«Лъэпкъ зэкъуэтыныгъэмрэ шынагъуэншагъэмрэ иджырей зэманым къы­щы­зэ­гъэпэщынымкIэ щыIэ хэ­кIыпIэхэр» Iуэхум теухуа «стIол хъурей» иджыблагъэ ще­кIуэкIащ Къэбэрдей-Балъ­къэр къэрал университетым ПравэмкIэ, экономикэмрэ финансхэмкIэ и ин­с­ти­тутым. Ар къыхилъхьащ икIи иригъэкIуэкIащ «Рос­сия правовая» студент щIэ­ныгъэ гупжьейм, УФ-м и Пре­зидентым 2026 гъэр Урысейм и лъэпкъхэм я зэкъуэ­тыныгъэм и илъэсу зэригъэувам ипкъ иткIэ.
Абы хэтащ юрист хъу­нухэр, республикэм и щIэ­ныгъэлI пажэхэр, властым и лIыкIуэхэр.

КъБКъУ-м и проректор Гъу­кIэпщокъуэ Мурат «стIол хъурейм» хэтхэм фIэхъус щарихым къыхигъэщащ Урысейм и къарур зыхэлъыр абы и лъэпкъыбэр зэрыарар, студентхэм апхуэдэ Iуэху щхьэ­пэхэр къызэраIэтыр, ягъэ­хьэ­зыра докладхэм и гуапэу зэ­редэIуэнур жиIащ.
«Россия правовая» гуп­жьейм и унафэщI, ПравэмкIэ, экономикэмрэ финансхэмкIэ институтым Конституцэ, административнэ хуитыныгъэмкIэ и кафедрэм и унафэщI Ба­­гъэтыр Алим къыхигъэщ­хьэхукIащ зэхуэсым и мурад нэхъыщхьэр хабзэм и лъэныкъуэ пыухыкIахэм студентхэм гулъытэ хуегъэщIынырщ, къы­­хуеджэныгъэхэм щIэдэIу къудей мыхъуу.
ХьэщIэхэм ящыщу «стIол хъурейм» къыщыпсэлъащ ­Къэбэрдей-Балъкъэрым ­Экономикэ, жылагъуэ шы­на­гъуэншагъэмкIэ и советым и секретарь, экономикэ щIэны­гъэ­хэмкIэ кандидат Тату Казбек. Абы и къэпсэлъэныгъэр тригъэщIащ геополитикэм. Татум къызэхуэсахэм ягу къи­гъэкIыжащ 2026 гъэр Зэкъуэ­тыныгъэм и илъэсу зэ­рагъэувар зэрымыщIэкIэ къы­зэ­ры­мы­хъуар. Ар къэ­ралщIыб къа­рухэм Урысейм щыщыIэ щы­­тыкIэр зэIагъэхьэну зэ­ры­хэтым и жэ­уапщ, Iэпхъуэшапхъуэ Iуэхугъуэхэр, лъэпкъ зэ­ху­щы­тыкIэхэр, зэпэщIэувэныгъэ мы­шыухэр къагъэсэбэпу.
«Лъэпкъ политикэм иджы­рей лъэхъэнэм и къалэн нэ­хъыщ­хьэр граждан зэкъуэ­ты­ныгъэр къызэгъэпэщынырщ. Лъэпкъ зэхущытыкIэр ди ­к­ъэ­ралым щызэпIэзэрытщ. Зэ­къуэтыныгъэм и щапхъэу тхыдэм къыхэщыжхэм япкъ иткIэ, нобэрей жылагъуэр зэуIуу, зылI и быну зэрыIыгъын хуейщ. Къапщтэмэ, абы и щапхъэ нэс нобэ щыдо­лъагъу Урысейм щыпсэу лъэпкъ псоми я лIыкIуэхэр зыхэт дзэ Iуэху хэхам, зауэ губгъуэм. Дзэ зэкъуэшыныгъэр ди лъапIэныгъэшхуэщ, ар тхъумэныр, дгъэбыдэныр ди зэхуэдэ къалэн инщ», - жи­Iащ Тату Казбек.
«СтIол хъурейм» и зы Iы­хьэр теухуат студент къэху­тэныгъэхэр къэп­щытэным. «Рос­сия правовая» гупжьейм хэтхэм докладхэр утыку кърахьащ, мамырыгъэмрэ зэгу-ры­Iуэныгъэмрэ нэхъри гъэ­бы­дэнымкIэ щыIэ юридическэ Iэмэпсымэхэр ягъэнэ­Iуащ.
Студентхэм я къэхутэныгъэхэм мыхьэнэшхуэ зиIэ ­Iуэхугъуэ куэд къызэщIаубыдащ:
АбытIэ Андемыр зэпкърихащ «лъэпкъ зэхэщIыкI» гу­рыIуэныгъэр. Бочаровэ Али­нэрэ Шыгъушэ ФатIимэрэ «хъыбарегъащIэ зауэхэм» зэ­рапэщIэт Iэмалхэр сэтей къащIащ. Гъубжокъуэ Олег, Малкандуевэ Салимэ, Мэрзей Инарэ сымэ дунейпсо кон­венцэхэмрэ щIыдэлъху лъэпкъхэм я статусыр къэ­лъы­­тэнымкIэ бжыгъэхэм ягъэ­защIэ мыхьэнэм теп­сэлъыхьащ. Къарэмырзэ Марат лъэпкъ куэд щызэхэс къэ­ралым и щэнхабзэ, дин ав­тономием и гъунапкъэхэр ­къигъэлъэгъуащ. Мырзэкъан Алинэ къиIэтащ лъэпкъхэм мылъкум емыпха я лъапIэныгъэхэр.
Студентхэм я лэжьыгъэм хэплъащ хьэщIэхэм я мыза­къуэу, институтым и егъэджа­кIуэ гупри. Граждан хабзэмрэ IуэхумкIэ кафедрэм и уна­фэщI Зумакуловэ Заремэ, доцент Тэн Тимур, егъэджа­кIуэ нэхъыжьхэу Мэрзей Азэ­мэтрэ КIарэ ФатIимэрэ я уп­щIэхэмрэ гу зылъатахэмрэ студентхэм сэбэп яхуэхъуащ щIэныгъэ, практикэ я лъэныкъуэкIэ нэхъыбэ къащIэнымкIэ. 
Iэрыс Iэсият.