Белгилисича, Къабарты-Малкъарда Китапны сюйгенлени жамауат биригиуюнде иш бир заманда да тохтамайды. Биригиуню исполкомуну советини таматасы Наталья Шинкарёваны башчылыгъында ол баргъанлай турады. Анда жангы китапла бла, аланы жазгъанла бла шагъырейлендириу, жангы чыгъармаланы белгилеу, юбилярлагъа аталып «Къалай эшитилир сёзюбюз артда…»  деген эм башха  эришиуле, окъуула, республиканы жазыучула бла байламлы жерлеге барыу, китапланы кенг жайыу ишле бардырыладыла. Къайсы бирин санагъын аланы?!

Бу биригиуде «Жанлары болгъан тизгинле»  деген клуб да ишлейди. Анга жюрюгенле беш жылны ичинде хар баш кюн жыйылып, жангы чыгъармаланы окъуйдула, аланы жазгъанла бла тюбешиуле къурайдыла.  Ма бу кюнледе биригиуде эсде къалырча иш болгъанды. Биринчиден, ол окъуулагъа жюрюгенле белгили жазыучу, поэт, кёчюрмечи Мусукаланы Сакинат бла эмда «Минги-Тау» журналны жууаплы секретары Шауаланы Разият бла тюбешгендиле.

Экинчиден а, бу жолгъу тюбешиуге Москвадан Китапны сюйгенлени халкъла аралы биригиулерини таматасы, Москвада Экслибрис эм гитче  китапланы музейини директору Людмила Шустрова келгенди. Ол шарт а Нальчикде Китапны сюйгенлени биригиуюню ишине, аны адабият жыйылыуларына регионда угъай, ара шахарда окъуна эс бёлюннгенине шагъатлыкъ этеди.

Мусукаланы Сакинат бла тюбешиу  «Бусагъатдагъы малкъар адабият эм аны тиширыу бети» деген ат бла бардырылгъанды. Наталья Шинкарёва  айтханнга кёре, аны окъуучулары – жыл санлары келген тиширыула – Сакинатны Москвада чыкъгъан «Уча туруп къоркъургъа жарамайды…» деген китабын къайтарып окъугъандыла. «Литературная Кабардино-Балкария»  журналда басмаланнган хапарларына да артыкъ эс бёлгендиле эм аны бла тюбеширге сюйгендиле. Наталья Петровна адабият окъуулада Сакинатны чыгъармаларына энчи эс бёлюннгенин, аны жазгъанлары ол окъууланы программаларына киргенлерин, аланы клубха жюрюгенле сюйюп окъугъанларын да белгилегенди.

Ызы бла Мусукаланы Сакинатны башында айтылгъан журналда чыкъгъан хапарларындан экисин, поэтни назмуларыны къауумун да окъугъандыла. Андан сора жазыучугъа соруула бергендиле.  Ол а сабийлигини, андан ары жашаууну, чыгъармачылыкъ жолуну юслеринден толу хапар айтханды.

Кёп затны юсюнден соргъандыла тюбешиуге келгенле. Малкъар халкъны къыраллыгъы къайтарылгъаныны байрам кюнлеринде, айхай да, кёчгюнчюлюкню сагъынмай къояргъа да болмагъандыла. Аны юсюнден малкъар жазыучула кёп жазгъанларын, Сакинатны чыгъармаларыны аслам жигити ол сынаудан ётгенлерин да айтырчады. «Журналист къадарымда окъуна, кимни юсюнден жазама десем да, ол халкъымы ол кезиуюне тиймей къояр амал болмайды. Мен къагъанакълай келгенме Къыргъызстандан, кёрмегенме, сынамагъанма ол къыйынлыкъланы, алай а жюрегим ауруйду, анда миллет ётген сынауланы – ачлыкъны, жаланнгачлыкъны – сагъынсала, ол затланы къайтып эшитсем. Жазсам да – алай. Баям, ол бизни къаныбызгъа киргенди да, энчи код болуп къалгъанды», – дегенди ол.

Жазыучу дайым артха къарап турууну да дурус кёрмейди. Алай а, халкъынг,  къыйын сынауладан ётюп, халкълай къалгъанын унутургъа жарамайды. Ол ёхтемлик сезимни туудурмай къоймайды къарт, жаш жюрекледе да. Бу байрам бизге энчиди, уллуду, магъаналыды, дейди.

Шауаланы Разият да бир къауум соруугъа жууапла бергенди. Ол ана тилибизде чыкъгъан журнал не заманда да жазыучуланы атларын, жангы чыгъармаларын белгили этерге энчи эс бёлгенин, кёплени уллу адабиятха жоллары андан башланнганларын эсгертгенди. Китапны сюйгенлени жамауат биригиуюню таматасы Наталья Шинкарёва ыразылыгъын билдиргенди,  кёп жерледе жабылгъанда, бизни республикада бу биригиу ишлеп тургъанын белгилеп.

Москвачы къонагъыбыз Людмила Владимировна, Китапланы сюйгенлени биригиуюню тарыхындан бир къауум шарт келтирип, бери келип, клубха жюрюгенле бла танышыргъа эрттеден излегенин, кёргени уа аны суннганындан иги болгъанын эмда бек къууандыргъанын да айтханды. 

Тюбешиу жылыу эмда ачыкъ халда ётгенди. Анга къатышханла, аны алайлыгъын белгилеп,   Наталья Шинкарёвагъа ыразылыкъларын билдиргендиле.