Бахъсэн щIыналъэм хыхьэ ХьэтIохъущыкъуей къуажэм дэт курыт еджапIэ №3-м щагъэлъэпIащ Усыгъэм и дунейпсо махуэр. НыбжьыщIэхэм яIущIащ усакIуэ Гугъуэт Заремэ. Iуэхур къызэригъэпэщащ адыгэбзэмкIэ егъэджакIуэ Жылау Жаннэ.

 ЕджакIуэ цIыкIухэр Заремэ и усэхэм къеджащ, къыщыIуэта гупсысэ и лъэны­къуэкIэ зэпкърахащ. Хэкум, щIыуэпсым, лъэп­къым, адыгэбзэм, адэ-анэм теухуа­­хэм къеджа нэужь, ахэр тепсэлъыхьащ щхьэж и гум нэхъ дыхьахэм. УсакIуэм иратащ литературэм теу­хуа упщIэ гъэщIэгъуэнхэр: «Адыгэшым и теплъэр уи усэхэм куэдрэ къыхощ, ар яхэп­лъагъу­кIрэ псэущхьэхэм?», «Япэу птха усэр пщIэжрэ?», «Адыгэ усакIуэхэм е тхакIуэхэм ящыщу хэт нэхъ уи гум дыхьэр?», «Студент гъащIэр, журналист IэщIагъэр къыщIыхэпха щхьэу­сы­гъуэр…», «УсакIуэм хьэл-щэн гуэр хэлъ нэгъуэщIхэм емыщхьу?», «Усэ птха нэужь, хэт япэу къебгъаджэр?», «Сыт узыгъэу­сэр?», нэгъуэщIхэри. 
Усэным зэрыдихьэхам щытепсэлъыхьым Гугъуэт Заремэ жиIащ ар анэ лъагъуныгъэм къызэрыхэкIар, япэу абы зэрытетхыхьар. Адыгэшыр фIыуэ щIилъагъум щIэупщIа ­щIалэ цIыкIум и упщIэм пэджэжащ сабии­гъуэм къыхиха зы гукъэкIыжкIэ:
- СыщыцIыкIум, псыхъуэмкIэ щыIэ ди жыг хадэм ситу, хадэбгъумкIэ куэдрэ блахурт шы гуартэ. Шыхэр зэпысплъыхьырт, я дахагъэм ситхьэкъуу. Абыхэм яхэтт шыщIэ цIыкIухэр, натIэху, лъакъуэху, кIапэху хъужахэу. Псом хуэмыдэжу абыхэм сехъуапсэрт… Абы щегъэжьауэ шыр фIыуэ солъагъу. Адыгэм и гъа­щIэм ар зэрыхэтымрэ адыгэшым и тхыдэ къулеймрэ абы хэлъхьэжи, шым ухуэмыусапIэ иIэ?! - жиIащ.
Усэным нэхъыбэрэ и гур къы­хуэзыгъэушым щытепсэлъыхьым, къыхигъэщащ и дэтхэнэ усэми щIыуэпсым теухуа гуп­сысэ зэрыпхышар, псом хуэмыдэжуи къы­щалъхуа къуажэм и теплъэр гупсысэ къигъэхъуапIэ зэрыхуэхъур. УсакIуэм хэлъын хуей хьэл нэхъыщхьэу Заремэ къыхигъэщащ пэ­жа­гъыр, псэм къыIэпыкI усыгъэм фэры­щIагъэ хэплъхьэ зэрымыхъунур. Балигъ хъуа нэужь, ныбжьыщIэхэр еджэну чэнджэщ яритащ КIыщокъуэ Алим и «Лъапсэ», Шинкубэ Бэгърат и «ЖылакIэ» романхэм. УсакIуэм жи­Iащ Хэкум щыпсэу адыгэ тхакIуэхэм нэ­мыщI, хэхэс адыгэ литературэ зэрыщыIэр - хамэ щIыпIэхэм щыпсэу ди лъэпкъэгъухэм тха­кIуэхэр, усакIуэхэр зэрахэтыр икIи абыхэм я тхыгъэхэм Хэку лъагъуныгъэр лъэщу къы­зэ­рыщыгъэлъэгъуар. Заремэ тепсэлъыхьащ Хьэх Сэфарбий зи унафэщIу щыта «Шыхулъа­гъуэ» литературэ зэгухьэныгъэр сэбэп къы­зэ­ры­хуэхъуами. ЕджапIэ нэхъыщхьэм щыщIэса илъэсхэр игу къигъэкIыжу, Заремэ къри-Iуащ абы щезыгъэджа, и диплом лэжьыгъэр щитхым и щIэныгъэ унафэщIу щыта, ноби куэдрэ упщIэжэгъу ищI профессор Бакъ Зерэ и цIэр. 
Заремэ и псалъэхэм щыхьэт техъуащ Жы­лау Жанни:
- Зареми сэри Бакъ Зерэ и деж щыттхауэ щытащ ди диплом лэжьыгъэхэр. Университетым дыщIэсыху, тхакIуэхэр, усакIуэхэр, уэ­рэ­джыIакIуэхэр, макъамэтххэр, щIэныгъэлIхэр къытхуригъэблагъэурэ дигъэцIыхуащ. Абы нэмыщI, ЩоджэнцIыкIу Алий и гъащIэм теухуауэ екIуэкIа «Нанэ» проектым дыхэту, лъэпкъ IуэхукIэ зекIуэ Тыркум дишауэ щытащ студент гуп. А псор ди гум гуапэу илъщ, - жиIащ абы. 
Курыт еджапIэм и унафэщIым и къуэдзэ Нэгъуей Заремэ жиIащ еджакIуэхэм папщIэ мыпхуэдэ зэIущIэхэр зэрыщхьэпэр, апхуэдэ щIыкIэкIэ ахэр художественнэ тхыгъэ нэхъыбэ еджэну зэрыпхутегъэгушхуэр. 
- Адыгэ псалъэм и дахагъэ щызыхэтщIащ нобэ ныбжьыщIэхэр къызэджа уи усэхэм. ЩIэблэм я дежкIэ куэд и уасэщ, тхылъкIэ зэ­рагъэцIыху къудей мыхъуу, усакIуэм езыхэр IущIэну, епсэлъэну. Ди еджакIуэхэм я гум илъынущ мы зэIущIэр, тхыгъэщIэ птхыхукIи еджэнущ. Мыр адыгэбзэм и къарум, и куп­щIэм гу лъегъэтэнымкIэ зы Iуэху дахэщ, - жи­Iащ еджапIэ библиотекэм и лэжьакIуэ, школ театр къызэригъэпэщауэ цIыкIухэм ядэлажьэ Шыбзыхъуэ Анжелэ. 
Гугъуэт Заремэ ныбжьыщIэхэм ехъуэхъуащ бзэм и IэфIыр зыхащIэу, литературэм нэхъри ди­хьэхыу, ерыщу еджэну. ЯжриIащ я упщIэ гъэу­выкIэри усэ къеджэкIэри игу зэрырихьа­р. 
ХЬЭГЪЭБАНЭ  Залинэ.