Бараз кюн Нальчикни экинчи номерли мектебинде Малкъар халкъны къыраллыгъы тохташдырылгъан кюннге  аталгъан уллу байрам болгъанды. Мектепни уллу отоуунда кёп адам жыйылгъанды, устазладан, окъуучуладан сора да,  чакъырылгъан сыйлы къонакъла. Аланы араларында Таукенланы Галина, Сабанчыланы Арипа, Абшаланы Магомет, Османланы Хыйса. Аладан сора да,  белгили  артистлерибиз.

Байрам  башланырдан алгъа къыралыбызны, республикабызны  гимнлери согъулду да келгенле алагъа ёрге  сюелип тынгыладыла. Андан сора школну директору Людмила Михайловна Пешкова сёлешгенди. Келген къонакълагъа жюрек ыразылыгъын билдиргенден сора: «Малкъар халкъ  туугъан жеринден зор бла  кёчюрюлгени  терс иш болгъанды, аллай ишле энди бир заманда да къайтарылмасынла. Сиз, жаш тёлю, келир жылланы  адамлары, аллай ишле кёрмей жашагъыз. Бир биригизге иги болугъуз, хурмет этигиз. Жашауугъуз мамырлы, къууанчлы болсун», - дегенди.

Андан сора Абшаланы Магомет  сёлешгенди. Ол атасы Тахир урушну экинчи айында сермешледен биринде ёлгенин, сюргюнню уа юч жылында  сынагъанын  айтханды.

Магометден сора Таукенланы Галина, Сабанчыланы Арипа, Османланы Хыйса да сёлешгендиле. Ала да кёчгюнчюлюкню юсюнден  кёргенлерин, билгенлерин, эшитгенлерин айтхандыла. Бу ишни  къурагъан устазлагъа, школну директоруна да уллу ыспас этгендиле.

Ызы бла  Тёппеланы Алим, Бийланы Аслан, Теммоланы Джамиля, Башийланы Алина, Атабийланы Алибек, Чабдарланы Алёна, Лёлюкаланы Малика, Заммайланы Лейла  жыр  айтхандыла.  Аладан сора  сахнагъа Жанатайланы Ирен башчылыкъ этген «Кавказны ёхтеми», Зезаланы Ахмат юйретген «Асса» тепсеу  къауумла чыкъгъандыла.

Малкъар халкъны къыраллыгъы  къайтарылгъан кюн Нальчикни экинчи номерли  мектебинде уллу сыйлы байрам болуп ётгенди. Бу ишге  аны къурагъанла уллу эс бургъанлары кёрюнюп тура эди.  Ары келген  къонакъла, жырчыла да,  бары да халкъ аллында жюрюген адамла, мектепни директоруна, устазлагъа да  жюрек ыразылыкъларын билдиргендиле.

Лейлун улу Х.