Москвада «Россей» миллет араны регионлада бёлюмлерин къурау бла байламлы проектлени къоруулау болгъанды. Жыйылыугъа РФ-ни Президентини Администрациясыны Башчысыны биринчи орунбасары, «Россей» миллет араны къурау комитетини председатели Сергей Кириенко, бу  къурау комитетни председателини орунбасары Максим Орешкин эм сагъынылгъан араны генеральный директору Наталья Виртуозова къатышхандыла. Къабарты-Малкъар кёргюзтген проект къабыл этилгенди эмда къурау комитетден анга себеплик боллукъду, деп билдиргенди КъМР-ни Башчысы Казбек Коков MAX платформада кесини энчи каналында.
Бу проект республикада жашагъанла болдургъан жетишимле арагъа келгенлени туура этерикди, энчи аскер операциягъа къатышхан жигитлерибизни юсюнден хапарларыкъды, андан сора арагъа баргъанла маданият хазнабыз бла шагъырейленирикдиле, табийгъатыбызны  тамашалыгъына къарарыкъдыла эмда къонакъбайлыгъыбызны кёрлюкдюле.
Эсигизге салайым, «Россей» миллет араны бёлюмлери Президентибиз Владимир Путинни буюрууу бла къыралны битеу регионларында ачыллыкъдыла. Ол оноу «Россей» кёрмюч жетишимли къуралып бардырылгъандан сора этилген эди.
Ол кёрмючде регионла кеслеринде болгъан жетишимлени кёргюзтген эдиле.  Аны хайырындан социал, маданият эмда иш бла байламлы байламлыкъла кёп миллетли уллу къыралны ичинде  жашагъанланы бирикдиргенди.  
«Россей» миллет араны бёлюмю Къабарты-Малкъарда Шогенцуков атлы орамда, Правительствону юйюню бла Келишиулюкню майданыны  аллында орналлыкъды.
Арада орналлгъан экспозиция республиканы эм белгили жери Элбрусну сыфатына кёре къураллыкъды. Ол жетишимни, кючню эм бийикликлеге жолну кёргюзтеди. Къураллыкъ араны майданында кёп тюрлю регион, битеуроссей эм халкъла аралы даражада тюрлю-тюрлю тюбешиуле, ол санда маданиятда, искусствода, билим бериуде, туризмде, предпринимательство эм башха жаны бла  жумушла да бардырыллыкъдыла. 
Бек ышанама ол жер Къабарты-Малкъарда жашагъанлагъа эм бизге къонакъгъа келгенлеге республиканы жетишимлери бла шагъырейленирге аламат жер боллугъуна, деп белгилегенди республиканы оноучусу.