Озгъан ыйыкъда Ханты-Мансийскде «Дух огня» деген XXIV Халкъла аралы кинофестиваль ётгенди. Анга Россейни, Европаны, Юг эм Шимал Американы, Азияны, Жууукъ Востокну къыралларындан режиссёрла къатышхандыла. Анда 56 конкурс иш кёргюзтюлгенди. Аланы араларында жаш режиссёр Толгъурланы Саидни къысха метражлы «В горах. Он» деген фильми да болгъанды.
Конкурс ишлеге багъа берген къауумгъа уа белгили россейли режиссёрла бла актёрла Фёдор Бондарчук, Леонид Ярмольник, Евгений Моргулис эм дагъыда башхала киргендиле.
Эришиуню «Алтын тайга» деген баш саугъасына жюри испанлы режиссёр Эва Лопесни «Глухая» деген кинолентасын тийишли кёргенди. Россейли жаш режиссёрладан а Антон Мамыкинни «Космос засыпает» деген фильмине бийик багъа берилгенди.
Битеу да конкурс ишледен жаланда алтысы белгиленнгендиле саугъала бла. Толгъурланы Саидни «В горах. Он» деген фильми «Серебряная роза» деген энчи саугъагъа тийишли болгъанды.
Былтыр Толгъур улуну ол фильми Нижний Новгородда бардырылгъан «Новое движение» деген фестивальда кёргюзтюлген эди. Энди уа аны бек фахмулу 6 режиссёрну санына киргени уллу жетишимди.
Эсигизге салайыкъ, Толгъурланы Саид Москвада Жангы кинону школун бошагъанды. Фильмлеринде ол жашауну суратларгъа сюеди, кино алыуну назмула жазыу бла тенглешдиреди. Фахмулу жаш адамны оюмуна кёре, фильмлени аз къоранчла бла алдырыргъа итинирге керекди. Миллион сомла къоратылгъан кинолагъа окъуна кёпле къарамайдыла.
Эсгертиу: «Дух огня» - жаш режиссёрлагъа кеслерин кёргюзтюрге онг берген фестивальды. Быйыл ол «Дети в кино» деген магъана бла бардырылгъанды. Сабийни айныуу, акъылбалыкъ болууу, аны оюмларыны тюрлене баргъанлары, шёндюгю дуниягъа не кёзден къарагъаны да бюгюннгю кинематографха сейирди.
Таппасханланы Аминат.
