«Къабарты-Малкъарны жигитлери» деген  регион программа КъМР-ни  Башчысы  Казбек Коковну башламчылыгъы бла озгъан жылда  ишлеп башлагъанды. Быйыл да ол андан ары тири  бардырылады.  Анга тийишлиликде  СВО-ну ветеранлары инсанлыкъ жашауда кеслерине жер табарча, жюреклери жаратхан, къырал эмда муниципал къуллукълада ишлерге  юйренирча онгла къураладыла.

Бусагъатда  ала,  программагъа къатышханла,  стажировкаладан ётедиле, онлайн амал бла усталыкълагъа юйренедиле. Алай бла, профессионал усталыкъларындан айырылмай, билим алыргъа, сынау жыйышдырыргъа да онг табадыла.

  Кантемир Токмаков программагъа къатышханладан бириди. Ол СВО-гъа  2023 жылны сентябрь айында  кеси ыразылыгъы бла    баргъанды. Росгвардияны 116-чы бригадасына тюшгенди. Аны борчу Белгород областьда къыралны чеклерин къоруулау эмда Харьков областьны Волчанский тийресинде аскер буйрукъну толтуруу эди.

«Энчи аскер операциягъа къатышхан кезиуюмде мен бир затха тюшюннгенме: бир бирге къайгъырыу, билеклик этиу къаллай къыйынлыкъланы да хорларгъа болушадыла. Къыралыбызны, республикабызны да тамблагъы кюнюн мамырлы эмда монглу этер, айнытыр ючюн,  барыбыз да кючюбюзню  бирикдирирге керекбиз»,- дейди Кантемир.

 Жашны  къадары программа аны  усталыкъ алырына себеплик этиу бла чекленип къалмай, жамауатда биригиулюкню кючлеуге да къуллукъ этгенине шагъатды.

«Къабарты-Малкъарны жигитлери»  программа къыралны бла жамауатны араларында хайырлы байламлыкъланы юлгюсюдю. Аны хайырындан энчи операцияны ветеранлагъа къырал  къуллукълада да жетишимли урунурча эмда республикабызны, саулай Россейни да,  социал-экономика  айныууна юлюшлерин къошарча онгла къураладыла.

Холаланы Марзият.