсде къаллыкъды. Кёп миллетли юйретиучюлени малкъар тилге берген хурметлери къараучуланы кёллерин кётюргенди. Аланы биргелерине келип, къонакъланы алгъышлагъан таулу келин Моллаланы Зарета, районну тиширыуларыны советини таматасы, байламлыкъда жашау этиу тюз жорукъ болгъанына шагъатды, дегенди.

Лицейде байрамны къурагъанла Галина Решетниковагъа, Байдаланы Аминатха, Светлана Кунашевагъа, Бапыналаны Илонагъа, Балаланы Миленагъа бла Мусукаланы Мариямгъа къараучуланы бла ата-аналаны атларындан уллу ыспас этебиз. Халкъла араларында байламлыкъны бла шуёхлукъну кючлеу къырал политиканы борчларындан бириди. 

Ызы бла лицейни Отарланы Керим атлы музейинде ана тилден бла адабиятдан окъутхан устазла Ёзденланы Светлана, Элжорукъаланы Зухура, Анжела Бижоева, Ёзденланы Замира, Ахматланы Любовь къурап адабият ингир болгъанды. Ол да Малкъар халкъны жангырыууна аталгъан эди. Сабийле, халкъны тарыхындан билгенлерин айта, билмеген затларын да сурай, назмула окъуй, ана тиллеринде аламат сагъат ётдюргендиле. Ишлерине былай жууаплы кёзден къарагъан устазлагъа тилни билдириу жаны бла ышанабыз.

Темуккуланы Асият