Рэмэдан мазэм и иужьрей махуэм ­КъБР-м и Iэтащхьэ КIуэкIуэ Казбек  «Лашын» шхапIэ-хьэщIэщым хэщхьэж  къы­щызэригъэпэщащ. Гъатхэпэм и 20-м ар хуэзащ КъБР-м и Муслъымэнхэм я IуэхущапIэм и унафэщI, муфтий Дзасэжь Хьэзрэталий икIи НэщIикIыж хьидымкIэ ехъуэхъуащ.  

«Къэбэрдей-Балъкъэрым и Муслъымэнхэм я IуэхущIапIэм и унафэщI Дзасэжь Хьэзрэталий Уэлий сыхуэзэри республикэм ис муслъымэнхэм Рэмэдан мазэр зэриухамкIэ иджыри зэ сехъуэхъуащ, - щытеп­сэлъыхьыжащ а Iуэхугъуэм КIуэкIуэ Казбек «Макс»-м щиIэ и напэкIуэцIым. - Мамырыгъэ, фIыгъуэ, Iиман быдэ, гупсэхугъуэ, узыншагъэ, гъащIэ кIыхь фиIэну, фщIэнрэ фшхынрэ вгъуэту фыпсэуну сыныво­хъуэхъу. Ислъам диным епха махуэшхуэхэм я зым ехьэлIа дауэдапщэхэр республикэм Iэуэлъауэншэу, къэхъукъащIэ мыхъумыщIэ къыхэмыхуэу щекIуэкIащ. Муфтийми зэIущIэм кърихьэлIа псоми фIыщIэ яхуэсщIащ  динкIэ зэтемыхуэу ди республикэм щып­сэухэм я зэхуакум зэгурыIуэныгъэрэ ­зэныбжьэгъугъэрэ дэлъу зэрызэдэпсэум пап­щIэ». 
«Лашын» шхапIэ-хьэщIэщым щекIуэкIа хэщхьэжри щыхьэту къэуващ республикэм ис муслъымэнхэр зэгурыIуэ-зэдэIуэжу зэ­рызэдэпсэумкIэ. Абы хэтащ КъБР-м и Iэтащхьэм и Администрацэм и унафэщI Къуэ­дзокъуэ Мухьэмэд, Правительствэм и Уна­фэщI Мусуков Алий, КъБР-м и Муслъымэн IуэхущIапIэм и лэжьакIуэхэр, къалэ, щIыпIэ администрацэхэм я унафэщIхэр, республикэм и раис-Iимамхэр, дзэ Iуэху хэхам хэта ветеранхэр, гъэзэщIакIуэ органхэм щыщ къулыкъущIэхэр.